Firipi 4:8 - Anutuna Ufa

⁸ Oo qini qikaqaafasaauqa qini taikara ufa maaqimminoo maridanoo, inni iriranara qimannimidaqa, innee inneeqa kai amiqira ainainara irirafa faqa uriqarara ainaina faiqí amooqimaria ainainnara irirafa faqa minauqara kai maqee maqee naaqoo nitikuraki inni irirafa qumbiqaani. Kuqaa qimaria ufana faqa naaquqara amiqira ainaina faqa andeeqarana faqa anukara ainaina irirana faqa idaaqira ainainara irirana faqa amiqira oosana ainaina Anutufa amana iriaqaa ira ainaina faqa mi ainainausara kai nitikuraki qumbiqanoo mariani.

Firipi 4:8 Iomraidhean Croise

Oosana 18:19

Abaraqaammafa narí faiqi namu faqa misasaaqari kambiqainausara faqa andeeqara oosanamau kai fuaqeera fuki faaki ianifeera rusandeesamummasee maraqiafana. Misa miqi faqa qinee qima afeekaikiafanna ainainausa aiqama miqimma nisaanaura.

Idi Ufa 82:2

Innee Isaraee maqannaasa manda rakisirausa innee manda koota masaida sia amiqimmasee ufa rainee maria oosanna miqoo taikaaqa. Innee sia manda oosana maree mariasa manda oosana auqaaqeera fadameena akuaqa, miqi mariana taikaaqa.

Aaquqira Ufa 11:1

Sia andeeqara sikeerara foora imariasara Yaawefa fidiaqa midanoo. Mifa andeeqara sikeerara aidifanoo asasidanoo.

Aaquqira Ufa 12:4

Irirana faqaa aanaase afaaqi fannoo mina amooqida asasidanoo. Manda oosana maree mari anaaseefa narí afaaqi asaurirana amisaifanoo amudaani rumafifanoo aurinoora foora inoo maridanoo.

Aaquqira Ufa 16:11

Yaaweefa aiqama sikeerara andeeqara sikeera kai marinaqa aiqama feefauru faqa andeeqarafa kai mariani fee qidanoo.

Aaquqira Ufa 20:7

Andeeqara fasiqa amiqira oosana auqaifaqa mina faiqí namu asasidaqa.

Aaquqira Ufa 31:10

Amiqira anaasee andeeqara irirana faqaa anaasee mararafa kaaqa kadaapi maridanoo. Mina feefauru amiqira oonda faqa uraaqararafa kaaqa firaa feefauru maridanoo.

Aaquqira Ufa 31:29

Moomoo anaasee amiqira ainaina auqee mariasa maridaqa, anee misa narusee uriqararafa mariananoo.

Aaquqira Ufa 31:31

Mifa auqai ainaina akiiqara uriqarara auqu amia. Mifa auqai ainainna fannoo mina auqu uqeerarana amidanoo.

Mataioo 22:16

Miqi qimaseeqa misa nári faiqi namu faqa Eeroodeena aqoondi mariasa faqa moodaanaki Yisufinnai oonu reeqa unna qimasee amiqira aqoondiara foora mafufaqa noori quqasee reendeenamaseeqa maaqi qimasee irammiriqau. Oo ufasaa rakisirafa, anee andeeqara ufa qimarianafa, sia unnufa qimarianafa anee sia moonara amiqira fee qimasee amiqira ufa qimamianafa, sia moonara mandaikira fee qimasee mandufa qimamianafa, aiqamaqara anoona ufa kai qimannimimarianafa andeeqarafa mariananoo.

Mareekoo 6:20

Eeroodeefa Yoohaneenara irirana andeeqara qikairi siai fasiqa fee qimasee minara rufiaseenoo karafusaki seenoo ititasoofanoo sia Eeroodia nammarifa arinau. Eeroodeefa maqee maqee Yoohaneena faqa ufa qiranara aidi marufanoo maqee maqee Yoohaneena aaramasee ufa qimamimarinau. Yoohaneena ufa fannoo Eeroodeefa maqee maqee Yoohaneena faqa ufa qufanoo Yoohaneena ufa fannoo Eeroodeena raquramufanoo aqu ufafa afaaqai ati qanoo marunara siamma irimarinau kaqi maqee maqee Yoohaneena karabusaki marunna aaramasaida ufa narí qimami narí qimami qimariqau.

Ruka 16:15

Yisufa iriseenoo qimanniminau, innee inneeqa kai maqasaa fasiqauqa nifusaa andeeqarausee qimariasa mariafanoo, Anutufa inni naunduraki qafee marifa maqasaa fasiqauqa amiqira ainainee qimarianara Anutufa mandainainee qidanoo.

Ruka 2:25

Moo nauraiqi auqu Simeeoonafa mi aukuanna Yeerusaree maqusai amaana maqaki ainainimarufa maridanoo kaaqa Anutuna ufara rimarufa Isaraee maqannaa asumu maraaninnanara afeesara marinau.

Ruka 23:50

Faiqí moo Arimateea maqusaindaraafa Yeerusareenni animarufa mina auqu Yooseefaafa, sia Yisuna akoofau, mina amarafa.

Yoohanee 7:18

Faiqí moo fannoo narí ufa kai qidanoo narí auqu kai uqeeraidanoo. Faiqí moo fannoo narí aqiqainna fasiqana auqu uqeerararee qimarifa mifa kuqaa ufa qidanoo, sia nikaruqirafa minaki maridanoo.

Roomma 13:13

Maasa faasaanasaa nidara foora aiqamausa nifusaa andeeqarausaikakai mambi mariaqa. Sia mandainaina maraani qimasee moodaanaki suquaqa. Sia nammari namasee furufariaqa, sia faiqí faqa anaasee faqa narinni narinni ummuariaqa. Faiqí faqa anaasee faqa sia narí afaaqa narí afaaqa kooroo iaqa. Sia rakuaqa, sia nariara nariara rairai qiaqa.

Roomma 13:3

Manda oosana maree mariasa kai kaamanna rakisirausara rufiaaqa, amiqira oosana mareemariasa sia misara rufiaaqa. Anee kaamanna fasiqa fee uriqarara fee misa nifusaa mana mana kai iraree fee qidanee doo amana andeeqara oosana marasee miqia. Miqinanoo mifa amooqira ufa kai ani amiannoo.

Roomma 2:29

Sia apatasaafau anoona maridanoo naundura nimuqusakiqari Anutuna ufamau fimariasa misa anoona maridanoo fainanduqirausara foora maridaqa. Sia Mooseena sandufa irirana irirafa mifau Anutuna aiku asauku kamannimaqaidanoofau. Anutuna maraquna naundurai saikisa misa kai Yuda maqannaa uqannara foora Anutuna aiku asauku maridaqa. Miqifandinna fasiqausa sia faiqí nimooqiranafau maraidau, Anutuna amooqiranara ridaqa randasee maraidaqa.

1 Koorinti 4:5

Innee minara irisee sia maasara kasaaqaindari ufa qiaqa. Karaambaiqa innaarunaindari quminna faasaana kai taikara ufa qimannimirafa mariannoo. Mikari karaambaiqa sia ooqai akooqoo mariu irirana kukeeqara irirana oosana oosana irirana minakinaana uqeereeqeenoo aiqamausa nifusaa kooroomannimaqaannoo. Aiqama fasiqa anaasee naundurakinaa oosana auqeefandiannana deedaqirana akooqoo aiqamausa nifusaa mara quqasainaqa qafeefaranoo. Mikari aiqama fasiqa anaasee nári maqasaa andeeqara nirana marirana amana kai Anutuna amooqirana mareefaranoo. Mikari Anutufa maasa saika oosana aiquqummasee minara ufa qiannoo. Maasa mina ufamau fimariafanausa marunnanara innee sia ufannai maasa saika kasaaqaindari aruaqa.

2 Koorinti 13:7

Maasa inniara Anutunara innaaru qidaqa sia inniara mandoosanaki aqufuaqee qidaqa. Sia maasa saika inniki anoonaikianifee qimasaidau innaaruqidaqau, inniara andeeqaramau fuaqee kai qimasee innaaru qimannisaidaqa. Maasa kadiqarana amana, inni andeeqaranara kai iridaqa.

2 Koorinti 6:8

Akaqausa maasara amiqira ufa qidaqa akaqausa manda ufa qidaqa, akaqausa maasara sukufa qidaqa akaqausa qimooqidaqa akaqausa maasara unnufa qidammiafoo qimariafaqa maasa anoona ufa kai qidaqa.

2 Koorinti 8:18

Maasa moo fasiqa faqa mina faqa aqiqaanauranoo mi moo fasiqafa aiqamai Yisuna amiqira fasaasa ufa qimanniminoonufa marunara Yisuna ufara suqimariasa minara amiqira fasiqafee qidaqa.

2 Koorinti 8:21

Maasa irirafa minara maaqimminoo maridanoo. Maasa Karaambaiqa Anutuna afusaa faqa maqasaa fasiqa nifusaa faqa andeeqaramau fidaqa rakisianaura.

Karatia 5:22

Anutuna maraquna fannoo sia miqi maria mandoosanakina uqannifiqaidanoo. Innee mina ufamau fifanoo inni mareeqee amiqira saqari qaqammara foora ireefaranoo. Maa amiqira oosanausa ireefaranoo, nariara nariara uriqarara ainaina maridee qimasee nariara nariara rirana faqa Anutunara asasirana faqa naunduraki asooarana faqa faiqí aanaaseera reendeenira irirana faqa amiqimandee dadaaqi mariana faqa afaarirana faqa amiqira ainaina afaarirana faqa sia minnisee firafa miqookai marida auqainna ainaina auqaida marirana faqa fisoofisoommasee ufa qirana faqa narí mandoosanara akooqamasee andeeqasee fimarina faqa Anutuna maraquna fannoo mi ainainausa kai uqannifiqaidanoo, sia moo sandufa fannoo mi amiqira ainainausara qaoo qiannoo.

Eefeesusa 4:25

Doo minara maaqooqari sia unna ufa kafaa mariani, taikaani, aiqama narinni narinni anoona ufa kai narí qimami narí qimami qiaqa, maasa aiqamausa moodaa nifaaqara foora kai marunnanara naríndi naríndi marunnanara unna ufa sia qiaqa anoona ufa kai qiaqa.

Eefeesusa 5:9

Kaaqa qarafa qafuqakinaa ainaina amiqi amiqifanoo kambiqaidanoo Anutuna kaaqa qaranaki mariasa miqi kai iqa kaaqa qaranaki maridaqa misaki amiqirana faqa andeeqarana faqa anoona ufa qirana faqa misaki kambiqaidanoo.

Eefeesusa 6:14

Minara qimannimidaqa. Innee findifi deedaqida mariaqa Sadannafa inni mandoosana nimisee naruandoora. Roomma maqannaa sundia nifaaqa rafaaqafimariana kikiqususee inniara qianauranoo. Inneeqa fausanda niranaqumuki rumbee maria fara foora mifa inni anoona ufa kai qirafa mifa mariannoo. Inni nimuqusasaa ititee maria afeeka ainainara foora inni andeeqara oosana mariannoo.

Firipi 3:1

Qini ufa taikarafa maaqimminoo maridanoo. Oo qini qikaqaafasaauqa Karaambaiqa asasirana firaana inni nimiani. Ooqai qinee akara rumannimaqaafanna ufanara sia rufiaidaqa mi ufafa inni ititannimaqee mari ufana kafaa qimannimidaqa minara maaqi qianaura.

Kooroosee 4:5

Innee Kooroosee maqannaa Yisuna aiku oosana mariasa innee Yisuna ufara nikoo nikaa imariasa faqa moodaa maqusaki mariafanoo. Innee misa nifusaa reendeenamasee irirana faqaasa naanna ramasee nuaqa. Innee misa faqa maridaqa innee sia fifau nifaurunnai kai ufa qiaqa, Yisunara qimannimiraree qidaqa deedaqammaqaifanoo mariani, iraifaqa dauni qimannimiaqa.

1 Teesaroonika 4:12

Innee Yisuna ufa irimariasa miqi faqa mina ufara nikooqee mariasa inni nimooqiqa andeeqeeaafoo qifaranoo. Innee faqa miqidaqa sia moo ainainara sarauqinana moonasaa oonu mundua.

1 Timooti 3:11

Dadaaqi maria fasiqausa ninaaqmaaka faqa marirana nirana andeeqasee maridaqa sia munuqi miniqi qimariasa marifaranoo. Mi anaaseesa noori runusee maridaqa anoona ufa kai qimariasa mariaqa.

1 Timooti 3:4

Mifa narí faiqí aanaaseera amiqimasee rakisinnimaqee marifa maridanoo. Mi fasiqafa narí faiqi namuara qimannimifaqa eedoo qimasee reendeenamandee auqee marinausa mariaqa.

1 Timooti 4:12

Oo Timooti anee kumaaraa mariananoo minara faiqí anaasee irisee sia ani ufa irifoora maa ufana ani qimamidaqa. Aneenna ufa faqa aneenna nirana faqa aneenna faiqí aanaaseera amuqusirana faqa aneenna Yisuna saqarikirana faqa aneenna andeeqasee marirana faqa amiqimasee andeeqasee akooqoo marinaqa qafeeqa faiqí anaasee Yisuna ufa irimariasa ani afaqaidaqa ani aanna raaqeera.

1 Timooti 5:10

Mi anaaseefa ooqai afaari marufa marinnana mifa kai minaki mariani narí faiqi namu amiqimasee firimaru aanaaseefa marufa mifa kai mariani, aanaamuru dapi aanaamuru amiqimmandee rakisimarufa faqa Anutuna ufa maqusa maqusa nida qimannimimarusa faqa narana maaqa nimimarufa oosana oosana mandainainaki aqufimarusa dadaaqimarufa, oosana oosana amiqira ainaina eedoo qimasaida auqee marufa miqi maru anaasee asooqausa kai rakisirausaikiaqa. (Mi asooqa adeedaanausa saika Timootina aukuana maaqimminoo marinau. Misa fuka anaasee nári nifaaqmaaka faiqi namu rakisiaqeera qimannimidaqa naakapee mariqau. Aaqamaki kaqirunna fusa andeeqeeqeenoo Anutuna aanai ubeekee mariqau. Mandainainaki aqufusa andeeqasee Anutuna ufa naakapee mariqau.)

Titusa 1:8

Yisuna ufa irimariasasaa rakisirausa afaarimariasa faqa kasimariasa faqa mi marirana marinausa kai mariaqa. Misa andeeqaranara kai rimariasa mariaqa. Misa nári naundura faqa nimanara faqa irimarinausa mariaqa. Misa andeeqarausa faqa anukarausa faqa nári marirana andeeqasee marifaqa mariaqa.

Titusa 2:14

Mifa maasa kuqirana nariara maraseenoo maasa sia maraaqeera maasa kuqiranaki mifa keeqanau. Sia fifaufau kuqinau. Maasa qeeqa mandainainakinaana mareeqeenoo maqee kamuqoo narí kaaqa qara andeeqara fasiqa anaasee kammannimaqaaneera kuqinau. Maasa minaindikuqanna iaqeera, maqee maria kamuqoo amiqira ainaina kai maasa aruqarara rimariasaikamma fuaqeera kuqinau.

Titusa 2:2

Faiqí firaasa maaqi qimasee qimannimia. Irirana faqaasa mariaqa, noori kandamasee mariaqa nári naundura nimanara oonumafi irimarinausa mariaqa. Nári Yisuna saqarikiranasaa mundufi mariaqa. Nariara nariara uriqarara ainainee qimasee nimuqusirafa mariani. Sia tipuqi mariasa naanna ramasee mariaqa reendeenamandee ubiqasee mariasa naanna raqa mariaqa.

Titusa 2:7

Anee aneennara faqa aiqama ainaina amiqimmandee marinaqa misa ani qafeeqa miqimandee mariaqa. Anee kuqaa uqanna oori runusee maridana misa naakapamasee qimannimia.

Titusa 3:14

Maasa niqoondi Kareetee maqannaauqa sia nisauku raqandaamasee mariaqeera naamuaqiaqa. Misa maqee maqee maqasaa anoona ainainirana kasi kasida niqoonausa faqa dadaaqi marinanaki maridaqa nári anoona ainaina auqee marianaki faqa maridaqa akaqausa niqoonausa naida nimiaqeera qimannimia. Miqimasainaqa misa saika sia fifau irairaaiani anoona kai kambiqaani.

Heeburu 11:2

Ooqa marusa miqimmi mariqau. Misa Anutunasaa irirana rusiranannai Anutuna eedoo qirafa misaki marinau.

Heeburu 13:18

Innee maasara maqee maqee innaaru qiaqa. Maasa qimana sia moo ainainara iridaqa andeeqaraqoo kai firanara ridaqa inni qimannimidaqa. Innee minara maasara faqa innaaru qiaqa.

Yameesa 1:27

Maasa qikoofa Anutufa maa qaaramoo ainainausa maraanara kuqaa anoona qini saqarikirausammiafoo qidanoo. Moo oosana fiaiqi faiqi rakisirana faqa moo oosana adeedaana aanaaseeuqa nariqa aupuraranaki mariasa rakisirafa faqa moo oosana maa manda maqa maaqanakina mandoosanauqa qifaaqai aqufuandoo qimasee eerairinafa faqa mi ainainna namuna maree mariasara kuqaa anoona qini saqariki mariasee qidanoo.

Yameesa 3:17

Innaarunaindaraa irirafa indaaruqaafa sia ikairi faifa amiqirafa mifa naaree indaaru doo mina miqooqari asooarana nimirafa faqa fisoo fisooirafa faqa aiqamausara aqoondikirana faqa miqimarifa faiqiara qimudaoo qirafa qumbiqanoo maridanoo mi innaarunaindaraa irirafa mifa amiqira narana unakuseenoo afaaridanoora foora amiqira oosana nimimarifa mifa sia qaara ufa qirafa marifa. Mina marirana faqa sia qaaraikinoo maridanoo. Innaarunaindaraa irirafa miqiminoo maridanoo.

1 Peetooroo 1:22

Maqee innee Anutuna anoona ufa irisee maraafanoo mi ufanannai inni ninukama findaukamaseenoo. Innee inneeqa niqoonausa mi ufana irimariasara kuqaa nimuqusidanoo nidimarifaqa minara kaifaa qinee qimannimidaqa inneeqa nimuqusa ookiqari noori kandamasee nariara nariara nimuqusidanoo nidiani.

1 Peetooroo 2:12

Innee aamina maqannaaki nidaqa maridaqa inneeqa nirana marirana amiqimasee nifaqa misa inniara mandoosana mareemariasee qimasee inni nindafeeqa oo amiqimasee mariasa qimasee misa faqa quandafi Anutuna amooqiqa Yisufa innaarunaindari qumurainaqa amooqifaranoo.

1 Peetooroo 4:8

Aiqama amiqira ainaina urinaaqararafa maafa maridanoo, sia nifaurunnoo kai unna qimasee nariara nariara ruaqa, nisaukunnoo dadaaqirana faqa nimuqusannai faqa nariara nariara ruaqa. Nariara nariara nimuqusirafa moomoo manda oosana rafaaqafidanoo.

2 Peetooroo 3:1

Oo qini qifaaqasaa qiqoondiuqa qinee indaaru pasa akara rumasee inni nimaqaqiafana kaifaa maa maqee inaaqianna akara rumannimaqaidaqa. Aiqama akaraqaraki amiqira ufa inni nitikuraki quqarara nikaru qimaria fasiqausara inni naaqoo auqeeqa ooqeenaana naaquqara tamummaqara fasiqausa ufa qianaqa iriaqeera. Asumu maree marifa maasa karaambaiqa mina aaquqira ufa narí niqiqoo fasiqausannai inni qimannimu aaquqirufana iridaqa sia aunuaqa, irida mariaqa. Minara faqa inni naaqoo auqaida akara ridaqa.

1 Yoohanee 3:18

Qini faiqi namu, maasa nariara nariara uriqarara ainainee qimasee rirana sia afaurunnai kai qia. Asaukunnai anoona ainaina kai narí ami narí ami iranannai kai mina anoona kooroo inoo kambiqaannoo.

1 Yoohanee 3:3

Maqee maria kamuqoo asauku mundirana asasammasee afeesara mariasa minara indee indee idaqa nariqa mandoosana findaukaqa fidaqa.

1 Yoohanee 4:1

Qini qifaaqasaa qiqoondiuqa. Moomoosa náriara Anutuna maraquna maasaki marisee qimariana sia mina irisee aiqamausara kuqaammifoo qiaqa. Innee misa nimanamasee qafaaqa kuqaa Anutuna maraquna fee moona maraquna fee misaki maridanoo fee. Unna qimaria tamummaqarausa aiqamai daraanammiqa marianara qimannimidaqa.