DANIEL 5:2 - BALA LUK DO'

² Kareb ideh ngirup idi Belsasar nengecuk nelun dukenneh nguit sangkir idi bigan amas idi pirak luk tiban tamanneh Nebukadnesar rat bang Ruma' Allah déi' Yerusalim, pad raca', lun rayehneh, awanneh, idi apidneh miak ngirup makai sangkir idi bigan ineh.

DANIEL 5:2 Iomraidhean Croise

SEMUIL LUK KEDUEH 9:7

Idi kebala Daud neneh, “Aleg iko matot, ngaceku ui méi' namu ngaceku tamanmu Yonatan. Idi ui sikal nguli' amé' namu amung tana' Saul tepunmu ineh. Idi iko miak peruyung kuman denganku.”

RACA'-RACA' LUK KEDUEH 24:13

Idi ieh nenguit amung binaweh luk meraga rat bang Ruma' Allah, idi rat bang ruma' raca' pana'. Idi ieh nenangal amung repapeh amas luk inau' Raca' Selimun kuan Ruma' Allah, maya' kudeng luk bila Tuhan.

RACA'-RACA' LUK KEDUEH 25:15

Ideh nenguit amung binaweh luk ratnan amas idi pirak, ieh ineh busi' luk isuut idi su luk inan bareh apui.

INUL LUK KEDUEH 11:20

Muci ieh nengalap Maka Absalom luk nenganak kuanneh apat anak deléi, ieh ineh Abia, Atai, Sisa, idi Selomit.

INUL LUK KEDUEH 15:16

Idi Maka pana' tinan Raca' Asa ineh tila'neh ratnan kekamenneh ngaceku ieh pangeh nenganau' aceh akang luk dat kuan Asera. Idi Asa nengusag akang luk dat ineh idi nengeseb neneh tangeb Abpa' Kidron.

INUL LUK KEDUEH 36:10

Idi kareb pun melau' idi Nebukadnesar nengecuk nelun nguit ni Yoyakin amé' Babil dengan amung repapeh Ruma' Allah luk meraga. Idi ieh nengikit Sedekia, taman pinaken Yoyakin ku raca' lun Yahuda idi Yerusalim.

INUL LUK KEDUEH 36:18

Idi raca' Babil nengaro Ruma' Allah, idi su luk inan nganug binaweh luk meraga, idi ieh nengalap binaweh raca' idi binaweh lun tarehneh, amung ineh inuitneh iné' Babil.

ESRA 5:14

Idi amung repapeh Ruma' Allah luk ratnan amas idi pirak luk ilap Nebukadnesar rat bang Ruma' Allah luk déi' Yerusalim, idi luk pangeh inuitneh iné' bang ruma' akang luk déi' Babil, amung ineh pangeh biré lemubed kuan seburur luk ngadanneh Sesbasar luk pangeh litepneh ku pengulu Yahuda.

YEREMIA 27:7

Amung pupu miak mangun ku demulunneh, idi demulun anakneh, idi demulun mupunneh pana', pad macing tarekneh bawangneh sebuleng miak uen ngelaya'. Idi pupuneh sebuleng miak mangun ku demulun tuda'-tuda' pupu baken luk melalud idi raca'-raca' luk rayeh.

YEREMIA 50:35

Kebala Tuhan, “Até kuan Babil! Até kuan pupuneh, idi kuan lun rayeh idi lun mileh pana'.

YEREMIA 52:19

Ideh nenguit amung-amung binaweh luk ratnan amas idi pirak: busi' luk isuut, su luk inan bareh apui, bigan luk ruandeh dara', belanga', kukud dawan, su luk inan ngeseb umau luk do' buen, idi teh bigan luk ku ngutang baré luk rupen.

DANIEL 1:2

Tuhan nenima' Nebukadnesar nengakem Raca' Yoyakim idi ngalap sebuang binaweh rat bang Ruma' Allah. Ieh nenguit nelun luk tiban amé' ruma' akangneh déi' Babil, idi ieh nenganug binaweh ineh bang su luk inan nganug luk meraga.

DANIEL 5:11

Inan seburur lemulun bang imetmu luk inan Roh Allah luk Meligan. Kareb tamanmu raca', lemulun ini luk do' kali', idi ilehneh mepad kudeng ileh allah. Idi tamanmu Raca' Nebukadnesar nengeletep neneh ku lun rayeh lun luk mileh nier, lun luk mileh mangun, lun luk mileh nawar ada', idi lun luk mileh kali' gituen.

DANIEL 5:13

Idi petacu ideh nenguit ni Daniel amé' pa kiung raca'. Idi kebala raca' neneh, “Matuké iko ini Daniel, seburur lun Yahudi luk tiban tamanku luk raca' rat bawang Yahuda.

DANIEL 5:18

“Allah luk Meluun Rayeh nengeletep tamanmu Nebukadnesar mangun ku raca' luk rayeh. Idi Ieh nengedita' neneh idi nemaré ubur kuanneh.

DANIEL 5:23

Iko sikal metueh ratnan Tuhan Surga pad iko nenguit sangkir idi bigan luk tiban rat bang Ruma' Allah. Iko, lun rayehmu, awanmu idi apidmu nengirup abpa' anggur luk bang sangkir idi bigan ineh. Idi muyuh nengubur akang luk inau' ratnan amas, pirak, tekaling, belawan, kayuh, idi batu, ieh ineh allah luk na miak nier, ninger, idi kali' anun-anun. Iamo' na muyuh nengubur Allah luk ngimet ulun muyuh idi amung-amung luk ruen muyuh.

DANIEL 5:3

Idi petacu ideh nenguit sangkir idi bigan amas ineh, idi amung-amungdeh nengirup.

DANIEL 5:30

Idi dacem ineh Belsasar, raca' Babil ineh pinaté.

DANIEL 5:4

Ideh nengirup abpa' anggur idi nengubur akang luk inau' ratnan amas, pirak, tekaling, belawan, kayuh, idi batu teh.