Juan 7:14 - Tte Pa̱'a̱li̱ Me' Skëköl tö Se' a̱

¹⁴ Mik iké̱wö tkö'we̱kerakitö, e' döketke sha̱böts, eta̱ Jesús dewa̱ Skëköl wé a̱ ta̱ ie' tö s'wöbla'wé̱mi.

Juan 7:14 Iomraidhean Croise

Mateo 21:12

Eta̱ Jesús dewa̱ Skëköl wé a̱. Eta̱ wé̱pa tso' ee̱ íyi ta̱u̱k ena íyi watau̱k e'pa ko̱s trë'wé̱yal ie' tö. Inuköl mane'u̱k wakpa mesa trélurka̱itö. Ñies nuböl watau̱kwakpa kula' trélurka̱itö.

Mateo 26:55

Eta̱ ie' tö ichaké pë' ekkëpa a̱: —¿Ì kue̱ki̱ a' bite̱ ye' klö'u̱kwa̱ tabè ki̱ kal wölö ki̱ we̱s akblökwakpa klö'wè̱wa̱ es? Ke̱kraë ye' bak e̱' tkökse̱r Skëköl wé a̱ s'wöbla'u̱k, erë a' kë̀ wa̱ ye' klöo̱newa̱.

Lucas 19:47

Ke̱kraë Jesús tö s'wöbla'we̱ke Skëköl wé a̱. Sacerdotepa wökirpa ena s'wöbla'u̱k ttè dalöiëno wa wakpa ñies judiowak wökirpa male̱pa, e'pa tö ileritsekerak Jesús ttowa̱ie.

Juan 18:20

Jesús tö iiu̱té: —Ke̱kraë ye' tté sulitane kukua. Ke̱kraë ye' tö s'wöbla'wé̱ se' ñì dapa'wo̱ wé ko̱s a̱ ena Skëköl wé a̱ wé̱ sulitane ñì dapa'u̱ke ee̱. Kë̀ ye' wa̱ ì yëule akir.

Juan 5:14

E' ukuöki̱ ta̱ Jesús tö ie' kué̱ Skëköl wé a̱ ta̱ ichéitö ia̱: —Ye' ttö̀ ttsö́. Be' buanene, e' kue̱ki̱ ì sulu kë̀ wamblaria̱ dö' ì sulu kí̱ döbitu̱ne be' ki̱.

Juan 7:2

Erë judiowak tö ka̱wö tkö'we̱ke kiekerakitö Úla Ké̱wö, e' ké̱wö tkö'we̱kerakitö Judea, e' dewa̱tke tsi̱net.

Juan 7:28

Jesús tso' s'wöbla'u̱k Skëköl wé a̱. Mik e' tö ttè e' ttsé, eta̱ ichéitö a̱neule: —A' ibikeitseke tö a' wa̱ ye' su̱ule buaë. A' ibikeitseke tö a' wa̱ ijche̱r buaë tö wé̱ ye' datse̱. Erë ye' kë̀ dë'bitu̱ ye' wák e̱r wa. Yi tö ye' patkë'bitu̱ e' mik s'e̱rblö̀mi, ie' kë̀ su̱ule a' wa̱.

Juan 7:37

Iké̱wö tkö'we̱ke judiowak tö, e' ké̱wö bata e' dör ibua'ie, e' ké̱wö Jesús e̱' kéka̱ ta̱ ichéitö a̱neule: —Wé̱pa e̱rsine, esepa shkö́ ye' ska' di'yök.

Juan 8:2

Bule es bla'mi ie' dene Skëköl wé a̱ ta̱ pë' ulitane debitu̱ ie' ska'. Ie' e̱' tkése̱r ie'pa wöbla'u̱k.

Juan 8:20

Ttè ikkë ché Jesús tö itso' s'wöbla'u̱k e' dalewa. Ie' tkër s'wöbla'u̱k Skëköl wé a̱ wé̱ kalkuö tso' inuköl ioie mè Skëköl a̱ ee̱. Erë ka̱m ie' ké̱wö döka̱, e' kue̱ki̱ kë̀ yi wa̱ iklönewa̱.