Yoohanee 13:1 - Anutuna Ufa

¹ Anutuna ainnaaqarara qoomaqa adeedi ramafufanoo Yisufa maa maqana quqasee doo narí akoofinai firafa adeedi reemarufanoo minara Yisufa irimarinau. Maa maqa maaqanakinaasa narisaa atooqeemariasara amuqusufanoo ridanoo kaqi misara aidimarufanoo fidanoo kasaaqai munu kuqinau.

Yoohanee 13:1 Iomraidhean Croise

Aaquqira Ufa 8:31

Aiqama maqa maaqai asasiqa niniaafanausa maridaqa. Qinee faiqí faiqi faqa asasiqa niniaafanausa maridaqa.

Mataioo 26:45

Innaaru qimaseenoo findimeeqeenoo narí faiqi namu maruqoo anireenoo nindafeenoo qimanniminau. Innee faiqaqee maridee idooaidee. Qini mareeqee manda oosana maree mariasa nisaukuki quqaaninna eendirafa doo anireenoo.

Mataioo 28:20

Aiqama ufa qimannimiafannana misa faqa mi ufana aiqamausa uqanna qimannimifaqa iriseeqa mi ufana qumaraaqeera, mi ufanamau kai fuaqa. Innee maqusa maqusa fifaqa qinee faqa qumee inni faqa fuanaura. Innee miqi marifaqa qinee qumee kai inni faqa nuanaura. Sia inni mininnisaanaura kasoo innaaruna faqa maqa faqa taikara aukuana inniqa saimbaqa moodaanaki kianaura.

Ruka 9:51

Yisufa Kariree maqa maaqaki niniufanoo innaarunnai oorufuaninna aukuana adeedi roofanoo Yeerusareenni oori quandanau.

Yoohanee 11:55

Yisufa Eefaraimma maqa maaqaki marufanoo Yuda maqannaa qoomaqa firaa qoomaqa ainnaaqarara qoomaqa adeedi ranau. Aukuana aukuana Yuda maqannaa oosana ainnaaqarara qoomaqa adeedi ramafufaqa faiqí anaasee aiqama suqumaree miqoo Yeerusaree maqusai ooruraidaqa nári mandainaina findaukee mariqau. Aukuana aukuana miqimariqau.

Yoohanee 12:23

Yisufa misara iriseenoo qimanniminoo qinau. Anutufa faiqí nimaaku qini duqu firaaqoo uqeerara aukuana doo animaridanoo. Sia maa maqee imariasa imariandeefau maseenoofau qini duqu uqeeraannoofau. Qini firaa aupurara kuqiranannai qini duqu uqeerainanoo areenaannoo.

Yoohanee 13:29

Yudasifa Yisuna faiqi namu munnimmasaa rakisimarufa marufanoo Yisufa aqiqoofaqa misa narana aina fi fi maraanifeera aqiqee maqi qiqau. Kudi fasiqauqa munnimma nimiannoo fee qiqau.

Yoohanee 13:3

Anutufa aiqama afeeka innaaruna faqa maqa faqa Yisuna aramandunnai quqaqoofanoo marufanoo Yisufa mina irida marinau. Narí Anutufinaindari qumufa iridanoo marinau. Narí kaifaa Anutufinnai ooru firafa adeedi ranoo marufanoo minara faqa irida marinau.

Yoohanee 13:34

Doo maqee qinee fuka aaquqira ufa qimannimidaqa. Innee nariara nariara nimuqusidaqa nariara nariara ruaqa. Qinee inniara qimuqusufaqa inniara rimariqia innee faqa qini daanna raaqa nariara nariara ruaqa.

Yoohanee 14:28

Qinee maqee maaqooqari kafaa ooru fuanaura oorureeqa marikiqa oorurandee qumureeqa inni faqa marianaura. Sia qinee ooru fuannanara innee minara rufiaaqa. Innee kuqaa qiniara ridau qinee qeeqa qikoofinnai fuannanara susummaqimaqani. Qini qikoofa qini uriqararafa maridanoo minara susummaqimaqani.

Yoohanee 14:31

Maa maqanasaaqaraasa qinee qeeqa qikoonara rimarunnana minara iriaqeera mina ufamau andeeqasee fidaqa qinee qeeqa kai irisee Sadanna asauku ameemaanai oonuree kuquanaura. Miqi qimaseenoo Yisufa narí faiqi namuara doo uqeeraifaqa maaqooqari moosaa fuanee qimasee uqeereenoo moosaa finau.

Yoohanee 16:28

Qinee qeeqa qikoofinaindari maqasaa qumuafanausa maridaqa doo maqasaa taikeeqa qeeqa qikoofinai ooru fuanaura.

Yoohanee 17:1

Yisufa mi ufausa narí faiqi namu qimanniminau. Qimannimiseenoo oori innaarunai uqeeraseenoo narí akoona Anutuna innaaruqinoo qinau. Oo qipoo doo qini kuqira aukuana adeedi ranoo maridanoo. Anee aneenna amaaku qini qifaaqa areenarana qimia. Qinee kafaa quandaki kaifaa aninna amianeera qimia.

Yoohanee 17:16

Qinee sia maa maqanasaaqaraasaindi maridaqa, misa faqa qini daanna reeqa sia maa maqanasaa qaraasaindiara foora maridaqa.

Yoohanee 17:26

Anee qiniara amuqusidana aidimarina qini faiqi namu naundurai faqa marianifeera qimasee aniara maqee kooroo qimasaida qimannimiaafanausa maqee kafaa kafaa qimannimianaura. Maqee qinee faqa misa naundurai marianinnanara innaaru qidaqa.

Yoohanee 17:5

Oo qipoo qini mareeqeenana aneenna marianaqoo mara quqaqisee qifaaqa areenarana qimia. Ooqai oosana aroo aukuanna maa maqa maaqafa sia marunaki qifaaqa areenarana qimunnana mina kai kafaa qimia.

Yoohanee 18:4

Yisufa aiqama ainaina nariki kambiqaaninnanara irimarufa marufaqa misa oonuroofanoo Yisufa misa noorinni anireenoo iranau. Innee yafasiqanaree randaidee, qufaqa misa qiqau.

Yoohanee 19:28

Yisufa nariara irufanoo aiqama ainaina doo maqee anoonaikufanoo moodaa ooqeenaa akara nammariara qimaqoofa mifa kai sia anoona kambiqaifaqee qimasee minara maaqi qinau.

Yoohanee 2:13

Isaraee maqannaasa mi ainnaaqarara qoomaqana suqarara deedaqufanoo Yisufa minni Yeerusaree maqusai ooru finau.

Yoohanee 6:4

Mi ainaaqarara qoomaqana Yeerusaree maqusai qusasaa kambiqararee qimarufanoo mi fasannai Yisufa Kariree nammari afainni marinau.

Yoohanee 7:30

Yuda maqannaa uriqararausa mi ufana irisee qumarararee qimasoosa minnisaqau. Yisuna kuqira aukuana sia adeedi roofanoo Anutufa qumee misa ititannisoonara minnisaqau.

Yoohanee 7:6

Yisufa iriseenoo qimanniminoo qinau. Qini anoona aukuana sia adeedi ranoo maridanoo. Innee faiqí faiqi aiqama faasaanara maasa aukuanee qimariasa mariafanoo. Maa maqa maaqanasaaqaraasa sia inniara fidiaqaaidanoo. Qiniara kai fidiaqaaidanoo. Qinee maqee maqee misa manda ainainara kooroomannimaqaunaqa minara kai qiniara fidiaqaamaqimaqee mariafanoo.

Yoohanee 8:20

Yisufa maa ufausa Yeerusaree firaa amaana maqaki qimannimimarinau. Mi amaana maqanaki oosirafa moo marinau. Amaana maqaki quqee maru munnimma difaanifa minaki marufanoo mi oosiranaki Yisufa maridanoo mi ufausa qimanniminau. Misa Yisuna qumaraanee qimasee sia qumaraqau. Sia mina kuqira aukuana adeedi ranoo marunara Anutufa qumee rafaaqafusoofaqa sia qumaraqau.

Roomma 8:37

Tamummaqara fasiqauqa miqi qimaqoofaqa qinee Pauroosa mi aiqama ainainausara qinee maaqi qidaqa. Sia moo manda ainaina fannoo Yisufa maasara amuqusiranakinaana ani mara rakee iannoo mi mandainaina oosanna oosannafa maasa darirari marifanoo mi dariranna sia rafaaqafuannoo. Maasara amuqusimarifa asauku mundirafa maasa mareeqee uriqararanaki quqaqaisa maridaqa.

1 Koorinti 1:8

Anutufa maa mariaqooqari amiqimmandee rakisinoo fifi inaqa sia kasaaqai kuridifaranoo taikara aukuana andeeqasee paqurifaranoo. Miqunara mikari maasa karaambaiqa asauku mundirana Yisufa qumira faasaana Anutufa maasa niuqummasee moo aaqarana sia paquriannoo.

Heeburu 3:14

Maasa indaaru paasoosamandee Yisuna qumareeqa. Maqeendari maqeesaa paasoosamasee Yisuna qumareeqa mina kai afaqaqa fifi inaqa taikainna aukuana qumarainaqa maasa mina faqa moodaanaki ainaini marunausara maqi mafiqa mina qumaraanaura.

Heeburu 3:6

Yisufa sia kaqi ainainira faiqi maridanoo. Isaraee maqanaasa nikoofa amaaku uqanna maridanoo. Mifa Anutuna aiku asauku maqasaa mariasa rakisinnimaqee marifa miqoo kai mi saikanaki marifa andeeqasee misasaa rakisimarifa maridanoo. Maasa naaru naaru Yisuna saqarikidaqa minara asasidaqa paasoosidaqa miqidaqa maasa Anutuna faiqi namu mina aiku oosana marunausa maridaqa sia miqidaqa sia mina aiku asauku marunaiqini.

Heeburu 6:11

Maasa inniara maaqiaqeera inniara ridaqa. Inni Anutunara nidirafa asasirafa kasirafa miqiqa fifi inaqa taikainna aukuana kai mafi taikaaqa. Innee miqifanoo inni naundurakinaa nidirafa kuqaa anoonaikiannoo.

1 Peetooroo 1:13

Inneeqa nitikurakinaa irirana deedaqammasee mariaqa. Asauku mundirafa Yisufa koorooinna aukuanna amiqi amiqirana nimiannoo. Inneeqa naundurai irirana mi amiqi amiqiranasaa munduqaraasamaseeqa maridaqa rakisidaqa aufaridaqa mariaqa.

1 Yoohanee 4:19

Anutufa indaaru maasara amuqusunara maasa minara irisee kuqaa fee qimasee quandaki Anutunara faqa nariara nariara faqa uriqarara ainainee qimasee ridaqa nimuqusidaqa.

Uqafiqoo Ufafa 1:5

Yisufa asauku mundirafa andeeqasee kooroo imarifa Anutuna ooqa faiqi kuqiranakiqari findifufa maa maqa maaqanakinaasa karaambaiqauqa uriqararafa marifa mifa faqa narí afaarirana faqa asooarana faqa inni nimidanoo. Mifa maasara amuqusammidanoo. Mifa narí kuqiranannai maasa mandainainakinaana idukunniseenoo maasa qumareeqeenoo narí akoona Anutuna aanaiqikirausa mariaqee qimaseenoo quqaqisaifaqa maridaqa. Anutuna asauku mundirana Yisuna afaaqa areenarana faqa afeeka faqa firaaqoo minaindi marianifeera.