Gálatas 6:12 - Deus Itaumbyry

¹² Akaemo iozepa kulâ unâ egatuwâni modo aguely âyanmo: “Adatâowâdaungâ tâzezewenry ara, Deus xurâem tâwentâguezeba mitomoem” kewâni modo; kewâdylymo kulâ. Kurâ domodo tyize itoem, koendâ tywâgâ aguehomoem warâ kulâ aguelymo. “Cristo kruz wâgâ igueypy kieinwântuo lelâ kydâsemaguely” kelymo-ro watay, judeu domodoram tâzenagazeozemo tâise.

Gálatas 6:12 Iomraidhean Croise

Mateus 23:27

— Moisés inweniby wâgâ enomedâni modo, fariseu domodo warâ, toenzepa âsenagazeze âmaemo! Koendonro emyenro âmaemo, koendonro aieni keba olâ âmaemo. Igueypy etadâdo emyenro âmaemo! Kuoho tywâkure kehoem tapekeingue iwâkudâdybyem awylygue, iodano olâ tâjibyry, tywângueim myara âmaemo.

Mateus 23:28

Koendonroem mawyse mawylymo kulâ, koendonro mâkeba âmaemo, angahumo oday âunârymo inakanhe lelâlâ — kely Jesus.

Mateus 23:5

Tâzehogueoly kulâ ize atomo. Tâjituby wâgâ Deus itaumbyry inwenilymo watay imeâgâemba kehoem tâjituby tywendy wâgâ, tâwâry wâgâ warâ nhekâjilymo. Etaungâ etymo. Tâty tywogonro wâgâ imâem kehoem panu ihomigadyby nhekâjien-honlymo, tynrentomoem kulâ.

Mateus 5:10

— Tuomareim kuru mâkâ Deus ize ato ara aidylygue tânagazezeim. Deus kaynonro mawânkâ ise iwymâry, eni warâ.

Mateus 6:16

Jesus aguely: Tâjityenzeba itaungâ, Deus agâ amyguehomoem mâwinduapyra midylymo watay. Koendonro emyenro modo ara inkâba itaungâ. Deus agâ adâkehomoem nâwinduapyra tâise tawyly xutudyzemo. Awylygue tytyreim ara idylymo. Nâzemelagogueba, nâzekagâimba warâ awylymo. Kurâ domodo tywâgâ koendâ aguehoem kulâ arâ aidylymo. Âdy koendonro nuduwâpyra ise Deus eyanmo. Aitomobyry ebyrylâ awârâ kurâdoram âzehogueolymo.

Mateus 6:2

— Awylygue kaikâ modo mâenmawyadâdylymo watay, amânhetybymo ânguyam kâzegaetaundâ. Koendonroem âdutuim modo aito araba aitaungâ. Kaikâ modo nhemawyadâdylymo watay, tâinkâ lelâba adientyby nhegatulymo, kurâ domodo âtâdyguyho odakâ, xidadâ earuary oze warâ. Kurâ domodo tywâgâ koendâ aguehoem kulâ kaikâ modo nhemawyadâdylymo. Deus koendonro nuduwâpyra ise eyanmo. Aitomobyry ebyrylâ ise awârâ kurâdoram âzehogueolymo.

Mateus 6:5

Jesus aguely: — Deus agâ amyguedaymo, koendonroem âdutuim modo ara inkâba itaungâ. Deus agâ adâkehomoem XYDYK idylymo, âtâ tâdâtâdyguyho oday, arua iskinarydâ warâ, kurâ domodo tâentoem kulâ. Deus koendonro nuduwâpyra ise eyanmo. Aitomobyry ebyrylâ awârâ kurâdoram âzehogueohomo. Xirâ mâuntudyzemo kuru wato.

Lucas 16:15

Aituo myani Jesus aguely: — Âkelomo enanaji, koendonro âmaemo. Deus olâ tutuze koendonro keba mawylymo. Tywângueim ara kulâ kurâdo iomazeândoem amânhekylymo Deus xurâem.

Lucas 20:47

Pekodo pypâ modoram aguelymo inanry: “Xinalâ ise âsejiguymo eni, tusonebama âmaemo” kelymo. Isejiguymo turâem tientomoem kulâ nhenokudylymo. Deus agâ adâkedaymo, imeâgâemba kehoem aguelymo, koendâ tâgaromoem kulâ. Awylygue ise Deus nhenagazedylymo, eagonrodo takaze kehoem — kely myani Jesus.

João 7:18

Tunâry tyangahu odano kulâ tagonroam egatuim tonomery wâgâ koendâ adâkehon-hoem kulâ aguely. Aunlo mâkeba olâ urâ. Unâ egatuim konokuni keba watay, tunâry kulâ mâkeba agueho, tugononibyry aguehobyrylâ. Tugononibyry mâkâ ehoguedyze ato, mâkâ mâkeba. Unâ egatuin-em Deus ingonotyby urâ.

Atos 15:1

Paulo, Barnabé warâ Antioquiadâ awyly ume myani uguondo modo ewy Judeiadâpa, Antioquiaram idâlymo. Saintybyem myani aguelymo Jesus einwânni modoram: — Moisés inweniby ara, iamudo iazeypy ilery ety iopiry tadatâoze lelâ, iamudo judeu awyly xutuhoem, Deus xurâem awyly xutuhoem warâ. Awylygue, âmaemo judeu keba modo mâsemaguedyze mataymo, xina ezewenry ara aitaungâ. Xina ezewenry ara amipyra âmaemo-ro watay, Deus imakewâbyramo ise — kelymo.

Atos 15:5

Fariseu domodo ewype myani târâ. Jesus einwânnipyrymoem myani, Fariseu-em tatomodâ. Paulo aguely tindatuo, neinwâmpyramo myani. Awylygue sautybyem aguelymo: — Judeu keba modo Jesus nheinwândylymo-ro watay, kâzewenry ara nidâmo, Moisés inweniby ara. Tylery ety iopiry natâmo, Deus xurâem tawyly tienehon-homoem. Warâ tâise Jesus einwânni modo iwelo kienomedâdyly, judeu, judeu keba modo alelâ — kelymo. Aguehomo arâ izepa myani Paulo.

2 Coríntios 10:12

Âwâlâ kulâ tâzehoguedyze inkâba xina, Deus emary lelâlâ tawyly xutuhoem kulâ, mâkâ xurâ keba modo aito ara. Deus agueho ara tâise aidylymo, akaemolâ olâ âdara adâidyly awyly agueim. Tagonro agâ tâsenuagaenzemo, tataen-ho modo takaze koendâ tawyly tientomoem. Ânguy Deus emary, ânguy Deus emary keba warâ adâkezemo. Arâ adâidylygue, ânguydo kulâ tawyly tânehonzemo.

2 Coríntios 11:13

“Cristoram aguehoymbyem xina, iwâgâ aguehoem” tâkezemo wâne, konokuze kulâ olâ aguelymo. “Mâkâ xurâenlâ xina aidyly” tâkezemo. Cristo emary aramo, koendonro aramo warâ wâne, tydani modo enokuze; konokuni kulâ lelâlâ olâ akaemo. Unâ Cristo wâgâ agueim nhegatuhomoem aguehoymbyem inkâba akaemo!

Gálatas 2:14

Deus aidysemo ato araba aidylymo awyly kâuntuduo, idânârâ enanaynmolâ kehoem ton-honre Pedroram auguely: “Judeu âmâ, unwâm, âze warâ eynynâ. Akaemo Tiago ingonotaymby modo saindyly iraynâ, judeu keba modo agâ tâtâdyguyze, tâwinduase warâ keankâ âmâ, awârâlâ Cristo ize ato awyly mâuntulygue, kâzewenry saguhobyry agueho araba awyly umelâ. Judeu âmâ. Judeu domodo ezewenry iweniby araba amidyly-ro watay, ‘Xina ezewenry iweniby ara aitaungâ’ tâkezeba ikâ judeu keba modoram” uguely eyam.

Gálatas 2:3

Tutuzemolâ ani Tito gregu awyly. Awylyguelâ xina ezewenry ara tatâzeba awyly. Xina ezewenry ara adatâohoem aguepamo olâ ani.

Gálatas 5:11

Cristo eynynâ ypemugudo, “Judeu keba modo nadatâo âsemaguehoem” uguely-ro watay, koendâ tâise Cristo ynynâbaom modo iedyly. Xirâ olâ auguepa wipyra wato: “Âdaitoem tatâwâduneba judeu keba modo. Jesus Cristo kruz wâgâ iguely myakâwâm, kâmakeze, kieinwântuo lelâ” uguezesedo. Auguely kâinmoba wawylygue pylâ, toenzepa judeu domodo ienagazedyly, unâguedylymo warâ.

Gálatas 6:13

Moisés ezewenry ara adatâoybymoem wâne, idânârâ Moisés inweniby agueho ara anipyramo olâ. “Xina eynynonro akaemo” tâkehomoem kulâ, arâ madatâodyzemo awylymo.

Filipenses 1:15

Tâlâ Jesus wâgâ agueim ewy yizepaom modo. Koendâ tawylygue inkâba Jesus wâgâ aguelymo, akaemolâ tâdyren-honly-ro warâ ize tawylymogue, tydani modoram koendâ tâzepywaoly-ro warâ ize tawylymogue kulâ warâ. Tâdâtuagadyly, tâdâtuebadyly warâ kulâ adiendyse atomo. Warâ tuoday aguelymo: “Toenzepa ise Paulo âsewânily, kurâdo aguykely indadyly kely tindatuo” kelymo. Augueondyly, inakanhe adâkelygue kulâ Jesus wâgâ aguelymo. Tâlâ pylâ Jesus wâgâ koendâ unâ egatuim modo. Iwâgâ aguelymo, mâkâ tinwynedylygue, ywynedylymogue warâ. Tutuzemolâ, Deus ietadânehonly tarâ, pymâdoam Jesus xunâry kâengatuhoem awyly.

Filipenses 2:4

Âmaemoem lelâ koendâ ize mawylymo waypa itaungâ, eagonro modo xurâem lâpylâ ize itaungâ.

Filipenses 3:18

Tâlâ toenzepa Deus ize ato ara aitânry modo. Toenzepa âyanmo adâkezelâ urâ xirâ wâgâ, iwerâ augueondyly. Toenzepa olâ ytynru, wogunru warâ, kâinweniday. Inakanhe adâidylymogue, Cristo kruz wâgâ iguehobyry âwankuem nhedylymo awylygue.

Colossenses 2:23

Koendonro ara wâne kurutomo, koendonro keba olâ. “Deus ehoguedaungâ” kelymo, ize atomo ara lelâ adâjitoem; tohoguedyze Deus ato araba. “Sawoempa itaungâ” kelymo, akaemolâ olâ sawoem ini tâzewenrylâ tyeinwândylygue. “Âwâlâ adapioguwâdaungâ, adatâwâdaungâ warâ” kelymo, ara aguepa olâ Deus. Awârâ ezewenrymo olâ ânguy Deus izepa ato aniempyra itoem anienehomba.