Jóshwa 7:6 - Bokyi Bible

⁶ Jóshwa ne banet-ashí-banet-Ézerel ba-ját byídí ké byiko, ké bafip, ba-myii kyísí ké bushú ḿbú mkpukpu-byěm-Óburúkpâbí. Ba-waa ányi tete dyikurúku dyi-fyi. Ba-wuri édúkǎndú ba-fé ké dyishí, ké bafip eri.

Jóshwa 7:6 Iomraidhean Croise

Jénésis 37:29

Ńdyí Rúben o/bwa esim ké dyibíng-omu ándyi o-ba-ri o/fu, Josêf o*fí to ké kafâ* o/ját byídí emen ké byiko ké bafip.

Jénésis 37:34

Jekôp o-ját byídí emen ké byiko ké bafip, o-yip ḿbyí dyikán eta o-fé. O-ta dyikán ńdyí wǎn emen ka-rí!

2 Sámwel 1:11

Dívit o-níbî byídí ḿbyí o/mû o/fé ké byiko o-ját, ké bafip eri, banet emen ashí amúmú ba-chi to éné.

2 Sámwel 1:12

Ba-kyú ké bafip, ba-ta dyikán, ba-cíp esong tete dyikurúku dyi-fyi, ké bubwô-Otu Sôl ne Jónátan, ne ké dyishí-banet-Ézerel ḿbé banet-Óburúkpâbí, ké nǎ, ba/ju bujê ebe ké byití.

2 Sámwel 1:2

Ké orî-dyicí, wǎn-kyisat obónge o/fím ké bampyep-Otu Sôl o-bâ. Nyǐ o/mû o/ját byídí emen ké byiko, o-wuri ecing o-fé ké dyishí, ké bafip ḿbé nyǐ o/mû mu o-tông ng. O-dim o-kâm Dívit, o-siring kyísí o-kye ǎ ofê.

2 Sámwel 12:16

Otu Dívit o-fé nshwam o-kye Osówo o/fu, ochi wǎn emen ámu o-nyange. O-né byiryíng eryí. Ne buchú nang burá nyǐ mu o-da ng enung ké nfût emen o-rí ké dyibe-esí tete dyi-cé.

2 Sámwel 13:19

O-wuri atông o-pwó ké dyishí, o-ját ewuryu emen ányi, o-yip abwô o-cít ké bushú, o-dim o-tii ng o-câ.

2 Sámwel 13:31

Otu Dívit o-bûu nensang, o-ját byídí ké byiko, ké bafip, o-myii kyísí. Bǎmgbán emen ḿbé ba/mû ányi to ne nyǐ, ba-ját to byídí ḿbyí ebe ké byiko.

2 Kyîng 22:11

Ńdyí Sháfan mu o-kó ng nwet ámu, otu o/ját byídí emen ké bafip,

2 Korónyíkil 34:19

Ké nkéré Otu Josáya o/jwo byěm ḿbyí ba/sáng ké nwet ámu, nyǐ o/ját byídí emen ké byiko ké bafip,

Ézara 10:1

Ké nkéré Ézara mu o-tíngê e kyísí o-fâ nshwam ké bushú-kiǐtí-kyise-kyifen-Osówo echi o-tii ng o-sét ng byibî ḿbyín, banet-Ézerel chwóó ḿbé banyinchéng ne ḿbé banyinyi ne ḿbé bwǎsíng ba/wâng ǎ ba-tii kanong kanong.

Nehemyâ 9:1

Ké ací bujam ne anyii ké otukáku ámu obónge, banet-Ézerel ba/cibi kyikit kyibónge ké esong ecíp eringe nyí badatông ba/fu, byiko mbyi byi-kpú u kámbé ké byibî ebe. Mbé ba/mû baa/pap kángkáng bacinbánet ké burwám ebe. Mbé ba-fé byídí-dyikán eta ba-pwó édúkǎndú ké ashí ebe wǎ ekap nyí nyi e-tông ng bafip. Ne mbé kâng ba-bwom ba-kpet esét byibî ḿbyí mbé ne banchí ebe ḿbé kpákpá ba/chi.

Esitá 4:1

Ké nkéré Moredekyâ o/jwo kángkáng byěm ḿbyí bii/chi, nyǐ o/ját byídí emen ké byiko ké bafip. Ne o-fé kâng byídí-dyikán eta, o-pwó atông ké dyishí, o-cen ké oshê o-tii ng kakânkakân ne ejá kyíbóng kyíbóng

Esitá 4:3

Ké byikim-eshê byimúmú ḿbyí ba/jwo kyije ńkyí otu o/kye, banet-Jûs ba/mû ba-tii ng ne ejá kyíbóng kyíbóng. Mbé ba/cíp esong ba-tii bukyû, ne bujê ebe chwóó ba/fé byídí-dyikán eta ba-rí ké atông.

JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 1:20

Jôp kâng o-bûu, o-ját byídí emen ké byiko ké bafip. O-pwát dyishí. O-myii o-cít bushú kyísí, o-kye Osówo ofê,

JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 2:12

Mbé ba/ri Jôp ké nkéré mbé ba/tôong bucen tete, nké mbé ba*da ǎ ecêe*. Ké nkéré mbé ba/cêe ǎ, ba/tii kanong kanong, ba-ját byídí ebe ké byiko ké bafip, ba-pwó édúkǎndú kyíbóng ne ké ashí ebe.

JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 42:6

Ké bubwô ámbu, me éshwân e-kú e-chi i mě ké kángkáng byěm ḿbyí nn/raa, ne n/saa byiko m-pwó atông ne édúkǎndú ké byiko.

Lamantéshan 2:10

Bakâa-banyinchéng-Jerúsélem ba-kú ba-byak ng ké ecing ojá o*fí to kámbé* ne édúkǎndú ké ashí ne byídí-dyikán eta ké byiko. Ásé a-kú a-tíngê e ashí ebe kyísí.

Nómba 14:6

Ne Jóshwa mú wǎn-Nûn ne Kálep mú wǎn-Jéfúne, ḿbé ba/mû banet-boǒfêp-esí ashí afee, ba-ját byídí ebe ké byiko ké bafip.

Nómba 16:22

Nké Músis ne Éron ba/tíngê kyísí ba-raa ba/fu, ô Osówo, wo amu a-kyâ kángkáng byěm dyikpen. Wo kafâ ka-sa ng ǒ ne oshê omúmú? â onet obónge o/chi kyibî dí.

Nómba 16:45

*dabwon fáráng ne banet ḿbén* ké nǎ, me n/chi n-ju kámbé ké abe. Mbé ashí afee ba-tíngê kyísí.

ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 14:14

Ké nkéré Bánábas ne Pôl ba/jwo ńkyí ḿbé mbé ba/mû ba-kú ba-bâ echi, ba-ját byídí ebe ké byiko, ba-tông ba/fu, kafâ nke ka-sa ng kámbé. Ba-byí ne ochéé ba-da-bwom ké otyém-bujê-banet ámbe, ba-wonge ba/fu,

Jóshwa 7:7

Jóshwa o-fé nshwam o/fu, Osówo Óburúkpâbí, kyi/cen ocěn nǎ ne wo a-chi bě byi-nyáng kace ńké Jódan. Eringe nyí ada bě ekúng a-kye banet-Ámórit dí. Eringe nyí ada bě eju dí. Byi/mû byi/chi byi-waa esim-kace nyí áku.

Revelíshon 18:19

Ba-pwó ecing ké ashí ebe. Ba-tii ba-ta dyikán ba-raa ba/fu, kyi/bên kyi-shwôm. Kii*nwa eri kyi-kim ne kiǐtí-oshê ámu*. O-chi i oshê mú kángkáng banet ḿbé mbe ne bǎnsukyíkang ḿbé mbe ba-cen n ké baya ḿbé baryên ba/firi ne efang ké efang emen. Ne ké kyikim-nkéré kyibónge, byěm emen kángkáng bii/tánê.

Jójis 11:35

Nkéré mú nyǐ o/ri ǎ, o-ját byídí ké byiko, ké bafip, o-wonge o/fu, ííí! wǎn mú ejí, wo amu a-két ng mě dyityém. Kyi/cen nǎ ne kyi-kyú wo nké ada mě echi kyi-ta mě ké dyityém. Me nn/ryí Óburúkpâbí ocím kanong kanong, ne me mm*man echîné*.

Jójis 20:26

Kángkáng banet-Ézerel ba-yú kâng ba-ca ké Bétel, ba-tii. Ba-kyú áku ké bushú ḿbú Óburúkpâbí tete dyikurúku dyi-fyi, chwǒm ba*da/ryí*. Ba-chi byifen-kyikwáré, ba-shí byitú byirim byirim ké byifen echi, ké bushú ḿbú Óburúkpâbí.

Jójis 21:2

Banet-Ézerel ba-dim kâng ba-ca Bétel ba-da-kyú ányi ké bushú ḿbú Óburúkpâbí tete dyikurúku dyi-fyi. Ba-tii bukyû kakânkakân ḿbú boo*nwa eri*

1 Sámwel 4:12

Onet obónge mú o/fím ké kyikû ńkyí Běnjámin o/zóngê ochéé kyi-fím ké kyikit ńkyí mbe ba-nwa ng byití tete o-ribi Shílo, ké ochíchí-dyicí ándyi. O-ját byídí ké byiko, o-wuri ecing o-pwó ké dyishí, eringe odatông bafip.