1 Yoohanee 4:9 - Anutuna Ufa

⁹ Anutufa narí amuqusira oosana maasa uqaqifiqeenoo. Mifa narí amaaku moodaa faiqi maa maqa maaqanaki aqiqamasoofanoo maasara kaqi marirana mina Yisunannai maraaqee qimasee aqiqoofanoo quminau.

1 Yoohanee 4:9 Iomraidhean Croise

Oosana 22:2

Aneenna amaaku Isakeena ani amaaku moodaa, kaaqa amuqusa imariannana afiqeenana Mooria maqa maaqai ooru rainaqa qinee aaqana moo uqafiqaanaura. Anee mi aaqannanasaa aneenna amaaku arusee qini tatufirana suqa qimia.

Idi Ufa 2:7

Maqasaa karaambaiqa maaqi qinau, qinee Yaaweefa qima qimu ufana kooroo ianauree qinau. Mifa qiniara maaqi qinau. Anee qini qimaaku mariananoo maqee faasaana ani akausaikammiqa.

Mareekoo 12:6

Mi fasiqana ainainira faiqiuqa doo taikasoofanoo narí amaaku uqanna doo moodaa narí amuqusimarufa mifa kai kaqi marinau. Ququsa akoofa maaqi qinau misa qini qimaakuara iriseeqa rufiasee koofi amifaranoo qimaseenoo mina aqiqanau.

Ruka 4:18

Karaambaiqa maraquna fannoo qini daakinoo maridanoo, mifa kudi fasiqauqa amiqira fasaasa ufa qimannimiannee qimasee asauku qinisaa mundinau, rumbaqa mariasa idukuaki fuaqeera qini diqiqanau, nifu dimbarausa faqa nifu maqannisaaneera faqa qini diqiqanau, moo maqannaasa ani mara moo maqannaasa aupurarana nimimariana minakinaana idukuaneera faqa qini diqiqanau, karaambaiqa narí maqannaasa mandainainakinaasa maraaninna aukuanara qimannimirara qini diqiqaifaqa ani maridaqa.

Yoohanee 10:10

Qummuarimari fasiqafa qummuaramasaina taikaanifeera fifau faafau qummuarianifeera faqa kuqannaruanifeera faqa kuridi nimaqaanifeera faqa aniannoo. Qinee faiqí anaasee asumu marirana nimianeera anidaqa. Sia kaqi dapi mariranarau qidau. Asumu marirana amiqirana moo faqa moo faqa rairaairana nimirara mina kai nimiraree qimasee qumidaqa.

Yoohanee 14:6

Yisufa iriseenoo maaqi qimaseenoo qimaminoo qinau, qinee mi aanausa maridaqa. Qinee kuqaa anoona ufa maridaqa. Naaru naaru marirafa qiniki maridanoo qinee misa maridaqa. Sia moo fannoo kaqi qini qikoofinnai fidanoo qinimau kai fifaranoo.

Yoohanee 3:16

Anutufa maa maqanasaa mariasara amuqusa firaaqoo qunara narí amaaku moodaa uqanna amiqirana maqasaaqaraasa nimuna mina saqarikinausa sia kuridiranaki fifaranoo Anutuna naaru mariranaki fuaqeera narí amaaku niminau.

Yoohanee 3:18

Maqasaa fasiqa anaasee Anutuna faiqi namukinausa mina saqarikinausa Anutuna narirafa sia misasaa maridanoo. Sia Anutuna faiqi namukinausa sia mina saqarikinausa doo ooqai Anutuna narirafa misasaa maridanoo. Misa Anutuna moodaa faiqiara sia misa nári irirana minasaa rusirai Anutuna narirafa minarakai doo misasaa maridanoo.

Yoohanee 5:23

Aiqamausa qini qikoona Anutunara naaquqaanifeera miqinau. Qiniara naaquqaindee kai iqa qini qikoonara naaquqaanifeera miqinau. Faiqí moo fannoo moona amaaku sia mina aqoondikinafa mina akoona faqa miqikai inana miqanda qisakoosa sia niqoondikinnaranoo.

Yoohanee 6:29

Yisufa iriseenoo maaqi qimasee qimanniminau. Innee maaqimasee Anutuna ainainamaisaaqa. Narí aqiqainna fasiqana mina saqarikiqa minasaa naundura rusiaqa. Anutuna ainainirafa miqimminoo maridanoo.

Yoohanee 6:51

Qinee kaqi marira feemu innaarunaindari qumu marunausa maridaqa. Faiqí anaasee moo fannoo qinee amianna feemuna namasainafa naaru naaru mariannoo. Qinee nimianna feemufa qini qimaqi maridanoo. Maa maqa maaqana afaaqasasa mariasa kaqi mariaqeera nimidaqa.

Yoohanee 6:57

Qini qikoofa Anutufa kaqi marira oosana faqaafa qini diqiqoofaqa maaqoo maridaqa minasaaqaraa marirana maraidaqa. Miqi kai inoo qini namasainafa qinisaaqaraa marirana maraannoo.

Yoohanee 8:29

Qini diqiqoofa qini faqa maridanoo. Qinee mina aidira oosanamau kai fidaqa minara sia minniqisaifaqau qeeqaraafau maridaqau. Mifa qini faqa maridanoo.

Yoohanee 8:42

Yisufa misa ufa iriseenoo maaqi qimasee qimanniminau. Anutufa inni nikoofa marinaqau kuqaa innee qiniara rini. Qinee Anutufinaindari maaqoo qumumaridaqa. Qinee sia qeeqafau qumiqau mifa diqiqoofaqa qumiqiafana.

Yoohanee 9:3

Yisufa iriseenoo qimanniminoo qinau. Sia narí anoona akoonasaa qaraanau, sia narindisaafau afu dimbanoo maridanoofau. Anutuna afeeka kasirana qinikiqari kooroo ianifeera mina afu dimbanoo maridanoo.

Roomma 8:32

Anutufa sia narí amaakuara irinau kaqi maasara qimudaoo qimasee kuqiranaki quqanau. Mifa narí amaaku uqanna ririmma kaqi qiminau nana ainainee moo ainaina sia qimiannoo, aiqama ainaina kaqi afaarida qimiannoo.

Heeburu 1:5

Anutufa maaqi qimasee narí amaakuara qinau. Anee qini qimaaku mariananoo. Maqee qinee ani akausaikiqa maridaqa. Anutufa sia qangiroora mi ufana qinau narí amaakuara kai miqi qinau. Anutufa narí amaakuara moo ufa maaqi qimasee qinau. Qinee mina akausa marianaura. Mifa qini qimaaku uqanna mariannoo. Sia qangiroorau miqi qinoofau narí amaaku Yisunara kai miqi qinau.

1 Yoohanee 3:16

Maasa nariara nariara uriqarara ainainee qimasee nimuqusira oosana maaqimminoo maridanoo. Asauku mundirafa maasara amuqusidanoo narí marirana maasara aunirira saqarisaa quqasee kuqinau. Doo maasa faqa miqi kai iqa maasa qeeqa qikaqaafasaa Yisuna ufa irimariasa mina ufasaara kuqiranaki firariafaqa maasa misa rafaaqafunnimaqasee kaqi mariaqee qimasee misa nimaaqa maqasee kuquanaura.

1 Yoohanee 4:10

Andeeqara amuqusirana anoona maaqimminoo maridanoo. Sia maasa Anutunara uriqarara ainaina fee qimasee rimariqiafana. Anutufa naaree maasara amuqusufanoo narí amaaku aqiqeenoo minannai maasa mandainaina akiaqara dariraree quna mina mara aquanifeera aqiqoofanoo quminau.

1 Yoohanee 4:16

Anutufa maasara amuqusirana maasa qeeqa minara iridaqa kuqaa fee qimasee minasaa mundidaqa. Anutufa nimuqusirana anoona marinara yafa yafee nariara nariara andeeqara amuqusiranaki marifa mifa Anutunaki faqa marifa maridanoo, kaifaa Anutufa minaki maridanoo.

1 Yoohanee 5:11

Anutufa narí amaakuara qu ufafa maaqimminoo maridanoo Anutufa naaru naaru kuqaa marirana maasa qiminau, mi marirafa maasaindi mina amaakuki marifa maridanoo.

1 Yoohanee 5:13

Innee Anutuna amaakuara irirana rusimariasa innee doo naaru marirana doo maree fee qiaqeera maa ufana akara rumannimaqaidaqa.