Tɔŋ lasálàá 1:3 - BII BILA

³ Te sálà loamaa o yeema le solio a cɔlua bɛndua nin ni, o bii cɔlu piaandu nɔ lenamta loo, o kɔ cɔm ndu o cɛi-kola-toandaa-labɔɔŋianndo sondoo haliko mi Mɛlɛka cɛl ndu.

Tɔŋ lasálàá 1:3 Iomraidhean Croise

O Kandɔɔ 22:13

Mɛɛ Abraham heelu hɔlla, mó ca saa kóndóó. Leela ndɔlan la va lakayakayanndan o bɔɔ nin. Mó bii ndu, mó solul Hala ndu sálà loamaa o fonda Isaak po ndɔ-o.

O Kandɔɔ 22:2

Mí Hala dimul ndu aa: «Cuá po nɔmndo, po nɔm pilɛ n kaola kon taw-taw-vo, Isaak pɛɛn, mà kɔɛ a ndu o lɛŋnde Moria len nin. La tiiya pɛ lon, a soli ndu sálà loamaa le ya o pembii ya cɔmnin nɔm-nde coo.»

O Kandɔɔ 22:8

Mí Abraham mulul ndu aa: «Po nuu, Hala pila nuwviaanin saa téndóó le sálà loamaa kon solio.» Má kɔa nɛɛ nda va kɔlan-nda nda ŋiɔn kpow.

O Kandɔɔ 8:20

Mó cɔaw fonda-loamaa-lasálàá le Mɛlɛka sálàá solullo lecoo. Mó cua visia diandaa yɛ́-yɛ́a a yovaa diandaa yɛ́-yɛ́a, mó soli sálà loamaa a cɔlua kan o fonda-loamaa-lasálà kon coo.

2Dɛnnda lemasalan 29:32

Mí cɔlua vannda solul Mɛlɛka sálà loamaa-a bɛnda faw-faw: navaa tovaa belaŋɔmmɛw, saa kóndóa kɛmɛ a saa téndéa kɛmɛ lediin.

2Dɛnnda lemasalan 35:12

Má va cɔlua va le sálàla loamaalan-nda kɛsio ikɛi, le yungula yɛ́-yɛ́la Israɛlla tɔ̀a nda yɔngoo, maa mɛɛ o va o sɛvaa o sɛbɛ tɔŋ Moise-o nin yɛ. Lende koni nda tosa vɛlɛ a nawva ni.

Condii lisai 110:3

Paale n cuungiaanin vanaa nɔmaa cɔwva o pembii diandɛi coo le cɔwvo len, langbaa felengia dialun fulaa liilanin nɔm. A hunnin nɔm o hɔl o pembun diandan coo mɛɛ kɛmndan ma fula idii nuaa yɛ.

Condii lisai 40:8

O kon mí dimi aa: «Má cè ya! Ya pila i hin o nɔm ndo. I saalun ɲɛ ya bɛnda le tosaa-o o sɛvaa o sɛbɛ simbulaa nin.»

Fulaa 12:5

A bɛnda ma bii saa téndé, te kon te cuin téndé piaandu nɔ lenamta loo, o nɔ vɔsio pilɛ-o.

Fulaa 24:5

O kon kɔɔli, mó viam langbaa Israɛlla pum le Mɛlɛka sálàla loamaalan solullo, a le ndu sálàla kɔlɲululan solullo a navaa tovaa.

Fulaa 29:18

A cii pɛ, a lom visin saa kóndó kon kpow o fonda-loamaa-lasálàá coo. Sálà loamaa solìn le ya Mɛlɛka-o co kon ni. Sálà loamaa co kon ni, o ya tuɛi cun mì ɲɔɔ hɛnan ya-o.

Fulaa 29:4

O kon, a sɔɔnguu Aarɔn nda poaa ndɔa o cɛi-kola-toandaa-labɔɔŋianndo sondoo, a pulu nda a mɛnndan.

Fulaa 29:42

Sálà loamaa niaa bɛnda mì la va solio le fɛɛn a fɛɛn-ndo co kon ni, la bɛnda mì la va ndu solio ya Mɛlɛka o hɔl o cɛi-kola-toandaa-labɔɔŋianndo sondoo. Lon ya vanin bɔŋanndo a niaa ni, lon koni ya vanin suukanndo a nɔm Moise ni.

Fulaa 32:6

Le hee, diimandɔɔ idiiyo púŋ, mí vannda solul piɔm kon sálàla loamaalan a sálàla kɔlɲululan. Mɛɛ nda cii, má cal le ɲɛdiaa dioo a le kolɔɔ, o kon kɔɔli, má can pisulta bɛɛ tambɛilan.

Fulaa 35:21

Mí vanaa nɔ yiyan kɛndɔɔ má kialu o kɔlta ndalan nin le yɔngoo-a cuu Mɛlɛka cuungiaala ndalan le cɛi-kola-toandaa-labɔɔŋianndo tangullo, le baalala tɔ̀lan kpow tosaa, a le volɔɔla solia lasálàlan sɔndɔɔ.

Fulaa 35:29

Mí Israɛlla kpow, vanpiaandua a vanlaandua, á kelu o kɔlta ndalan nin le hunɔɔ a ɲɛ le baala Mɛlɛka dimul Moise le tosaa-o tosaa-a hun a cuungiaala ndalan a yeemɛi ndɛi o Mɛlɛka lo.

Fulaa 35:5

O niaa tɛɛn, la bii cuungiaa le vali Mɛlɛka-o. Vanaa yeemanin le yɔngoo a kɔlta kɛndɛlan-nda kpow, a nɔla mà yɔngu daɲan, volin humbon, te kon te sianion.

Fulaa 36:3

Mó yɔngu nda cuungiaala Israɛlla cuungiaa le baalala cɛi-kola-toandaa diandaa tosaa lan. Idii oo idii, vanaa yeemɛi va o kɔl-la va hunɔɔ a cuungiaala lan o Moise lo tuŋ.

Fulaa 38:1

Mí Bɛtsalɛl toosiaa fonda-loamaa-lasálàá le sálà loamaa a pɛngɛn akasia, mó va ɲɛ pilɔɔ: bandei dunndo leŋuɛɛnu, buo dunndo leŋuɛɛnu, simnda ndɔlan dunndo leyàá.

Esai 1:11

Mɛlɛka ɲuna aa: ‹Kpeku yɛɛ nɛ ya nɔ yɛ a sálàla niaa co lan soli bɛndoo lan? Sálàla loamaala niaa co solio a saa kóndóa lan la fula ya iyeema few-few, I sanga nin a visin macuɛin navaa téndéa. I yeema lɛ kooma navaa tovaa, kooma saa téndéa a kooma cuinaa toovia le.

Esekiɛl 20:40

Kani o pembii nii diandɛi coo, o pembii bɛndu-bɛnduei Israɛl coo, cuavaa Israɛlla kpow a vanaa vanin o lɛŋnde len nin-nda kpede a biilunin ya ni. Lon ya cɛlnin nda a kɔllo kpow ni. Lon ya ɲunanin niaa le ɲɛm niaa faŋa o ɲɛm niaan coo le ya yɔngoo-on ni, ɲɛm niaan tason o ɲɛm kean niaan nin a ɲɛm niaa kɛsi le ya-on pɛɛn. Sɔɛi fula Maalii o sondo-e co ken ni, Mɛlɛka pɛɛn.

Esekiɛl 40:39

O tongo-luɛyaa tase dio bɛndoo nin, bandólan la va latiɔn, o bandóla lan coo ndáà kialu cɔlua bololan le sálàlan solio nisálà loamaa, sálàá le hakio a le sálà bɛɛndiaa isɔɔ.

Tɔŋ lasálàá 1:10

Te o cɔlua pɔmbɔa nin vanndo soli cɔlu o ke Mɛlɛka-o ni, te saa téndóó te kon te cuin téndóó o yɔngu le sálà loamaa solio ni, o bɛnda mò yɔngu cɔlu piaandu nɔ lenamta loo.

Tɔŋ lasálàá 14:10

O paale ŋɔmaandɔlen, o bii saa kóndóa téndéa nɔ lenamta le-a nda ŋiɔn, saa téndé laandu nɔ lenamta loo, o nɔ vɔsio pilɛ-o, kpeyan vɔɔcan a cuɛiyan-ndo kiloo leŋɔmahiɔɔlu, a cuɛiyan litili táláá.

Tɔŋ lasálàá 16:7

O cii pɛ, o cua cuinaa toovia ŋiɔŋaa Israɛlla hin-nda, o hin a nda Mɛlɛka o hɔl o cɛi-kola-toandaa-labɔɔŋianndo sondoo,

Tɔŋ lasálàá 17:4

o bɛnda mò hin-ndɔ fɔlɔn a cɔlu kon o cɛi-kola-toandaa-labɔɔŋianndo sondoo, mò cɔm ya Mɛlɛka ndu o Calta nilan hɔl-ndɔ maa sálà. Te o hin a ndu le, o dii ndu pɛ a ba ndɔ lende, mɛɛ o del kasi le kooma o soli man ɲɛ yoomaa-an. Kani o co mɛɛ tɔŋndo dimi yɛ le o dii cɔlu kon te. Lelan, a bɛnda ma faŋa vana kon Israɛlla tɛɛn few-few.

Tɔŋ lasálàá 17:8

Mà dimul vɛlɛ nda aa: ‹Te cua pilacieo Israɛl, te kon te mial co niaa o bɛngu coo-o yeema pɛ le sálà loamaa, te kon te sálà súú celen solio,

Tɔŋ lasálàá 17:9

o bɛnda mò hin a cɔlu ndɔ sálà kon o cɛi-kola-toandaa-labɔɔŋianndo sondoo, mò soli ndu sálà o Mɛlɛka lo. Te o hin a ndu le, mɛɛ o del kasi, a bɛnda mà faŋa ndu Israɛlla tɛɛn few-few.

Tɔŋ lasálàá 23:12

Paale pilɛle niaa heelunin tumbu kon coo ya o hɔl le ya ndu cɔmndo len, la solul-la vɛlɛ sálà loamaa a saa téndé nɔ vɔsio o pilɛ-o, saa kon bɛnda mò nɔ lenamta le.

Tɔŋ lasálàá 23:18

O sálà niaa solinin kon a buloo-o kɔɔli, la bɛnda vɛlɛ mì la solul-la sálà loamaa a saa téndéa nɔ vɔsio pilɛ-a nda ŋɔmmɛw, a bɛnda mà nɔ lenamta le, a naw tovaa o pilɛ a á saa kóndóa nda ŋiɔn. O kon kɔɔli, mì la hin vɛlɛ a sálà kpeyanndo a á sálà mamɔi tìw a kon-ndo. Sálàla nda lum ya Mɛlɛka, mì ɲɔɔ hɛnan ya lan la co lan ni.

Tɔŋ lasálàá 3:1

«Te vanndo soli pɛ sálà kɔlɲuloo a cɔlu bɛndoo, o va cɔlu piaandu o va cɔlu laandu, o bɛnda mò hin a cɔlu nɔ lenamta loo ya Mɛlɛka o hɔl.

Tɔŋ lasálàá 4:15

Mì kaasoŋaa kɔlkalua nda tɛɛn a handu balan naw tova kon o lebol Mɛlɛka o hɔl, mà kelu ndu bololan ndon.

Tɔŋ lasálàá 4:23

Te o sina dɔ́ɔ́ pɛ maa o tosa hakio, o bɛnda mò hin a cuin toovi nɔ lenamta loo le sálàá solio,

Tɔŋ lasálàá 4:3

Te vana-solia-lasálà sɔla pɔlaa-o tosa hakio ni, mì haki ndɔ kon taŋ o vanaa tɔ̀a lo, o bɛnda mò solul Mɛlɛka sálàá le haki kon a naw tova nɔ lenamta loo, haliko mo sɔla hakio malɔɔ.

Tɔŋ lasálàá 4:32

Te saa laandoo vanndo yɔngu le sálà co le hakio sɔlaa malɔɔ-o ni, o bɛnda mò yɔngu saa laandu nɔ lenamta loo,

Tɔŋ lasálàá 5:15

«Te vanndo tosa pɛ haki kàlà-kálàá o sandii lepɛŋnde nin, mò kɛɛ le ɲɛm co le ya Mɛlɛka-on yɔngoo, o bɛnda mò yɔngu saa kóndó nɔ lenamta loo le haki o cua a ya Mɛlɛka-o, mà kelu ndu iyama o volin latámán nin mɛɛ volin latámán có dionnɔnndo o Cɛi-Diandaa nin-ndon co yɛ. Cɔlu kon vanin le sálà ɲɛ pilaa salaa ni.

Tɔŋ lasálàá 5:18

O bɛnda mò yoo vana-solia-lasálàá cɔlu fula o cɔlua pɔmbɔa nin-ndo, saa kóndó nɔ lenamta loo pɛɛn. O kɔɛ pɛ a ndu, à kelu ndu iyama maa cɔlu co le sálà mingiaa ɲɛ pilaa-o, mì vana-solia-lasálàá tosa faleŋii baŋannde vana kon coo le haki o tosa o sina lepɛŋndo nin-ndo. O kon, Mɛlɛka mal ndu haki.

Tɔŋ lasálàá 6:2

«Yɔngu Aarɔn nda poaa ndɔa tɔŋndan ndan, ma dimul nda aa: ‹Nuaa nda bɛnda le sálà loamaa solio ni: sálà loamaa bɛnda mò lɔl ŋɔu pii o yinnden nin háá idiiyo o fonda-loamaa-lasálàá coo, mì yinnden le va biyɔɔ.

Tɔŋ lasálàá 6:8

Mì vana-solia-lasálàá faŋa kpeyanndo baa ca, cuɛiyan a ansan kpow, o nda handu o sálà ɲɛm vaa coo-o pɛɛn, mà lom ndu kpúlúká o fonda-loamaa-lasálàá coo, mò fula cun kɛndɔɔ le loonɔnndo a Mɛlɛka o kɔɔ.

Tɔŋ lasálàá 7:16

Te vanndo soli pɛ sálà kɔlɲuloo le yoole o baa o Mɛlɛka lo len timbio, te kon te mò soli sálàá a yeemɛi ndɔɛi ndu pila-e, vana nɔla ma de sálà kon paale o fulanin nden, mì ɲɛ tɔ̀ lonin-ndo dennun vɛlɛ diimandɔɔ.

Tɔŋ lasálàá 8:18

O kon kɔɔli, mó hun a saa kóndó va le sálà loamaa solio-o, mí Aarɔn nda poaa ndɔa handu balan saa kóndó kon o lebol,

Tɔŋ lasálàá 8:21

Mó tɔaa pulon a bɛngulan o mɛnndan nin, mó loam saa kóndó kon kpow o fonda-loamaa-lasálàá coo. Ndu yɔŋnun sálà loamaa cun kɛndɛ ŋɔɛ o yin le ya Mɛlɛka-o ni. Mí Moise tosa falenndon mɛɛ Mɛlɛka cɔm ndu yɛ kpafii.

Tɔŋ lasálàá 9:2

mó dimul Aarɔn aa: «Bii naw téndóó mì ndu va le sálà co le hakio sɔlaa malɔɔ-o solio, ma bii saa kóndóó le sálà loamaa solio, ma cɔm Mɛlɛka nda. Cɔlua ŋiɔŋaa kan kpow a bɛnda mà nɔ lenamta le.

Sakari 13:7

Ɲɛ Mɛlɛka-Nɔ-Kpaayaa-Kpow-vo dimi-o co hoo ni aa: «Mɔɛi cɔwve! Cɔ́n ma kuel vana mandaa n'cɔlu nuu! Cɔ́n ma kuel vɛlɛ vana naa n co nɛɛ pilɛ-o! Lɔva vana mandaa n'saa, o kon mì saa saŋnun! O kon, i mululunnin saa cuawva, mì diw nda tɛ́ɛ́.»

Malasi 1:14

Dɛnɛ palaa co le vana kon, ó nɔ saa kóndóa kɛndɛ-kɛndɛa o cɔlua ndɔa tɛɛn, kɛ mó mɛi kan, mó kɔ bii o ɲavɛiyo le ndu ya sálàá solullo-o! Dɛnɛ palaa co le vana kon, kani Masa bɛndoo ya co ni. Vanaa-mangalaa-isɔɔa kpow a nɔ siòònde a diola nilan. Mɛlɛka-Nɔ-Kpaayaa-Kpow-vo dimi lende ni.»

Kundalan 15:3

mì la yeema le ya sálàla ŋɔa o yin-ndan solullo, o bɛnda mò va cɔlua bɛndua, te kon te cɔlua pɔmbɔa. Sálà ya tuɛi cun mì ɲɔɔ hɛnan ya-o co kon ni, o va sálà loamaa, o va sálà niaa soli le yoole niaa bàá len timbio-o, o va o niaa pila soli a yeemɛi niɛi-yo, o va o niaa soli o kafola niaalan o pilɛ coo-o,

Kundalan 15:8

Te naw téndóó niaa soli sálàá o ya Mɛlɛka lo ni, o va sálà loamaa, o va sálàá le yoole niaa bàá o ya Mɛlɛka lo len timbio, o va vɛlɛ sálà kɔlɲuloo,

Kundalan 19:2

«La tofa vɔ silala co o tɔŋ Mɛlɛka yɔngu-o nin-ndan: la dimul Israɛlla mà hin a naw siaŋaa o pilɛ, o nɔ lenamta loo, o nɔ sɔŋ too, o nda hendu vɔ yɔm lebol o lebol too.

Kundalan 23:19

Hala co vanaciee le lacòò dimi le. O co vɛlɛ po vanaciee le diom ndɔɔ mangalaa le. O dímì isɔɔ mò kɛɛ ndi tosa le, O sólìn lediom o sondo mò kɛɛ len peelu le.

Kundalan 23:27

Mí Balak dimul Balaam aa: «Hun mi kɔɛ a nɔm o fonda celen. Bɔɔle lon ndu, Mɛlɛka cɛlnin ma dow ya nda danga.»

Kundalan 23:3

Mí Balaam dimul Balak aa: «Lo o sálà loamaa nɔmndo ikɛi nanu mì yifan-ndɔ tiŋ. Bɔɔle mì Mɛlɛka cɔmnun ya. O soo pɛ o ya lo, i hun cɔm nɔm ɲɛ o dimulnin ya le tosaa-o.» Mó kɔa o pembei bollen.

Kundalan 23:30

Mí Balak tosa mɛɛ Balaam dimul ndu yɛ, mó soli naw tovaa o pilɛ a saa kóndóó o pilɛ sálà o fonda-loamaa-lasálà oo fonda-loamaa-lasálà coo.

Kundalan 28:11

«O ipaangu oo ipaangu kandɔɔ, la bɛnda mì la solul-la sálà loamaa a navaa tovaa téndéa nda ŋiɔn, saa kóndóó o pilɛ a saa téndéa nɔ vɔsio pilɛ-a nda ŋɔmmɛw, cɔlua kan kpow a bɛnda mà nɔ lenamta le.

Kundalan 28:19

Mì la solul Mɛlɛka sálà loamaa, o ŋɔa o yin-ndo a navaa tovaa nda ŋiɔn, saa kóndóó o pilɛ a saa téndéa nɔ vɔsio pilɛ-a nda ŋɔmmɛw, cɔlua kan kpow a bɛnda mà nɔ lenamta le.

Kundalan 28:31

Kon kpede cɔɔlunin handɔn o sálà loamaa solìn lepalaa-lepala-o a o sálà ɲɛm vaa ndɔɔ coo ni. Cɔlua niaa hɛlinin kan-nda kpow a bɛnda mà nɔ lenamta le, la bɛnda vɛlɛ mi la handu sálàla mamɔila tiw a nda lan lecoo.»

Kundalan 29:13

La bɛnda mì la bii navaa tovaa téndéa tɔ́ a à yaa, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, mì la soli sálà loamaa a nda, sálà ya Mɛlɛka tuɛi cun mì ɲɔɔ hɛnan ya-o. Cɔlua kan kpede a bɛnda mà nɔ lenamta le.

Kundalan 29:2

Mì la soli sálà loamaa, o ya tuɛi cun mì ɲɔɔ hɛnan ya-o a naw tova téndóó pilɛ, saa kóndóó pilɛ a saa téndéa nɔ vɔsio pilɛ-a nda ŋɔmmɛw. Cɔlua kan kpow a bɛnda mà nɔ lenamta le.

Luke 1:35

Mí mɛlɛkanɔɔ mulul ndu aa: «Hala Kɔl-Diandaa hunnin nɔm coo, mì kpaaya Ó-Hiow-Ɲɔɔn-Kpow-vo kuumbun nɔm coo maa levundu. Lelan, o diandaa n vialunin-ndo sɔlanin veeloo aa Po Hala-o.

Nsaŋ 1:36

mó ca Yeesu hiovɔɔ, mó dimi aa: «Má cè Saa téndé Hala-o!»

Nsaŋ 10:7

Mí Yeesu dimul nda vɛlɛ aa: «I co niaa toɲaa dimul kpendekele, ya co Dio-n'saa ni.

Nsaŋ 10:9

Ya, dioo ya co ni, te vanndo kei pɛ o ya nin, mò luɛi, ndu sɔla cindaa. O luɛinin, mò fula, mò saalun nɛɛ diaa kɛndɛa.

2Korɛntea 8:12

Kani te vanndo nɔ pɛ yeemɛi le yɔngoo, Hala cɛl mɛɛ sɔla vana kon co yɛ, kɛ o ve mɛɛ sɔla ndɔ co le yɛ le.

2Korɛntea 9:7

Lelan, vana-vana yɔngu mɛɛ o kelun o kɔl-lɛ, o va a imɔnɔ le, te kon te maa baŋɔɔ le nda baŋ ndu le, kani Hala kaola vana yɔngu a ɲaaloo-o.

Efɛsea 2:18

Kani a ndu o kɔɔ naa sɔla sɔɔnguuo vellaa-velle Hala Fuɲaa ikɛi o kɔl pilɔɔ nin ni.

Efɛsea 5:27

Kani ndu pila ndóò yeema mì ndóò ce kunda vanaa laalannda o diandaa, o biilu ndɔ bɛndoo nin, o ve a isɔw le, o ve a sɔŋ te, o ve o ɲɔfɔliaa le, te kon te tambii súú oo súù.

Tɔŋ miingua 12:27

La bɛnda mì la soli sálàla niaala loamaalan, mì la heelu vision a koovan o fonda-loamaa-lasálà Mɛlɛka Hala niaa coo. Kooma cɔlua sálàá niaa ma bɛnda mì ma talan o fonda-loamaa-lasálà Mɛlɛka Hala niaa coo, vision mún, mì la de mun.

Tɔŋ miingua 15:21

Te cɔlua kan o pilɛ nɔ pɛ namtalen lekɔɔ, te o va pɛ cɔlu co tindaa-o, te kon te cɔlu sumɛiyo, te o nɔ pɛ namtale vɔɔnnde súú-súù o n'dial, la bɛnda mì la solul Mɛlɛka Hala niaa cɔlu vaa lende sálàá le.

Tɔŋ miingua 17:1

La solul Mɛlɛka Hala niaa sálàá a cɔlu namtaa le, o va naw o va saa. Kani dɛnɛ nɔɔlɛiyo co kon le Mɛlɛka Hala niaa ni.

Hebreea 7:26

Yeesu co bolle vanaa-solia-lasálàà naa n nɔ makoo kpeekpei-yo ni. O co o diandaa, o nɔ isɔw le, o nɔ haki le, sɛyanndo co ndu tɛɛn nda vanaa lahakia, mí Hala heelu ndu o halataala di.

Hebreea 9:14

Nɛɛ ken tosan-ndɔ lende, vɛ̀ɛ̀ kooma Yeesu-an man ma hiw kpaayaa lende le? Kani a kpaaya Hala Kɔl-Diandaa ndu pila yɔngun Hala ni, maa cɔlu sálà nɔ lenamta loo. Lelan, o dindinin kɔlta naalan le dɛnnda naala vɔɔnndan haliko mi n tosal Hala yoomaa vallo.