Ɩ̃ jɔrɔ na dãbɩ̃ɛ a mɩnɛ a waab ʋlɔ na dãa de a ʋ kpɩlfʋ bɛlɛ nɩ a Awa, a nʋmɔ-wa-sɔw ʋ na mɩ tʋɔ na lɛ de a ʋ kpɩlfʋ cʋrʼɩ̃ a nyɩ tɩɛrɩ̃sɩ, a nyɩ na bar a nyɩ yel-mɩ̃ɛ nɩ a nyɩ su-cɛcɛ a Kirisi tunɩfʋ pʋɔ.
Nyɩ wõ na a ba ƴɛr a mɩnɛ a ɩ̃ maalfʋ na dãa be a lɛdaar ɩ̃ na dãa puoro a Jufisɩ puorfʋ, a mɩnɛ ɩ̃ na mɩ dãa nyɩrɩ̃ kpowro a Naaŋmɩn *duo-puorbo, bʋɔrɔ ɩ̃ wɛl ba bar.
A lɛ a sɩ jaa mɩ dãa be, mɩ maala a ala a sɩ ɩ̃gan buur na bʋɔrɔ, a ba kaarɩ̃. Sɩ dãa na de a sɩ mɩ̃ɛ ƴɔ̃w a ala a sɩ ɩ̃gan buur nɩ a sɩ pʋ-tɩɛrʋ̃ na bʋɔrɔ. Ɩ̃ a mɩnɛ sɩ na dãa wɔ̃ a lɛ, su-tuo ɩ̃ dãa gu sɩ a mɩnɛ ʋ na gu a nɩbɛ bala na mɩ wɔ̃ a lɛ.
A-na-ɩ a korĩ-cɛ, a sɩmɩ mɩ, sɩ mɩ dãa na ɩ a gẽgemsɩ nɩ a to-wownbo na dãa bɔr. Sɩ dãa na ɩ a yel-kãkan nɩ a yele ala na kʋrɔ sɩ a vɩláa gbãgbaar. Fãa pʋɔ sɩ dãa be, tɛrɛ nɩ a nyuur, a ba ꞌlaar sɩ, ɩ̃ a sɩ mɩ lɩɛb ꞌlaar taa.
Ala-ɩ̃-sɔ a sɩmɩ mɩ, a mɩnɛ sɩ na tɛrɛ a yel-mɩ̃ɛ ƴɛr-manba na nyɩrɩ̃ waa tiw kolĩ sɩ a nɔhɔ̃, nyɩ́ ɩ a sɩ lɔb a ala a jaa na mɔɔnɔ sɩ a Naaŋmɩn sɔr tufʋ bara, nɩ a maal-fãa na maa yaarɩ̃ barʼɩ̃ sɩ, ɩ̃ na sɩ tɛrɛ a su-varkpara jɔrɔ nɩ a dãw-taa ʋlɔ na be a sɩ nii-sɔw,
Ɩ̃-cɛ, a mɩnɛ sɩ na cãa be a ʋna dayen a Naaŋmɩn Sɛbɛ na bʋɔlɔ “a dɩnaa,” nyɩ́ kʋrɔ taa a ꞌlafʋ a bibie a jaa, a mɩnɛ a fãa kɔ̃ wa bɛlɩ̃ a nɩrɛ kãw suur kpɛmɛ bar wa.
Ala-ɩ̃-sɔ, nyɩ́ ŋmelĩ kpaar cɔw a yel-dɛɛr a jaa, lãa nɩ a tʋ̃-kpansɩ a jaa, ɩ̃ na nyɩ́ sɔw nɩ hɛlɛlɛ yɛ̃ a ƴɛrɩ̃ ʋlɔ a Naaŋmɩn na ƴɔ̃w a nyɩ suur pʋɔ, a-na-ɩ a ʋlɔ na tʋɔ faa nyɩ.
A-na-ɩ nyɩ bɔ̃w na bɔ̃w ka aa ɩ a yel-saansɩ wɔ̃ taa nɩ a libi-kur, mɩɩ a sɛlmɛ ba da nɩ nyɩ, faa nyɩ a sɔr kpana ʋlɔ a nyɩ saanba na dãa tu ɩ̃ cɛ kʋ nyɩ wa.
A korĩ-cɛ, nyɩ pɔw na a daar ʋlɔ na sɛw nyɩ, na nyɩ maalʼɩ̃ a ala a tɩbɛ deme na nʋ. Nyɩ dãa na be a pebfʋ pʋɔ, a ɩ̃gan buur yele pʋɔ, a dãa kʋfʋ pʋɔ, a kpokpo dɩb dɩfʋ pʋɔ, a dãa nyufʋ duo-taa jiir, nɩ a baar lofʋ ala na ciire a Naaŋmɩn nii-sɔw pʋɔ.
A kpowfʋ na ɩ a ba yar, a mɩnɛ ba na mɩ kpow a nɩŋmɛɛ. Ba tɩɛrʼã beeka áa vɩɛlɛ na a ba na maal a vĩ tʋmɔ a mɔtɔ̃w. Ba ma ɩ na vĩ nɩ hũhunfʋ a nyɩ sɔ̃w. A lɛdaar ba na ma be nɩ nyɩ a fɛtɩ jie, a ma ɩ ba na nʋ̃ɔ a ba na bɛlɩ̃ a nɩbɛ.