1 Yoohanee 3:2 - Anutuna Ufa

² Qini qifaaqasaa qiqoondiuqa, maqee maria aukuana Anutuna faiqi namu maridaqa. Kasooqaqee innaarunai mina faiqi namu maridaqa nana amiqira ainaina fee moo faqa ootupamma qimiannoo fee maasa sia minara iridaqa sia akooqoo maridanoo. Moodaa ainaina kai maasa iridaqa. Asauku mundirafa innaarunaindari koorooinaqa maasa mifara foora marianaura. Maasa mina narí uqanna raquramisee qafamasee minara narí fooqaanaikammianaura.

1 Yoohanee 3:2 Iomraidhean Croise

Idi Ufa 16:11

Anee kisaaqasaa maa maqanasaa marira aana qini uqafiqeennaranoo. Ani afusaa marunafa asasirana qumbiqa qimaqaidanoo. Mifa naaru naaru marira asasirana qimidanoo.

Idi Ufa 17:15

Qinee sia aaqara ainaina auqaunnanara qinee ani qafaanaura. Qinee faiqaqee iinaqa findi fuananoo ani afusaa marira oosana fannoo qini asasirana qumbiqa qimiannoo.

Idi Ufa 31:19

Ani ameemaanai maridaqa ani ufa mau fimariasa afeedamma nimaqaqaanna ainainausa kaaqa amiqirafa maridanoo. Anee firaaqoo amiqimma nimaqee mariannanara aiqamausa iridaqa. Ani saqariki mariasa anee firaaqoo rakisi nimaqaidana itita nimaqee mariananoo.

Mataioo 5:8

Anaaqi faiqiara foora nisakadiki sia ikairi marisa misa uqanna anoona asasiranaki maridaqa. Anutufa narí oori faqa narí marirana faqa uqannifiqaaninnanara asasidaqa.

Ruka 17:30

Qinee faiqí nimaaku qumira faasaana maqasaa fasiqa anaasee mi furufara irirana maree marifaqa tautumasee qumuanaura.

Ruka 20:36

Misa faiqí nifaaqa faqa anaasee nifaaqa faqa taikaseenoo qangiroora fooqaasa indaaqirausa maridaqa kuqiranakiqari findifi mariasa marianara Anutuna amaakuqmara maridaqa.

Yoohanee 1:12

Akaqausa asasammasee maroosa Anutuna ufa Yisufa misara innee Anutuna faiqi kamambi mariaqee qira ufa niminau. Minara kuqaa Anutunee qimasee naundura amimarusa mina faiqi kamambi mariaqee qira ufa niminau.

Yoohanee 17:24

Yisufa kaqi narí akoonara innaaru qidanoo qinau. Oo qipoo, maa qini faiqi namu anee qimunausa kasooqaqee qini faqa mariaqoo kai mariaqeera didifaqa innaaru qidaqa. Ooqai maa maqa maaqana sia maru aukuanna anee qiniara aidunara anee qifaaqa areenara eeraarirana qimunnana qini faiqi namu kasooqaqee mari iqa oorureeqa qafaaqeera innaaru qidaqa.

Roomma 8:16

Anutuna maraquna fannoo aniree maasa qeeqa maraquna minasaa ootupamasaannanara maasa maraquna qimamida maaqi qidanoo innee Anutuna faiqi namu mariafanoo fee qidanoo.

Roomma 8:18

Maqee mari aukuana Yisuna kuqu aupurarana dadaaqi marainafa faqa maasa oosana oosana ummaara marainnana faqa kaqikaafa maridanoo, kasooqaqee innaarunai narí areenarana naida qimianinafa qafaananoo firaafa uqanna mariannoo sia maqee aupuraranara qianaura fifau ainainara foora maridanoo.

Roomma 8:19

Anutufa auqu quqoo ainainausa innaarunaindaraana faqa maqasaaqaraana faqa mi ainainausa aiqama moodaanaki kaaqa aupurarana maraidaqa Anutuna faiqi namu faiqí faiqi misa kuqiranakiqari findifiranara afeesidaqa. Misa kaaqa firaaqoo minara afeesida maridaqa. Maasa Anutuna faiqi namu saimbaqa putaa iranakiqari idukuaqee qimasee kaaqa afeesidaqa.

Roomma 8:29

Anutufa faiqí faiqikinaana rusandeesamumandee maroosa sia fifaufau maranau. Misa narí amaaku Yisunaikamambi mifara foora mariaqeera misa rusandeesamumasee mareeqeenoo utaaqama nimaqasoofaqa mariqau. Miqimasainanoo Anutuna amaaku fannoo moomoosa maqasaaqaraasa mina akaqaafasaara foora maridaqa mifa misa ooqu faiqí nifasaafara foora mafinoo marianifeera utaaqamma amaqanau.

1 Koorinti 13:12

(Pauroofa maru aukuanna manda tanuka kai marinau. Mi manda tanukana kikiqusidanoo maa ufana qinau.) Maasa tanukaki qeeqa doori qafaidaqa sia amiqimmandee qeeqa qimana qafaidaqa. Maasa maqee qafee marunafa miqirana ati kai qafaidaqa, Yisufa quminna aukuana maasa mina faqa narí oori narí oori andeeqasee qafaanaura. Maqee marunna irirafa ati kai maridanoo, Yisufa quminna aukuana maasa irirafa anoona mariannoo. Miqoo maasa irirafa Anutufa maasara amiqimasee irindee kai inoo anoona irirafa maasaki faqa mariannoo.

1 Koorinti 15:49

Maqee maasa maqannai auqira fasiqa afaaqa afisiqa moodaa karammiqa maridaqa kasooqaqee maasa miqikai masee innaarunaindaraa fasiqa afaaqa afisusee miqi kai iqa moodaa karakaimmianaura.

1 Koorinti 2:9

Ooqai tamummaqara fasiqa minara maaqi qimasee akara rinau. Faiqí sia qafee maru ainainnara sia iri maru ainainara sia faiqí moo fannoo minara kambiqaannoo fee qimaru ainainnara, miqira ainaina kai Anutufa deedaqammaseenoo nariara rimariasa kai nimiannoo.

2 Koorinti 3:18

Doo maasa aiqamausa doorisaa qamunna rafaqaa irausara foora maridaqa karaambaiqa kaaqa qareenarafa innisaimbaqa doorisaara foora kaaqa qameeqeenoo aiqamai daroo daraa idanoo. Innisaimbaqa miqimammaree fidaqa Anutuna maraquna fannoo innisaimbaqa karaambaiqa fooqaanaikamma qimaqanoo fidanoo fimarifanoo innisaimbaqa areenarafa firaanaikinoo fidanoo. Karaambaiqa Anutuna maraquna saika maridanoo.

2 Koorinti 4:17

Kuqaa maasa maqee marunnanaki ufaasu unmaara darirafa maridanoo doo mifa kai firaa areenarana naaru marira areenarana sia amaniaqaairana doo kaaqa firaatia qimiannoo.

Karatia 3:26

Innee aiqama Yisuna saqarikiranannai asauku mundiranaki keeqafi marianara Anutuna amaaku kamambi marianara innee inneeqa nammari maroonannai innee asauku mundirana andeeqara marirana qamunnara foora akumaree minaki fuaqa.

Karatia 4:6

Anutufa inniara mina amaaku fee qiaqeera qimaseenoo narí amaaku maraquna inni nimuqusaki aqiqoofanoo keeqafi maridanoo, mi maraqunafa inni dadaaqifaqa innee faiqi aanaaqiara fooqaana Anutunara qini qikoo fee qimariafanoo.

Firipi 3:21

Mifa miqoo maasa ummooqukira maqasaaqaraa qifaaqa mareeqeenoo quandaseenoo narí kaaqa areenara afaaqa fooqaanaikammiannoo. Mifa aiqama ainaina mareeqeenoo narí aramandunnai quqara afeekannai maasa maqasaa qifaaqa mara quandaqisaannoo.

Kooroosee 3:4

Inni marirafa Yisunasaa mundinoo marifanoo minaindi fannoo Anutunasaa mundinoo maridanoo. Asauku mundirafa innee maa maqanasaa anoona marirafa faqa marianara mifa narí kooroomasainaqa innee mina namufaqa ooru raifanoo narí afeeka kaaqa qara areenarana naida nimiannoo.

Heeburu 9:28

Yisufa mi mau kai finoo moomoosa numoo maraqunnisaanifeera narí afaaqa tatufirafara foora moodaannai Anutuna aru aminau. Mifa kafaa koorooiannoo. Sia kafaa numoo undarau qumuannoofau. Narí afeesara mariasara qumuree mareeqee asumu mariranaki quqannisarara qumuannoo.

2 Peetooroo 1:4

Mi innaarunaindaraa afeekanannai narí kaaqa idaaqira amiqi amiqirana narí qima afeekaikammaqoona maasa qiminau. Mifa qima afeekaikammaqoo kaaqa amiqira ainainannai maasa maa maqanasaa mariafanna mandainainara fanandirana faqa putaairana faqa qima afeekaikammaqoo afeekana mara mareeqa fi ruqiqaki fidaqa Anutuna aunduraindaraa irirana andeeqara mariranaki mariraree qidaqa miqidaqa.

1 Yoohanee 2:28

Oo qini faiqinamu Yisunaki mariafanoo kaqi minaki kai mariaqa. Miqi marifanoo narí innaarunaindari quminaqa sia innee nisaurusee kukeeqaaqa kaqi nifaaqa quqasee qafaaqa.

1 Yoohanee 2:7

Qini qifaaqasaa qiqoondiuqa. Maa ufana sia fuka ufa maridanoo innee oosanaindari iri maria ufafa maridanoo. Ooqeenaa ufa irimariafa maridanoo.

1 Yoohanee 3:1

Innee qafaaqa maasa qikoofa Anutufa firaaqoo maasara amuqusifanoo rimarifa maridanoo. Maasara firaaqoo amuqusifanoo maasara narí faiqi namu fee qidanoo. Maa maqa maaqanasaaqaraasa Anutunara sia irunnanara mina faiqi namu maasara faqa sia iridaqa.

1 Yoohanee 3:10

Doo qinee maqee Anutuna faiqi namufaqa Sadannana faiqi namufaqa akooroomasee qimannimidaqa. Faiqí anaasee moo fannoo sia andeeqara qoo nimarifa sia Anutuna faiqi maridanoo, narí akaqaafasaara faqa sia uriqarara ainainee qimaseenoo minara sia amuqusimarifa mifa sia Anutuna faiqi maridanoo.

1 Yoohanee 3:21

Maasa qimuqusirafa sia darinaqa Anutuna afusaa paasoosammianaura.

1 Yoohanee 5:1

Yafa yafee Yisunara Anutuna asauku mundira fee qinafa mifa Anutuna faiqi mariannoo. Moo fannoo akoonara rinafa mifa mi fasiqana faiqiara faqa ruannoo.

Uqafiqoo Ufafa 22:4

Misa mina oori qafeefaranoo misa niqinaaqa mina auqu akara rinoo mariannoo.