Yokana 14:12 - Baibuli I Leb Kumam 2013

¹² “Ateteni, ateteni awaco ne wu be, ngat kame yei ango ebino eda timo tice kame ango atimo; doko en ebino timo tice kame dongodongo kalamo mago, piento ango ayaro ot but Papa na.

Yokana 14:12 Iomraidhean Croise

Matayo 21:21

Yesu oko dwoko ne gi be, “Ateteni awaco ne wu be, ka itienu kede yei abongo gung i cunyu, likame ibinunu timo gikame kotimo ne yat noni kenekene, do akadi iwacenu moru ni be, ‘Putere iot ipoti i nam’, ebino timere da.

Marako 11:13

Di pwodi etie tenge, en eko neno yat epigi kame pote oumo, eko ot kuno pi neno ka oudo etwero udo anyakini mogo iye. Do kakame etuno kede i dude, en eko udo yat nono di tie kede pote kenekene, pien kare me nyak gi oudo pwodi likame otuno.

Marako 16:17

Jo kame yei kobino mino gi akarunikin me timo gianena bala magi: kibino riamo jwogi i nyinga, kibino yamo i leb anyen,

Yokana 14:28

Pien wun itiekunu winyo di ango awaco ne wu be, ‘Ango atie ot, do abino dwogo butu.’ Ka koto oudo imaranu, koto nan wun itienu kilel pi kite kame ango atie ot kede but Papa; pien Papa dwong loa.

Yokana 16:7

Bed bala kamano da, atie waco ne wu kop me ateni be, eber ne wu ka ango aoto; pien ka likame aoto, Ngakony likame oyaro bino butu, do ka ango aoto, abino cwane butu.

Yokana 4:37

Kop kame waco be, ‘Ngat acel cuo di ngat ace ko kac,’ tie kop me ateni.

Yokana 5:20

Pien Papa maro Wod, bobo enyuto ne gi dedede kame en kikome etie timo. Doko da ebino nyuto ne tice adongodongo kalamo magi, di wun ikounu bino uro.

Yokana 7:33

Yesu oko waco be, “Abino medo bedo kede wu pi kare moro acecek, di do ako ot but ngat kame oora.

Yokana 7:39

Yesu bin owaco kop noni i kom Tipo Kacil kame jo kame yei en bino udo. I kare nono oudo pwodi likame komio Tipo Kacil, pien oudo pwodi likame komio Yesu deyo.

Tice 10:46

Pien oudo kiwinyo di jo nogo tie yamo i leb anyen, di kimio dwongo but Rubanga.

Tice 16:18

Etimo kaman pi ceng atot. Do Paulo cunye oko wang, eko lokere but nyako nono di eko waco ne tipo nono be, “Aciki i nying Yesu Kirisito, yai tenge ki kom nyako no.” Esawa nono di tipo nono yai ki kome.

Tice 19:12

omio oudo kotero kiton itambalan kede igoen mege ne jotuwo, di tuwo gi ko cango, doko tipo areco kame tie i kom gi da ko yai.

Tice 2:33

Pi kite kame kotieko kiarao en kede i bad tetu cam ka Rubanga, kede piento en etieko gamo Tipo Kacil kame bin Papa ocikere pire, en eko nan onyo gikame inenunu kede iwinyunu no.

Tice 2:41

Ceng nono, oko batiso jo kame bin owinyo kop mere di kiko yei, di wel me jokirisito ceng nono oko meede kede jo aromo tutumia adek.

Tice 4:16

“Otimunu ne jogi nyo? Pien kitieko timo gianena kame tie kakaler but jo dedede kame bedo Yerusalem, kame wada likame otwerunu dagi.

Tice 4:33

Joor oko mino ijura i kom yaruno ka Rwot Yesu kede twer adwong. Doko kisa ka Rubanga oudo tie kede gin dedede.

Tice 4:4

Do jo atot oko yei ingei winyo kop kame Petero kede Yokana opwonyo, di wel me cuo koyei oko romo bala tutumia kany.

Tice 5:15

Man oko mino jo oko donyo tingo jotuwo kame oudo tie i miere di kikelo pielo i lak yongayo, i pualisin kede i pare tetekeny kame Petero tie beo, amotoko tipo mere bei i kom jo mogo kikom gi.

Tice 6:7

Kop ka Rubanga oko nyai, di wel me jo kame lubo Yesu oko meede kitek i Yerusalem, di josaseredoti atot oko donyo lubo kop me yei.

Tice 8:7

Pien tipo areco bin oko wok tenge kikom jo atot di kidwilao. Jo atot da kame bin tuwo oneko adulion me kom gi kede jo kongwalo oko cango.

Tice 9:34

Di Petero oko waco ne be, “Aenia, Yesu Kirisito ocangi, aso yai malo ipet kabuto ni.” Cucuto nono di en eko yai malo.

Tice 9:40

Do Petero oko cwano gin dedede ooko, di en eko riondiko piny, di eko lego. Ingei ilega, en eko lokere kakame kom ngat oto oudo tie iye, di eko waco be, “Tabisa, yai malo.” Tabisa oko yabo wange. Kakame eneno kede Petero, en eko yai di eko bedo.

Joroma 15:19

i gianena kede i gi me isuur, kede i twer me Tipo ka Rubanga. Manoni en komio atieko tuco ejiri ka Kirisito kakare, cako ki Yerusalem tuno Iluriku.