Firipi 2:3 - Anutuna Ufa

³ Sia moo ainaina qimianifee qimasee aundurai oonu mafi irisee aqoonnana oonu dadaaqiaqa. Sia manda fifau nifaaqa mara maree ooru firafa maraanifee qimasee aundurai oonumafi irisee aqoonnana dadaaqiaqa, innee sia miqiaqa, maaqiaqa, narinni narinni reendeenida mariaqa. Sia anee moosara mandaikira fee qimasee aneennara amiqira fee qia. Maqee maqee aqoonausara qini uriqararausee qimasee qinee misa ureeqarausa maridee qiaqa.

Firipi 2:3 Iomraidhean Croise

Aaquqira Ufa 13:10

Narí amoo kai qidanoo mandufa kai uqeeree marifa sia moo ainaina auqaidanoo ummaara kai uqeeraidanoo. Reedeeni mariasa misa irirana nimiaqeera kai iraidaqa.

Ruka 18:14

Yisufa mi fasiqaqandara narí faiqi namu qimanniminoo qinau, ummuarira takisa munnimma maree maruna mandainaina Anutufa taika aisoofanoo andeeqasee finau, Farisai amaana ufa qimarufa sia andeeqanau kaqi finau, nariara uriqararausee qimariasa Anutufa asauriranaki quqaannoo, nariara ureeqararausee qimariasa Anutufa uriqararanaikama nimaqaannoo.

Roomma 12:10

Innee aiqama asauku mundirana mandaaqaqa mariasa minara irisee nariara nariara qikaqaafasaa fee qimasee nariara nariara nifaaqasaa aqoondiara foora nariara nariara andeeqasee ridaqa asasiaqa. Inneeqa niqoonnanara maasa uriqararanee qimasee maqee maqee mina auqu kooroo qia.

Roomma 13:13

Maasa faasaanasaa nidara foora aiqamausa nifusaa andeeqarausaikakai mambi mariaqa. Sia mandainaina maraani qimasee moodaanaki suquaqa. Sia nammari namasee furufariaqa, sia faiqí faqa anaasee faqa narinni narinni ummuariaqa. Faiqí faqa anaasee faqa sia narí afaaqa narí afaaqa kooroo iaqa. Sia rakuaqa, sia nariara nariara rairai qiaqa.

1 Koorinti 15:9

Qinee Yisufa niqiqoo fasiqausakina ureeqarausa maridaqa. Qinee Anutuna ufara suqimariasa aupurarana nimiafanausa marunnanara naqi fee ifaqee misa qiniara Yisufa niqiqoo fasiqafee qida fee, sia qinee misa nimana maridaqa.

1 Koorinti 3:3

Innee maa maqa maaqanasaaqaraasa naanna ree mariasa aaqaida miqimarifanoo, innee nariara nariara rairai qidaqa ufa rainee marianannai maa maqa maaqanasaaqaraasa naanna ree mariana aaqarafa kooroo idanoo.

2 Koorinti 12:20

Qinee inni maqusai oonureeqa moo ainainara rufiaanaura. Inni marirafa sia amiqirafa oorudupirafa mariandoora qinee qidaqa. Koorinti maqannaasa innee qiniara mookamaseenoo qiqa qimiifoo qifoora anee sia reendeenamandee maasa qimaqiminnaranoo aanoommasee maasa qimaqimiifoo, qifoora. Qinee inni maqusai oonureeqa maa ainainausara rufiaidaqa, ufa rainarafa aanooqirafa mariandoora nariara nariara rairaiqifoora nariara nariara idara foora qeefoora, kaaqa ainainara rimariasa narifoora, nariara nariara mandufa qifoora munuqi miniqira ufa qifoora narí nuqu uqeerasee nimooqifoora dapi dapi qifoora.

Karatia 5:15

Innee aandaura foora narí aidafirana narí aidafirana narí ukaqami narí ukaqami irana narí ami narí ami idaqa rufiaaqa qusaasa innee narinni narinni naru taikaseefaara, minara nariara nariara nidiranara qidaqa.

Karatia 5:26

Sia maasa qeeqara doori uqeeraseeqa amiqirausee qimasee qeeqa qimooqia sia nariara nariara sukufa qia sia nariara nariara rairai qiaqa.

Eefeesusa 4:2

Sia Anutufa quqaqoo andeeqarana minnisee moomau fuaqa, innee maqee maqee sia urinaaqaraaqa oorudupimasee mariaqa, sia aanooiaqa, ireeda kai pisoopisoomandee mariaqa sia faiqí aanaaseera qusa ufa qimasee aanooiaqa kisaaqasaa ireeda kai idaaqammannimaqaaqa. Innee faiqí aanaaseera nimuqusinanoo nidimarinaqa mifa kooroo ianifee qimasee narinni narinni dadaaqifanoo mifa kooroo iani.

Eefeesusa 5:21

Innee asauku mundiranara naaquqee marinara nariara nariara ureeqafi maridaqa reendeena mandee mariaqa.

Firipi 2:14

Innee maa maqa maaqanaki eendaandirausa faqa aaqee mariasa faqa qambaana mariafanoo Anutuna andeeqara faiqi namu qikairi siaisa anukarausa mariaqeera qidaqa innee aiqama ainainirana idaqa sia nikoo nikaa idaqa ninunuridaqa raiqaaqa, miqidaqa sia Anutuna andeeqara faiqi namu marifaranoo. Kaqi eedoo qimasee kadaapirirana maraaqa. Innee mi eendaandira fasiqa anaaseesaki maridaqa inni andeeqara nirana marirana fasau innaarunaki eendaki qeemarindee idaqa kaaqa qaida maridaqa naaru naaru marira fasaasa ufa qimannimiaqa. Innee miqida marifanoo asauku mundirafa qumuaninna faasaana qinee inniara qini saika anoonaiki ifoo qimasee asasianaura qini kadaapi faqa tooqaamu faqa sia fifau irairaainoo mariannoo anoonaikinaqa asasianaura.

Kooroosee 3:12

Innee Asauku mundiranara karaambaiqee qimariasa. Anutufa innee rusandeesamumaseenoo narí andeeqara marira iriranaki quqanniseenoo inniara rakisidanoo amuqusidanoo. Anutufa miqimarinaqa innee maa reendeenira marira ufana kaqi maraaqa. Nariara nariara qimudaoo qiaqa. Ufa qirana faqa nirana faqa ireeda kai qimannimiaqa. Fisoo fisoo imariasa naannaraqa mariaqa. Reendeenamafi ubiqasee mariasa naannaraqa mariaqa.

Kooroosee 3:8

Doo maqee afaimma quqaaqa. Maa ainainausa faqa afaimma quqaaqa. Aanooqirana faqa kaukaataqirana faqa aqoonausa nifasaasa qirana faqa aqoonausa niquramaara rirana faqa maqee maqee faiqí fannoo aanaaseera amarauqirana faqa anaasee fannoo faiqiara amarauqirana faqa unna ufa qimasaida narí afasaasa narí afasaasa qira ufa faqa mi ufausa aiqama afaimma quqaaqa.

1 Timooti 6:4

Miqi qimari fasiqafa narí manda irirananai kaaqa kaqikaa ufa oosana oosana ufara fifau rainaidanoo tinoo taanoo ridanoo. Miqira oosana fannoo faiqí aanaaseekina nariara nariara rairaiqirafa uqeeraidanoo ufa rukiarana faqa naraqi naraqira ufa faqa nariara nariara mandirirana irimariana faqa maqee maqee tinoori maria ufa rainee mariana faqa uqeeraidanoo.

1 Peetooroo 3:8

Mi ufana atisaa maaqimminoo marifaqa qimannimianaura. Innee Yisuna ufa irimariasa aiqama ainainara moodaa irirafa mariani aiqamausa moodaanaki kai nimuqusa quandaaqa. Innee nariara nariara nikaqaafasaara foora nimuqusidaqa aiqamausa nariara nariara ruaqa. Innee nariara nariara fifimmasee reendeenamasee miqidaqa nariara nariara qimudaoo qimasee narí dadaaqi narí dadaaqiaqa.

1 Peetooroo 5:5

Miqi kai iqa innee kumaaraauqa faqa inneeqa faiqí firaasa nimeemaanai miqi kai masee ureeaqa mariaqa. Innee aiqamausa oorudupi oorudupimafinaqa qamunnara foora afisusee mariaqa. Tamummaqarausa akara minara maaqi qidanoo. Anutufa faiqí anaasee nári nuqu uqeeree mariasa rafaaqafidanoo fifimariasa adiafaairana faqa amiqirana faqa nimidanoo.