Kooroosee 1:17 - Anutuna Ufa

¹⁷ Asauku mundirafa sia maqee kaifau marida ooqai marufa maa maqanasaa ainaina sia maruqoo marufa marinau. Doo maqa faqa minasaa mari ainainausa faqa innaaruna faqa minakinaa ainainauqa faqa asauku mundiranaki kai ookaamambida maridanoo.

Kooroosee 1:17 Iomraidhean Croise

Idi Ufa 75:3

Maa maqa maaqanakinaa aiqama ainaina rufieeqa naindiri raifanoo maqa faqa kasinaqa qinee Anutusa kai mina oosana atukaramma qumaraananoo sia kaaqa mandaikiannoo.

Yoohanee 17:5

Oo qipoo qini mareeqeenana aneenna marianaqoo mara quqaqisee qifaaqa areenarana qimia. Ooqai oosana aroo aukuanna maa maqa maaqafa sia marunaki qifaaqa areenarana qimunnana mina kai kafaa qimia.

Yoohanee 8:58

Yisufa minara maaqi qimasee qimanniminoo qinau. Abarahaamafa sia kambiqoo aukuanna qinee maa marunausa mikamuqoo mariqiafana.

1 Koorinti 8:6

Sia maasa misauqara iridaqa maasa Yisuna ufa irimariasa Anutufa aiqamausa nikoofa moodaa kai marifaqee qidaqa, aiqama ainaina auqu quqoo fee qidaqa maasa mi Anutuna ainainammaisaranara maridaqa. Sia moo karaambaiqa maridanoo maasa karaambaiqa, asauku mundirafa Yisufa mifa kai marifaqee qidaqa. Minannai Anutufa sia maru ainainanna aiqama ainaina auquqoofa maridanoo, maasa minasaaqaraa mariranasaa maridaqa. Minara maasa aiqama narana amana naanaura. Kaqi narana faqa fifau afaanna aandau faqa aiqamaqara namasee mina neemariafa sia aaqarafa maridanoo. Moo ainaina aaqarafa maaqimminoo maridanoo. Aiqama Yisuna ufa irimariasa sia maa qunnanara iridaqa. Akaqausa ooqaindari sia Yisunara iru aukuanaindari mi fifau afaanna amaana maqanaki maqee maqee keeqafiqa narana namasee mi narannara mi afaannanaindi fee qimariqau, kafaa maqee faqa Yisuna ufa iridaqa sia afaannara innaaru qidaqa kaqi keeqafi namasaidaqa unna qimasaida afaanna marifaqee qimasaidaqa kaqi mi narannara Anutuna namuqaandi fee qimasee boo Anutuna namuqaa aqoondikidaqa aaqaidee qimasaidaqa nári maraquna nári naakirafa ummaara nimifaqa maasa daunduraki putaairana qimifaqee qidaqa.

Kooroosee 1:15

Anutufa kukeeqarafa marifanoo asauku mundirafa mina amaaku mina amammana ususeenoo maridanoo narí akoona oori afiri marasee mina nirana mina marirana mina maraquna maasaki doo andeeqasee narí akoonara kooroo idanoo. Mi asauku mundirafa aiqama ainaina Anutufa auquqoona urinaaqararafa maridanoo.

Heeburu 1:3

Mifa narí akoona Anutunasaaqaraa areenarana firaaqoo rupannooidanoo mifa Anutuna oori afiri amudaani narí akoofara foora mina amanakai uqanna maridanoo, narí afeekufannai innaaruna faqa maqa faqa aiqama ainaina uqeera afeekaikamaqoofanoo maridanoo. Mifa Anutuna amaaku fannoo faiqí faiqi mandainaina maqasaa qumu anukama rukaseenoo narí akoona aaqa innaarunai aiqama ainaina uriqararana asauku uqannai ooru ooqumarinau.

Heeburu 13:8

Yisufa asauku mundirafa sia minaki oosana oosana irirafa marifa. Eenda faqa maqee faqa naaru naaru faqa amanamana kai andeeqara irira oosana marifa maridanoo. Innee faqa miqiaqa.

Uqafiqoo Ufafa 1:11

Mi ufafa maaqi qimasee qimaqiminau. Yoohanee maqee uqafiqaanna ainaina anee papiqaki akara rumasee dinni qisauku taikasee dinni ani qaara marasee maqusanaasa nári amaana maqakiaqa keeqee mariasa akara rumannimaqaa. Eefeesusa maqusa amaana maqaki keeqee mariasa faqa Samirana maqusa amaana maqaki keeqee mariasa faqa Peerakamumma maqusa amaana maqaki keeqee mariasa faqa Tiatira maqusa amaana maqaki keeqee mariasa faqa Firadeerafia maqusa amaana maqaki keeqee mariasa faqa Raoodiseea maqusa amaana maqaki keeqee mariasa faqa miqimasee amaana maqanamuara akara rumannimia.

Uqafiqoo Ufafa 1:17

Qinee mina qafamasee kaaqa rufiasee mina aramandunnai maqasaa aqufiqa kuqiara foora iqa mariafananoo narí asauku uqannai qinisaa munduseenoo qimaqiminoo qinau. Oo maa fasiqa sia rufiaa. Qinee indaaruqaasa faqa inaaqianaasa faqa maridaqa.

Uqafiqoo Ufafa 1:8

Anutufa uriqararafa karaambaiqa ooqai marufa maqee faqa kaqi marifa naaru faqa kaqi marianinafa nariara maaqi qidanoo. Qinee oosana aroo aukuana mariafanausa naaru taikara aukuana faqa kaqi marianausa maridaqa.

Uqafiqoo Ufafa 2:8

Miqi qimaseenoo Eefeesusa amaana maqa Paatoonara ufa qimaseenoo quandakufanoo Samirana amaana maqasa Paatoonara Yoohaneena qimaminau. Yoohanee anee Samirana amaana maqasaa rakisimari Paatoona maaqi qimasee akara rumamia. Ooqai indaaruqaafa faqa inaaqianaafa faqa ooqai kuqufa findifi kaqi marifa Yisufa maa ufana ani qimamidanoo.