I Петер 3:15 - Сыйлы Инжил бла Забур

¹⁵ Раббий Аллахны жюреклеригизде сыйлы тутугъуз. Сизни Аллахха ышаныуугъузну юсюнден сизге соруп билирге излеген хар адамгъа сабырлыкъ бла эм хурметлик бла жууап берирге хар заманда хазыр болугъуз.

I Петер 3:15 Iomraidhean Croise

Ишлери 21:39

Пауул а: «Мен иудейлиме, Киликияны белгили Тарс шахарыны адамыма; халкъгъа сёлеширге манга эркинлик бериринги сенден тилейме», – деди.

Ишлери 24:25

Пауул тюзлюкню юсюнден, кесинги тыйыуну юсюнден эм къыямат кюн боллукъ сюдню юсюнден айтханы себепли уа, Феликсге къоркъуу тюшдю эм: «Энди бар, заман тапсам а, сени чакъыртырма», – деп жууап этди.

Колослулагъа 1:23

Ийманда бек эм къаты болуп турургъа эмда сиз эшитген Хайыр Хапаргъа ышаныудан таймай турургъа керексиз ансы. Мен, Пауул, кёкню тюбюнде жаратылгъанланы барына да билдирилген ол Хайыр Хапарны жумушчусу болгъанма.

Колослулагъа 1:27

Аллах, бу тасхада битеу миллетлеге къаллай бай махтауу болгъанын, сыйлылагъа кёргюзтюрге сюйгенди. Бу тасха уа Масихни сизде болгъаныды, сизни махтаулу болуругъузну умутуду.

Колослулагъа 1:5

Ийманыгъыз бла сюймеклигигиз кёкледе сизге хазырланнган умутдан тууады. Ол умутну болгъанын, сиз хакъ керти сёзден – алгъын сизге билдирилген Хайыр Хапардан – эшитгенсиз.

Колослулагъа 4:6

Сизни сёзюгюз туз бла жарашдырылгъанча хар заманда да шафауат бла болсун; алай бла сиз хар кимге да къалай жууап этеригизни билирсиз.

Титге 1:2

Абустоллугъум а сёзюнден таймагъан Аллах ёмюрледен да алгъын заманлада берирге айтхан ёмюрлюк жашаугъа ышаныуума таянады.

Чюйютлелеге 3:6

Масих а Аллахны юйюнде Уланыча тюздю. Биз таукеллигибизни эм аны бла махтаннган ышаныуубузну ахырына дери къаты сакъласакъ, Аны юйю бизбиз.

Чюйютлелеге 6:1

Ол себепден, Масихни юсюнден юйретиуню ал башланнганларын къоюп, тамамлыкъгъа жетерге ашыгъайыкъ эм ёлюм келтирген ишледен тобагъа къайтышыудан бла Аллахха ийнаныудан,

I Петер 1:17

Хар кимни ишлерине кёре бет этип къарамай хукму этген Аллахха «Атабыз» дей эсегиз, сора хаух дунияда айланнган кезиуюгюзню Аллахдан къоркъуу бла ашырыгъыз.

I Петер 3:2

Ала, сизни Аллахдан къоркъгъан таза жашау халыгъызны кёрюп, кеслерине бир сёз да айтылмай, къатынларыны жашау халлары бла ийманнга къайтышсынла.

I Петер 3:4

Жууаш эм сабыр халыгъызда, жюрегигиздеги таша адамыгъызны ёмюрде да кетмезлик ариулугъу бла болсун. Ол а Аллахны аллында бек багъалыды.