Yoohanee 1:51 - Anutuna Ufa

⁵¹ Miqi qimasee mina faqa marusa qimanniminoo qinau. Qinee anoona ufa qimannimidaqa kasooqaqee innee innaarunai kudimanda rakee inaqa qafaifanoo qangiroouqa faiqí nimaaku qini qimummaqa ooraini qumaini imarifaqa nindafeefaranoo.

Yoohanee 1:51 Iomraidhean Croise

Oosana 28:12

Faiqaqee idanoo qaina moo inau. Aana kisaaqa maqasaaqari innaarunai ooru marufanoo angiroouqa mimau ooruree qumuree imariqau.

Mataioo 25:31

Qinee faiqí nimaaku qumuanna kari qeeqa rakisira afeeka namufaqa qeeqa qangiroo namufaqa maa maqanasaa qumuanaura. Qumureeqa ufaqira qaari amiqira qaari ufiqisee eekara ariranasaa ooqu marifinaqa maqasaaqaraasa ufa irisee andeeqannimaqaanaura.

Mataioo 26:24

Tamummaqara fasiqauqa akara fannoo qiniara faiqí nimaakuara doo kuquani fee qinoo maridanoo. Kuqaa qinee kaqikaa qoo kuquanaura ueeqasainaqa kuquanaura. Qini ueeqaaninna fasiqafa kuqaa maaqi qimasee nariara iriannoo. Nanaree qini qinoofa qini maqaqisoofaqee maridee. Qini numoo firaafa maridanoo fee qiannoo.

Mataioo 3:16

Yoohaneefa Yisuna nammariki ooqumari amaqasoofanoo nammarikiqari findifufanoo mikari kai innaaruna rakeeufanoo Anutuna naaquqara andeeqara maraquna fannoo Yoohaneefa qafoofanoo nakipurunara foora mambufanoo qumureenoo Yisunasaa quqanau.

Mataioo 4:11

Yisufa miqi qimasoofanoo Sadannafa quqasee finau. Fufanoo qangiroouqa Yisufinnai qumureeqa narana aina amidaqa amiqi amiqiqau.

Mataioo 8:20

Miqi qufanoo Yisufa narí maaqi qimasee qimaminau. Anee qiniara amiqira maaqaki faiqee mari fee qidanee qini faqa firaree qidanee. Kaasau fainiuqa oonaamarai faiqee mariasa maridaqa ufiniuqa aanaamuki faiqeemariasa maridaqa. Qinee faiqí nimaaku yai fee qeeqa qikiaqa rumasee fee faiqaanauree sia faiqara qoo marisa maridaqa. Doo qini faqa finnaree.

Mataioo 9:6

Anutufa kuqaa uqanna numoo taikarana qini qiminoo. Miqi qimaseenoo quandafinoo pipisaaqa qusirana qimaminoo qinau. Aneenna qaindasaaqari findifinana aneenna qaari qamunna raqandaammamareenana doo akumaree amaaqa fua.

Mareekoo 1:10

Yisufa nammarikiqari findifinoo qafoofanoo innaaruna rakeemafufanoo Anutuna maraquna fannoo nakipurunara foora Yisunasaa qumu quqanau.

Ruka 2:13

Miqi qufaqa innaarunaindaraa qangiroo moomoosa uqanna tautumasee kooroomafufaqa Anutunara asasira idi raidaqa maaqi qiqau.

Ruka 22:43

Miqi qimaseenoo Yisufa afeekaikamandee innaaru qimasoofanoo tooqaamu fannoo fidikara foora aqinaaqa anireenoo maqai aqufufanoo kuquaqaamminau. Aqufufanoo innaarunaindari qangiroo moo fannoo akooqoo qumureenoo afeeka amufanoo afeekaikinau.]

Ruka 22:69

Doo maqee maaqooqari qinee faiqí nimaaku uriqarara Anutuna asauku uqannai mina aaqa ooqu marifi marianauree qufaqa misa aiqamausa qiqau.

Ruka 3:21

Yoohaneefa kaqi maru aukuana faiqí anaasee moomoosa nammari mareesoofanoo Yisufa faqa aniroofanoo Yoohaneefa mina faqa nammariki mara keeqaseenoo Yisufa nammarikiqari findifinoo innaaru qimarufanoo innaaruna rakeemafufanoo Anutuna naaquqara andeeqara maraquna fannoo nakipurunaika mafinoo Yisunasaa aqufufanoo innaarunaindari ufa moo kambiqeenoo qinau. Anee qini qimuqusimarianna qimaakufa mariananoo firaaqoo aniara dididanoo.

Yoohanee 1:50

Miqi qimasoofanoo Yisufa qinau. Qinee faasai faafisa atukaki mariana qafaunnanara minara qunnanara anee minaree qiniara Anutuna amaaku fee qidanee. Qini ufa iria. Maqee kaqikaaqoo uqafiqaunana qafaananoo. Kasooqaqee anoona firaaqoo uqannifiqaanaura.

Yoohanee 10:1

Yisufa kafaa miqooqaraasaa qimannimidanoo sipsipara qinoo faiqiara qinau. Qinee anoona ufa qimannimidaqa. Faiqí moo fannoo sia sipsipa ququsa kooqiki keeqeemarifa kaqinaindari ququsasaa akareemarifa mifa qummuarimari fasiqafa mariannoo.

Yoohanee 10:7

Minara iriseenoo kafaa kooroomasee qimanniminoo qinau. Qinee kuqaa anoona ufa qimannimidaqa qinee qeeqa kai sipsipa kooqi maridaqa.

Yoohanee 13:16

Qinee kuqaa anoona ufa inni qimannimidaqa. Ainainira fasiqa fannoo sia narí rakisirana uriqararafa maridanoo. Ufa maree fimari fasiqafa sia aqiqeemarina uraaqararafa maridanoo.

Yoohanee 13:38

Yisufa mi ufana iriseenoo qimaminoo qinau, Kuqaa fee anee maqee qiniara kuqinnaree, qinee anoona ufa ani qimamidaqa fafaa eendaki kookooraana sia ufa qinnakamuqoo anee kuqiranara rufiaseenana qaaramoo kari qiniara sia qafaunausee qinanoo kookooraana ufa qiannoo.

Yoohanee 14:12

Qinee anoona ufa qimannimidaqa faiqí anaasee moo fannoo qini saqarikinafa qinee ianandee iannoo. Qinee qeeqa qikoofinnai fuannanara qini saqarikinafa sia qini daanna kai raannoo qini saika uraaqaranoo mariannoo. Mina oosana maaqimminoo maridanoo.

Yoohanee 16:20

Qinee anoona ufa qimannimianaura. Qinee kuquanna kamuqoo innee ikifaafau qifaranoo. Innee miqimariafaqa maqasaaqaraasa qiniara sia irimariasa susuifaranoo. Innee noori runusee marifaranoo qinee kuqiranakiqari findi fuanaqa kafaa mi noori runirana minnisee quandakinaqa asasifaranoo.

Yoohanee 16:23

Qinee kuqiranakiqari findifiqa qeeqa qikoofinnai ooru marianaqa innee sia kafaa qiniara moo ainainara irammirifaranoo. Qinee anoona ufa qimannimidaqa. Innee qiniara faiqi namu maridee qimasee qini qikoona irammirifanoo iraifandinna ainaina oosana oosana nimiannoo.

Yoohanee 21:18

Qinee anoona ufa kai ani qimamidaqa. Anee kumaaraa maridana qamunanda anee rumbasee aneenna aidiranasaa nimariananoo, kasooqaqee anee nauraiqi quqainanoo faiqí moo fannoo ani asauku dinni dinni ratutasee rumbasee afiqee sia fuaqaannai ani akooqainnannai kuqinnanara afiqee fuannoo.

Yoohanee 3:3

Yisufa iriseenoo narí qimaminoo qinau. Qinee anoona ufa ani qimamianaura. Faiqí Anutufinaindari kafaa fukasaa aanaaqi aanaaqi kamafinausa kai Anutuna ququsaki keeqeefaranoo. Kaqi marinausa sia amana fifaranoo.

Yoohanee 3:5

Yisufa iriseenoo qimaminoo qinau. Qinee anoona ufa ani qimamidaqa. Faiqí kaqimarinausa sia uqanna Anutuna ququsaki keeqeefaranoo. Anaasee aranandaki kambiqainausa quandafi Anutuna maraqunannai faqa fukasaa aanaaqi kamafinausa kai Anutuna ququsaki keeqeefaranoo.

Yoohanee 5:19

Yisufa kafaa qimanniminau. Qinee kuqaa anoona ufa inni qimannimidaqa. Qinee sia moo ainaina qeeqaraa auqaidaqa qeeqa qikoona qafamasee mifa indeekai idaqa. Akoofa moo ainaina auqaifanoo amaaku miqikaimmidanoo.

Yoohanee 5:27

Mifa Anutufa narí amaakuara faiqí nimaaku fee qimasee faiqí anaasee mandainaina andeeqannisarana narí amaaku qinisaa quqaqaisa maridaqa.

Yoohanee 6:26

Yisufa iriseenoo quandaki qimanniminoo qinau. Qinee kuqaa anoona ufa inni qimannimidaqa. Qinee qeeqa afeeka uqannifiqaunnanara innee sia minara kai irisee qiniara randaidaqa. Innee feemu namasaafanoo nimuaquinoo maqee qumiqaraaninna ainainara innee minara kai qiniara randee mariafanoo. Yisufa kaifaa quandafufanoo qimanniminoo qinau.

Yoohanee 6:32

Miqi qimasoofanoo Yisufa kafaa qimanniminoo qinau. Mooseefa maru aukuanna pupusamuara maqi ira narana sia mifau nimimarinau. Anutufa innaarunaindari nimimarinau. Sia anoona narana nimimarinau. Doo maa aukuanna qinee qumu marunnaqoo qinisaaqari anoona naranara foora inni nimidanoo.

Yoohanee 6:47

Qinee anoona ufa uqanna qimannimidaqa faiqí moo fannoo irirana qinisaa rusimarinafa naaru marirana doo mareenoo.

Yoohanee 6:53

Yisufa iriseenoo qimanniminoo qinau. Qinee kuqaa anoona ufa qimannimidaqa. Innee qini faiqí nimaaku qimaqi fidika sia naifanoo sia kaqi marirafa inniki mariannoo.

Yoohanee 8:34

Miqi qufanoo Yisufa kafaa qimanniminoo qinau. Qinee kuqaa anoona ufa inni qimannimidaqa. Faiqí moo fannoo mandoosana maree marifa mi manda oosanafa mina rumbaqaifa maridanoo.

Yoohanee 8:51

Yafasiqa anaasee fee qini dookinaa ufa irisee marainafa mifa sia kuquannoo naaru mariannoo.

Yoohanee 8:58

Yisufa minara maaqi qimasee qimanniminoo qinau. Abarahaamafa sia kambiqoo aukuanna qinee maa marunausa mikamuqoo mariqiafana.

2 Teesaroonika 1:7

Karaambaiqa Yisufa innaarunaindari narí afeekafaqaa qangiroo namufaqa ida aurunamu faqa koorooira faasaana asooarana maasa nimiseenoo aupurarana misa nimiannoo.

2 Teesaroonika 1:9

Yisufa naaru naaru taikarana misa niminaqa naaru naaru karaambaiqa mariqooqari nianai naadumasaa maridaqa sia mina areenara afeeka qafeefaranoo.

1 Timooti 3:16

Maasa Yisuna ufa irirana anoona ooqaindari kukeeqara ufa marifa Yisufa idaaqirafa firaafa maridanoo, sia amana moo fannoo minara qaoo qirafa. Yisufa maqasaa fasiqa nifiri kammafinoo koorooinau. Anutuna maraquna fannoo minara andeeqarafa maridanoo fee qinau. Qangiroouqa mina qafaqau. Faiqí moomoosa maaqanna maaqanna minara qimannimiqau. Maa maqa maaqanaki marusa minara kuqaammifoo qiqau. Anutufa mina mareeqeenoo innaarunai quqaqoofanoo maridanoo.

Heeburu 1:14

Qangiroouqa naqi fee iqa maridee. Misa aiqama maraquna kai maridaqa Anutuna ainainira ainaina maridaqa. Mifa innaarunaindari niqiqainaqa faiqí anaasee innaarunai fifandinausa dadaaqiaqeera niqiqaidanoo.

Yudeesa 1:14

Ooqai Eenookafa mi manda fasiqausara tamummaqaseenoo akara rumaqoofa maridaqa. Adanasaaqari moodaannai qisauku oosana taikafufanoo dinni ani moodaa mareenoo qaaraikinoo Eenookafa kambiqanau. Mi Eenookafa maaqi qimasee tamummaqaseenoo akara rinau. Innee iriaqa Anutufa narí naaquqara andeeqara qangiroouqa moomoosa faqa qumureenoo aiqama maqasaa qaraasa suqusee ufa nimiannoo, mandoosana maree mariasa Anutunara sia irimariasa misa Anutuna ufa rukiasee mandainaina oosana oosana maree marianara Anutufa faqa narí qangiroouqa faqa narirara qumuannoo. Mi manda fasiqausa Anutunara mandufa oosana oosana qiranara Anutufa narirara qumuannoo. Doo Eenookana tamummaqara ufa miqiminoo maridanoo. Eenookafa misara miqi qimasoofaqa qinee maa inniki mandoosana uqeeree mariasara mi mau fimariafaqa maaqi qidaqa.

Uqafiqoo Ufafa 19:11

Mi qangiroofa miqi qimasoofaqa innaarunai marida qafaafananoo innaaruna rakeemambufaqa akooqoo mariqau. Qinee minaki qoosa moo eekara arirana qafaqiafana. Mina ataufakaaqa Yisufa ooqufaaqee maridanoo mina auqu qaara auqu faqaafa. Moo auqu amiqirafa mapukusee miqoo kai mari fasiqanee qinau. Moo auqu kuqaa ufa qimari fasiqanee qiqau. Narí andeeqara iriranannai kai faiqí anaasee ufa rainannimaqaidanoo minannai kai mandoosana maree mariasa rakirana marannimidanoo.

Uqafiqoo Ufafa 4:1

Qinee Yoohaneesa mi ufana irunanoo qifu pisipasifaqa moo ainaina qafeeqa. Innaarunai kooqiara foora atuanoo marifaqa qafeeqa. Minakiqari moo fannoo qimaqimifaqa iriqa mina ufa fannoo qufireena miqirana fuaqaidanoo miqidanoo qimaqiminoo anee mai ururainaqa kasooqaqee kambiqaaninna ainainna uqafiqaanaura.