Yona 2:6 - Baibuli I Leb Kumam 2013

⁶ Adonyo piny paka i dud moru, i kabedo kame kogoo ekeko me erute mere atwal; do in, Okwe Rwot Rubanga na, iko wota ki kakatut di akuo.

Yona 2:6 Iomraidhean Croise

Yobu 33:24

di en eko bedo kede kisa but dano nono, eko waco be, ‘Lake kur edony piny i ates; ango atieko udo gi me timo cul pi kuo mere;

Yobu 33:28

En etieko lako kuo na likame abino donyo i ates, do abino meede bedo kuo.’

Sabuli 104:6

In iume kede pii atut bala egoe, pii oko cungo ikumemei kalamo wi mori.

Sabuli 104:8

Gin kimol malo i wi mori, kiko mol piny i aditoto, kabedo kame in iiko negi.

Sabuli 116:3

To oudo ociko owic mere oluka; lito me kabedo me jo oto oudo otuno na; oudo aneno can di atie kede par atek.

Sabuli 143:7

Okwe Rwot, gam kwac na awakawaka; cunya okwanyere. Kur ikan na wangi, ka li, ango abino bedo cal bala jo kame donyo piny i ates.

Sabuli 16:10

Pien in likame ibino jala i kabedo me jo oto, arabo weko dano nin kame geni donyo i kabedo me jo oto.

Sabuli 18:5

oudo amoko i bwoi me kabedo me jo oto; oudo ariamo kede owic me to.

Sabuli 30:3

Okwe Rwot, in ilako kuo na ki kabedo me jo oto, idwoka i kuo kikom jo kame oudo tie donyo i bur atut me to.

Sabuli 30:9

“Bero nyo kame in itwero udo ki to nango, ka ango adonyo piny i bur me to? Iparo be apua me lobo bino paki, arabo tatamo be in igenere?

Sabuli 55:23

Do in Rwot, ibino uco gi piny i bur atut wiriwir; jo kame onyo remo me jo kede joangalo likame bino tieko dul me kare me kuo gi. Do ango gira abino keto gen na i komi.

Sabuli 65:6

In iketo mori kede teko ni; in itie kede twer.

Sabuli 69:2

Atie lwiny i cwoto atut, kakame kacungo li kiye; atieko tuno i pii atut, pii amol do dipere beo i wia.

Isaya 38:10

Ango oudo ako paro be kom i diere me mwakini me kuo na en kame oudo atie to iye; ango oudo atie ot bedo i kabedo me jo oto pi kare kodong me kuo na dedede.

Isaya 38:17

Ateteni cwercuny atek kame oudo ango atie kede oudo tie pi kelo nango bero; in pi amara ni ilako kuo nango ki to, pien itieko sasiro dub nango dedede.

Isaya 40:12

Benyo, tie dano moro kotieko pimo rom me pii me nam kede cinge, arabo kotieko pimo rom me idoun kede cinge? Benyo, tie dano moro kotieko coko asinge me wi lobo i gipim, arabo kotieko pimo peko me mori kede me imukuran i misani?

Esekeri 26:20

Abino cwani i kabedo me jo oto pi ot bedo kede jo ariki sek kede bomban me asonya kame bin kodudubo. Pi manono likame doko jo bino bedo i yi in, doko da likame in ibino bedo i lobo me jo akuo.

Esekeri 31:14

Manoni bino timere tetekeny kur bobo yat moro dong bor bala manono, arabo emi wie tun i idoun, akadi bed bala etie kede twon pii i dude piny. Gin dedede miero kitoi bala jo, di kiko ot i lobo me jo oto karacel kede jo kame tie ot kunono.”

Abakuk 3:10

Mori bin oneni di kiko yangere; twon pii oko bwote ki idoun. Pii me nam oko mor, di ebuka gi oko tingere malo.

Abakuk 3:6

Ka en ecungo, lobo yangere; ka en engoloro jo, kom atekerin miel. Mori kobedo tie cako riki sek ko bebelun; imukuran koudo tie cako i kare kasek ko lwiny piny, i yote kame en bin elubo i kare kasek.

Matayo 16:18

Nataman awaco ni be, in en Petero. Ango abino gero ekodet me jo koyei ango i wi lela noni, doko akadi twer me to likame bino twero bwone.

Iswilia 32:22

Gero na bino bedo cal bala mac aliel, ebino wango jame dedede atie i wi lobo; ebino tuno piny i kabedo me jo oto, di eko wango kiton agangeta me acakini me dud mori.