1 Petero 3:7 - Baibuli I Leb Kumam 2013

⁷ Kamanono da, wun cuo, bedunu karacel kede mon wu di iparunu pirgi, di imiunu gi wor bala jo agoro, pien gin kinywako kede wu kuo kobedo giamia ka Rubanga. Manoni bino mino likame gimoro totolo ilega wu.

1 Petero 3:7 Iomraidhean Croise

Yobu 42:8

Pi mano, nataman kwanyunu twonin kanyaare kede romini kanyaare ikounu tero gi but ngatic na Yobu, di ikounu mino gi bala giayala awanga piru. Yobu bino lego piru di ango ako bino gamo kwac mere di likame ako timo ne wu bala kame mitere ne wu. Pien wun likame ikounu yamo kop apoore i koma bala kame ngatic na Yobu otimo.”

Matayo 18:19

“Doko awaco ne wu be, i wi lobo kan, ka jo are kikom wu owinyere i kom gimoro kame gin kikwao, Papa na kame tie i malo bino timo ne gi.

1 Jokorinti 7:3

Icuo poore tieko mit me buto ka dako mere, doko dako da poore timo kamanono ne cware.

Joepeso 3:6

Mung noni en ine be, pi kop me ejiri, jo kalikame Iyudayan otieko doko jo kame nywako winyo ka Rubanga karacel kede Iyudayan, jo me kom acel, doko kinywako cikere acel i Kirisito Yesu.

Joepeso 4:30

Kur imiunu Tipo Kacil ka Rubanga ud wangcuny; piento en nono kame ebedo alama kame moko be ceng me alako wu bino tuno.

Joepeso 5:33

Aso, ngat acelacel kikom wu poore maro dako mere bala kame emaro kede kome kene, doko dako da poore neno be eworo cware.

Joepeso 6:18

Legunu i kare dedede bala kame Tipo telo wu kede i ilega kede kwac acelacel but Rubanga. Pi mano, bedunu di wangu bit di ikanyakinunu i ilega pi jokacil dedede.

Jokolosai 3:19

Cuo, marunu mon wu, doko kur ibedunu ger kede gi.

1 Jotesalonika 4:4

ngat acelacel kikom wu ngei gwoko kome kene iepone kacil kede i yore me wor,

Tito 3:7

tetekeny pi kisa mere wek odok jo kopoore kame bino udo kuo kame bedo nakanaka kame gen wa tie iye.

Iburanian 1:14

Mam imalaikan obedo tipere kame timo tic ka Rubanga, kame en eoro pi timo tic me konyo jo kame bino udo alako?

1 Petero 3:1

Kamanono da, wun mon, iwinyunu cuog wu, tetekeny ka mogo kikom gi likame lubo kop ka Rubanga, kitwero lokere pi iponeso wu abongo wun yamo ne gi kop moro,