2 Iyutun 34:3 - Baibuli I Leb Kumam 2013

³ I mwaka me kanyauni me apugan ka Yosia, di pwodi oudo en atin awobi, en eko cako woro Rubanga ka kwaru mere Daudi. Di i mwaka me tomon kiwie are me apugan mere, en eko cako muducaro kabedere me woro caljwogi, cal me rubanga Asera, kede caljwogi apat dedede i Yuda kede i Yerusalem.

2 Iyutun 34:3 Iomraidhean Croise

1 Abakai 13:2

di eko waco kop i kom alutari nono be, “Okwe alutari, alutari, Rwot owaco kop i komi kaman: kobino nywalo i ot ka Daudi atin kame nyinge Yosia. En ebino ngongolo i wii kanoni josaseredoti kame timo tic i ude kame koworo kiye rubangan atie i wi imukuran, gin jo kame dunyo odok angwe kur i wii, di oko bino wango cogere me jo i wii kanoni.”

2 Abakai 10:27

Aso, bin gin kiko nyinyito cal ka Baal di iko rereto tempulo mere di kiko loke edoko coloni tuno tin.

2 Abakai 18:4

En ekwanyo kabedere kame oudo koworo iye rubangan, emumuko ipirin me kide, di eko tongo ereto piny cal me rubanga adako kame oudo kolwongo be Asera. En bin eko tuturo cal me twol kame bin Musa otimo kede nyonyo buronsi, kame bin kocako ne nyinge be Nekusutan. Pien tuno i kare nono jo me Isirael oudo obedo mino giayala me odok angwe kur but twol nono.

2 Abakai 20:5

“Dok cen di iko waco ne Esekia ngapug ka jo na be, ango Rwot Rubanga ka kwaru ni Daudi atieko winyo ilega ni doko atieko neno pigewangi; ango ateteni abino cangi; i ceng me adek in ibino ot i oda.

2 Abakai 23:14

Abaka Yosia omumuko di eko ngingido ipirin me kide kame oudo koworo kede caljwogi, etongo di eko reto piny atekai kame oudo koworo kede rubanga Asera, di eko lunyo pongo cogere me jo kargi.

2 Abakai 23:4

Abaka oko ciko Ngatel me josaseredoti Kilikia, josaseredoti kame lubo tiene, kede jo kame daro dogola me ot ka Rwot, pi kwanyo ooko ki tempulo ka Rwot jamini dedede kame oudo kotimo me woro Baal, rubanga Asera, kede gi dedede kame tie i malo. En eko wango gin ki tenge me Yerusalem, i nget aditot me Kideron di eko mino kotero buru gi Betel.

1 Iyutun 22:5

Pien Daudi oudo obedo kede tam kame waco be, “Woda Sulumani pwodi titidi doko pwodi likame engeo jamini atot, do di ot kame kobino gero ne Rwot miero bed ibus twatwal, di nyinge iruo i wi lobo lung. Pi mano, ango poore atim iik kame make.” Aso, Daudi oko iiko jamini atot twatwal kame mako gedo me ot nono, di pwodi likame eto.

1 Iyutun 28:9

“Aso in woda Sulumani, poore in ingei Rubanga ka papa ni, di iko timo ne tic kede cunyi lung kede tam aber. Pien Rwot ngeo tam me jo dedede doko engeo iik gi kede par gi dedede. Ka in imoe, ibino ude; do ka in ilokere tenge ki bute, en ebino jali atwal.

1 Iyutun 29:1

Abaka Daudi oko waco ne ekodet lung kocokere be, “Woda Sulumani ngat kame Rubanga otieko yero, pwodi titidi doko pwodi likame engeo jamini atot. Aso di tic kame miero en etim dwong twatwal; pien tempulo noni en likame ebino gero pi jo do pi Rwot Rubanga.

2 Iyutun 14:6

En bin eko luko bomban me Yuda kede apama katek i kare me anapakin nono, di yi oko bedo li i mwakini nogo, pien Rwot oudo omie anapakin.

2 Iyutun 15:2

di en eko ot pi riamo kede Abaka Asa. En eko waco ne be, “Abaka Asa, winy gikame atie waco, karacel kede wun dedede jo me ekeko ka Yuda kede me ka Benjamin! Rwot bedo tie kede wu ka wuda itienu kede en. Ka imoenu ibinunu ude, do ka iwekenu eda ebino weko wu.

2 Iyutun 30:14

Gin kiko cako tic di kiko kwanyo alutarin apat dedede kede alutarin kame oudo koyalo iye odok angwe kur kame oudo tie Yerusalem, di kiko ot uco gi i Aditot me Kideron.

2 Iyutun 33:15

En ekwanyo tenge ki tempulo rubangan me kumbor kede caljwogi kame en oudo eketo iye, kede alutarin dedede me woro caljwogi kame en oudo egero i wi moru kame tempulo tie iye kede i kabedere apat me Yerusalem. En etero gi nogi dedede ooko me bomba di eko uco gi tenge.

2 Iyutun 33:17

Jo pwodi oko meede kede mino giayala i kabedere ace apapat, do kenekene gin oudo kimio gi do but Rwot Rubanga gi.

2 Iyutun 33:22

En eko timo gikarac i nyim Rwot, bala papa mere Manase. Amon obedo mino giayala but caljwogi dedede kame bin papa mere woro.

2 Iyutun 34:33

Abaka Yosia bin oko kwanyo tenge caljwogi dedede kame oudo tie i adul me jo Isirael, di eko mino jo dedede kame oudo tie i Isirael odonyo woro Rwot Rubanga gi. Pi kare me kuo mere lung, jo likame oweko woro Rwot, Rubanga ka joakwari gi.

Sabuli 119:9

Epone mene kame dano apwodi dongo adonga karuno gwoko kede kuo mere pi bedo di cil? Ekaruno timo kamanono ka en egwoko kuo mere bala kame cik nin mito.

Sabuli 71:5

Pien in en gen nango, Okwe Rwot, abedo geni cako di ango pwodi eponga.

Yai 34:13

Do wun ibinunu rereto alutarin gin, mumuko ipirin kame gin kiworo kiye rubangan gi, di ikounu totongo cal me rubangan gi.

Agole 20:11

Akadi atin da kongeo kede gikame en etimo; kokaruno ngeno ka en atin aber kame timo gikame opoore.

Agole 8:17

Ango amaro jo kame mara, doko jo kame cane mona wuda.

Ngarab kop 12:1

Yutuno Ngacwec ni di pwodi in eponga, di pwodi kare me peko li otuno, kare kame in ibino waco kede be, “Likame tie gimoro akadi acel kame yomo cunya.”

Jolebi 26:30

Abino dudubo kabedere kame iworunu iye rubangan i wi imukuran, di ako totongo alutarin wu me wango odok angwe kur; abino dodoko liele wu i kom cal me rubangan wu kame korereto piny. Cunya bino dagi wu kitek.

Mika 1:5

Manoni bino timere pi dub me jo Isirael. Ngai komio jo Isirael odubo? Jo me bomba me Samaria en kotero jo Isirael i dub! Kabedo mene en kame koworo kiye caljwogi i Yuda? Mam Yerusalem inonono?

Matayo 6:33

Do geunu ber mono Ajakanut ka Rubanga kede poore mere, di en eko bino mino wu gi nogi dedede.

2 Temeseo 3:15

kede epone kame in itieko ngeno kede iwandik kacil, kame karuno mini rieko kame kelo ni alako pi yei Kirisito Yesu cako di in pwodi atin.