Kooroosee 2:2 - Anutuna Ufa

² Minara inni nimuqusa sia iani paasoosammasee mariaqeera innee moodaanaki kammafi nariara nariara ridaqa innee Anutuna ufa amiqimasee iriseeqa innee nifaaqa quqasee Anutunaki mapukuaqeera inniara kadaapi ridaqa. Innee amiqimasee Anutuna afeeka kukeeqara ufa uqeerasee iriaqeera. Mi kukeeqara afeeka ufafa asauku mundirafa narí uqanna maridanoo.

Kooroosee 2:2 Iomraidhean Croise

Idi Ufa 133:1

Anutuna faiqí anaasee moodaanaki marida narí amiqi narí amiqirafa kaaqa amiqirafa maridanoo.

Mataioo 11:25

Mikari Yisufa innaaru qimasee qinau. Qini qikoofa, maa maqana faqa innaaruna faqa rakisirafa dufi dufi ani ufa qinee maqee maqee maa ufana qimannimimarunnanara irirana faqaasa nifusaa rafaaqafunniseenana kaiqeesa nifusaa kooroo mannimaqee mariananoo.

Mataioo 11:27

Aiqama ainaina qini qikoofa qiminau. Yafa yafee amaakuara iridanoo fee sia moo fannoo. Akoofa kai minara iridanoo. Yafa yafee akoonara iridanoo fee, sia moo fannoo amaaku kai minara iridanoo amaaku fannoo narí kai irisee uqannifiqarausa misa minannai qini qikoonara iridaqa.

Mataioo 13:11

Yisufa iriseenoo qinau, innee innaaruna maqusa qumee irirana iriaqeera, misa sia iriaqeera quandara ufa qimannimidaqa.

Ruka 1:1

Oo maa fasiqa Tioofirusa maasaki Yisunasaaqari kambiqoo ainainara moomoo fasiqauqa amanamasee akara riqau, Yisufa kambiqooqooqari minara qimannimimarusa misa qimannimufaqa akara riqau.

Yoohanee 10:30

Qini qikoofa faqa qinee faqa moodaa marunnanara sia amana rafieefaranoo.

Yoohanee 10:38

Innee qeeqaraa ufa qunnanara unna fee qimasaida qinee faiqí sia auqaaqaa ira ainainna auqaanaqa qafamasee qiniara kuqaa anoona fee qimasee kuqaa mina akoofa minaki marinara miqidanoo fee qiaqaana kaifaa mifa faqa nariki marinara miqidanoo fee qiaqaana.

Yoohanee 16:15

Qini qikoona Anutuna ainaina aiqama qinindi kai maridanoo. Minara qinee inni maana qimannimiqa kafaa qimannimidaqa. Qinee qeeqa irirana marasee anoona ufa qira maraquna qimamiananoo mifa quandaki inni qimannimiannoo.

Yoohanee 17:3

Naaru naaru marirafa maaqimminoo maridanoo. Maqasaa fasiqa anaasee misa ani moodaa kuqaa Anutunara irisee mi iriranamau firafa kafaa qini Yisusa ani asauku mundirausara anee diqiqoonausara miqikaimasee irisee mi iriranamau firafa, mifa kai naaru naaru marirafa maridanoo.

Yoohanee 5:17

Yisufa mina iriseenoo rakisirausa maaqi qimasee qimanniminau. Qini qikoofa sia moo faasaana minnisaidanoo aiqama faasaana ainainidanoo. Qinee faqa miqikaimmianauranoo.

Yoohanee 5:23

Aiqamausa qini qikoona Anutunara naaquqaanifeera miqinau. Qiniara naaquqaindee kai iqa qini qikoonara naaquqaanifeera miqinau. Faiqí moo fannoo moona amaaku sia mina aqoondikinafa mina akoona faqa miqikai inana miqanda qisakoosa sia niqoondikinnaranoo.

Yoohanee 6:69

Doo maqee maasa aniara kuqaa anoonee qidaqa aniara Anutufinaindari naaquqarafa mariifoo qidaqa.

Roomma 15:13

Anutufa maasa innaarunaira afeesirana oosanafaqaafa maridanoo, mifa kai innee mina saqarikiranannai aiqama asasirana faqa asooarana faqa innikina qumbiqannimaqaannoo, Anutuna naaquqara andeeqara maraquna afeeka fannoo inni dadaaqinanoo innaarunaira asasammasee afeesirafa mi asasirafa qumbiqeenoo teeqiannoo.

Roomma 16:25

Doo maasa Anutuna areenarana amia, Ooqai oosana aroonakiqari kukeeqara anoona ufa Isaraee maqannaasa faqa aanaamuru maqannaasa faqa Anutufa asumu mariranaki quqaaninna ufana kukeeqanoo mariufa maqee Yisunaki koorooinoo maridanoo. Mi kooroo ira ufafa inni Yisuna saqariki mariana minaki inni amana mapuku nimaqaannoo. Amiqira fasaasa ufa asauku mundirana Yisunara qinee qimannimiqa nunnana, inni Yisuna saqarikirana mi ufanasaa mundinoo maridanoo. Amana Anutufa inni Yisunaki saqarikirana mapukusee quqannisaanoo.

Roomma 2:4

Inniara Anutufa aneenna mandainainakiqari mifinnai ubeekeefandinnanara reendeenamasee rakisidanoo maridanoo. Innee minara Anutufa reendeenira oosana marainara innee minara furufarira oosana fee fee qimaseeqee kaqi mi mandoosannaki marida fee. Anutufa inniara reendeenira oosana fannoo sia furufarira oosanafau maridanoofau. Inneeqa mandainaina minnisee quandaki narinnai ubeekaaqee qimari oosanafa maridanoo innee sia fee minara iridaqee.

1 Koorinti 14:31

Innee aiqama amana Anutuna ufa qimannimiaqa moodaa kai moodaa kai findifidaqa amana qimannimifaranoo. Miqimandaifaqa aiqamausa misa irirana iriseeqa dadaaqirana mareefaranoo.

1 Koorinti 2:12

Inni saimbaqa sia maa maqa maaqanasaaqaraa maraquna maroosa maridaqa. Inni saimbaqa Anutufa niqiqoo maraquna maroosa maridaqa Anutufa minannai innaarunai asumu mareemariana faqa minasaaqaraa naundura adiafaairana faqa niminau.

Karatia 3:28

Doo minakiqari sia Yuda maqannaasa faqa aanaamuru faqa naaduma moo kiqa maridaqa sia karabusa ainaini mariasa faqa idukirausa faqa moo kiqa mariafanoo sia faiqí faqa anaasee faqa mookiqa mariafanoo amana amana kai mariafanoo. Innee aiqama asauku mundirana Yisuna faqa moodaanaki maridaqa aiqamausa amana amana kai moodaa mariafanoo.

Eefeesusa 1:7

Anutufa narí asauku mundirana kuqiranannai maasa mandainainakinaana idukuqiseenoo maasa mandoosana akiaqara minniqisainaqa marianaura. Maasa minara irisee Anutuna firaa afaariranara akooqoo uqanna marifaqa qafamasee irisee naqimasee maraanauree minara rufiaida furufaridaqa.

Eefeesusa 3:16

Mi Anutunara inniara innaaru qidaqa, asauku mundirana innee saqarikiranannai mifa anireenoo inni naunduraki maaqakiara foora ani keeqaanifeera. Mifa narí maraqunannai narí areenarana firaanakiqari inni naunduraki afeeka niminaqa mapukusee mariaqa. Qinee inniara maaqi qidaqa innaaru qidaqa, innee inneeqa atukara foora faqa faakanara foora faqa nariara nariara nimuqusiranaki mapukusaaqa, innee Eefeesusa maqannaasa faqa Anutuna aiku asauku moo maqannaa mariasa saimbaqa afeeka marinaqa minannai asauku mundirana inniara amuqusinoo aidirana firaana iriaqeera innaaru qidaqa. Mifa inniara amuqusinoo aidirana mina kisaaqasaa aidirana faqa mina qusa kamu faqa mina meerai sandaaqaira faqa mina meemai farumara foora marirana faqa mina firaatiara iriaqeera qinee innaaru qidaqa.

Eefeesusa 3:3

Anutufa Yisunara ooqaindari kukeeqanoo marunara maqee aukuana qini kooroomaqimaqeenoo. Qinee maa pasanaki kaqikaaqoo minara inni qimannimiqa, innee mina asaana rumaseeqa iriqa qiniara asauku mundirana kukeeqara irirana amiqimmandee iridanoommifoo qifaranoo.

Eefeesusa 6:22

Mina qimannimianifeera aqiqaanaura inni nimuqusa pooduqaanifeera aqiqaanauranoo.

Firipi 2:1

Innee asauku mundiranaki nimariafanoo inni pooduqara afeekaikirana nimidanoo fee. Asauku mundirafa inniara rirana naunduraki amiqi amiqirana nimidanoo, innee Anutuna maraquna faqa moodaanaki maridaqa quandafi nariara nariara rirana naunduraki amiqi amiqirana nimidanoo, innee Anutuna maraquna faqa moodaanaki maridaqa quandafi nariara nariara idaaqidaaqida mariafanoo. Innee nariara nariara nimuqusi marifaqa idaaqidaaqida mariafanoo.

Firipi 3:8

Sia mi ainainausara kai miqi qidaqa aiqama ainainara kaaqa fifau sia mari ainainnee qimasee quandaki anoona ainaina tia firaa ainaina, asauku mundirana Yisuna maasa karaambaiqara irimariana minara kai anoona ainaina fee qimasee minakai qumareeqa. Minara maraannee qimasee aiqama ainaina doo aquseeqa asauku mundirana maraani qimaseeqa mina faqa moodaanaki marianauree qimaseeqa aiqama ainainara fifau madaapee ainainee qimasee aquseeqa quandaki Yisuna qumareeqa. Doo maqee qinee sia qeeqa andeeqarana maraqa nidaqa sia Mooseena sandufannai mi andeeqarana maraqa nidaqa. Qinee maqee moo andeeqarana asauku mundirana saqarikiafannanannai Anutufa andeeqarana qimuna mina kai maqee maraqa nidaqa. Mi andeeqarafa Anutunaindari anifa Yisuna saqarikiranasaa mundinoo marifa marifaqa maraqa nidaqa.

Kooroosee 1:26

Anutuna ufa kukeeqara ufa maaqi qinoo maridanoo. Anutuna asauku mundirafa Yisufa inni faiqí faiqi naundurai maridanoo. Mina oosana maaqimminoo maridanoo kasooqaqee innee faqa innaarunai ooruree Anutuna ainaina adiafaa ira ainaina mina uriqararana afaaqa areenarana kaaqa qarana mareefaranoo. Anutuna kukeeqara ufa doo miqinoo maridanoo. Mifa mi ufanara maaqi qinoo. Maa qini amiqira kukeeqara ufa uriqarara kukeeqara ufa aiqama maqannaasa iriaqeera qini qiku qisauku mariasa kooroomannisaanauree qinoo. Anutuna asauku mundirafa faiqí faiqi naundurai mariranara faqa innaarunai mina faqa ooru mariranara faqa mi ufaqandara ooqaindari kukeeqeeuna maqee kamuqoo doo kooroomasee narí aiku asauku qimanniminoo.

Kooroosee 1:9

Maasa indaaru mi ufana iriseeqa miqooqari inniara innaaru qidaqa. Maasa inniara Anutuna iriranamau fifandinnanara inni naundurai qumbiqaanifeera innaaru qidaqa. Anutuna maraquna fannoo nimi irirana faqa iriranamau fira irirana faqa inni naundurai qumbiqaanifeera minara faqa innaaru qimannisaidaqa.

Kooroosee 2:19

Misa asauku mundirana minniseeqa nári aatata nifiqee firaree qidaqa mi ufanannai inni rafaaqafifaranoo. Asauku mundirafa maasa qikiaqa maridanoo mina adaka maasa maridaqa. Mifa maasa rakisinara amiqimasee moodaanaki maridaqa narí dadaaqi narí dadaaqidaqa Anutuna ufasaa innooqafi afeekaikidaqa. Mi fasiqausa nári qummaarannai inni rafaaqafimariasa maasa qikiaqa Yisuna minniseeqa nári aatata fidaqa mi ufanannai inni rafaaqafidaqa.

Kooroosee 3:14

Mi andeeqara aiqama ainainna nariqa kai sia amanaikifanoo nariara nariara nimuqusinafa mifa mi aiqama amiqira ainainausa uriqararafa maridanoo moodaanaki suqu quqaseenoo adiafaa irana nimidanoo.

Kooroosee 4:3

Innee innaaru qidaqa mai qini Pauroosa saimbaqa maaqoo rumbaqa qini faqa mariasara faqa innaaru qimannisaaqa. Ooqai asauku mundirafa kukeeqanoo marufanoo maqee kari akooroo inoo marifanoo Anutufa maasa dadaaqinaqa mina ufa aiqamai kooroomannimaqaannee qimaseeqa minara faqa innaaruqiaqa. Doo qinee maqee Roomma maqannaa rumbaranaki fifau maridaqa. Asauku mundiranara maqusa maqusa qimannimiafannanara Roomma maqannaasa sia maasa amaana ufafau qifoo qimaseeqa qini rumbaranaki quqaqaafaqa maridaqa. Innee minara iriseeqa qiniara faqa innaaruqimaqisaaqa.

Kooroosee 4:8

Qinee Tikikusana maindari aqiqaananoo maasa daufakiana qimanniminanoo inni nifeeqaranoo mariannoo.

1 Teesaroonika 1:5

Maasa Yisuna aufakiana sia noonnai kaifau inni qimannimidau, Anutuna afeekannai faqa mina naaquqara andeeqara maraqunannai faqa qeeqa faqa mi iriranamau fidaqa minannai faqa inni qimannimiafannana minara Anutufa inni rusandeesamunara iridaqa kuqaa fee qidaqa. Maasa inni faqa Teesaroonika maqusai mariafana qiqafoosa maridaqa inni dadaaqirara andeeqaseeqa mariafanausa maridaqa innee minara irimariafanoo.

1 Teesaroonika 5:14

Qinee inni naamuaqi maruna fasiqausa qimannimidaqa, inni kudi fasiqauqara afeekaikamasee naakapaifaqa misa ainainiaqa, rufiee maria fasiqa anaaseesa nimana mapukunimaqaaqa, irirana oore̱eqarausa innee dadaaqiaqa, innee aiqamausa qambaanai reendeenidaqa asooamasee qimannimiqa fuaqa.

1 Timooti 3:16

Maasa Yisuna ufa irirana anoona ooqaindari kukeeqara ufa marifa Yisufa idaaqirafa firaafa maridanoo, sia amana moo fannoo minara qaoo qirafa. Yisufa maqasaa fasiqa nifiri kammafinoo koorooinau. Anutuna maraquna fannoo minara andeeqarafa maridanoo fee qinau. Qangiroouqa mina qafaqau. Faiqí moomoosa maaqanna maaqanna minara qimannimiqau. Maa maqa maaqanaki marusa minara kuqaammifoo qiqau. Anutufa mina mareeqeenoo innaarunai quqaqoofanoo maridanoo.

Heeburu 10:22

Doo maasa minara iriseeqa Anutuna aaqa adeedi aniaqa. Kuqaa aneenna amuqusakiqari Anutunara ridana doo Anutuna aaqa adeedi aniaqa. Aneenna irirana mapukusee minasaa rusirafa doo adeedi ania. Ooqeenaa mandainaina ani aakirana afaimma quqaseenana anukarafa ania. Aneenna afaaqa amiqira nammarinnaira foora findaukamasee Anutuna aaqa adeedi ania.

Heeburu 6:11

Maasa inniara maaqiaqeera inniara ridaqa. Inni Anutunara nidirafa asasirafa kasirafa miqiqa fifi inaqa taikainna aukuana kai mafi taikaaqa. Innee miqifanoo inni naundurakinaa nidirafa kuqaa anoonaikiannoo.

2 Peetooroo 1:10

Innee aiqamausa nifusaa maqee maqee moo faqa moo faqa afeekaikamasee Anutufa inni rusandeesamumasee maroonara kooroo iaqa.

2 Peetooroo 1:3

Anutufa narí kaaqa qara amiqiranannai maasa daaree marina Yisunara irianara eedoo qinoo doo minannai narí innaarunaindaraa afeeka maasa qimanakai qimifaqa minannai Anutuna andeeqara marirana maa maqanasaa maraanaura.

2 Peetooroo 3:18

Maasa Karaambaiqa maasa asumu maree marifa asauku mundirafa Yisufa mina amiqira marirana irirana minaki kai fidaqa maqee maqee innooqaaqa. Maqee faqa naaru naaru faqa mina amooqira ufa mariani. Kuqaa.

1 Yoohanee 3:19

Maasa miqiannanannai kuqaa anoonasaa atooaqa maridee qianaura. Maasa miqiannanara maaqoo nidaqa maridaqa Anutuna afusaa mirinni maridanoo maasa qiqafainaqa paasoosianaura.

1 Yoohanee 5:7

Anutuna maraquna fannoo kuqaa anoona ufa imarufa maridanoo mina koorooinau.