Genesis 24:3 - Yn Vible Casherick 1775 1819

³ As ver-yms ort breearrey liorish y Chiarn, Jee niau as thalloo, nagh gow ben da my vac, jeh inneenyn ny Canaaniteyn, nyn mast’ ta mee cummal.

Genesis 24:3 Iomraidhean Croise

1 Corinthianee 7:39

Ta’n ven fo kiangley yn leigh choud as s’bio yn sheshey eck: agh my ta’n dooinney eck geddyn baase, t’ee ec e reamys hene dy ve poost rish quoi-erbee saillee; agh ayns y Chiarn.

Nehemiah 13:25

As hass mee seose nyn ’oï, as hug mee oghsan daue, as doardee mee paart jeu dy ve er nyn mwoalley, as y folt dy ve goit jeu, as hug mee orroo breearrey liorish Jee, gra, Cha der shiu ny inneenyn euish da ny mec ocsyn, ny goaill ny inneenyn oc da ny mec euish, ny diu hene.

Genesis 28:8

As myr honnick Esau nagh by-laik lesh Isaac e ayr inneenyn Chanaan:

Jeremiah 10:11

Myr shoh jir shiu roosyn, Ny jeeghyn nagh ren ny niaughyn ny’n thalloo y chroo, nee ad shen eer cherraghtyn veih’n thalloo, as veih fo ny niaughyn shoh.

2 Reeaghyn 19:15

As ghow Hezekiah padjer kiongoyrt rish y Chiarn, as dooyrt eh, O Hiarn Yee Israel, ta cummal eddyr ny cherubim, she uss yn Jee, eer uss dty-lomarcan, jeh ooilley reeriaghtyn ny hooirey; uss chroo niau as thalloo.

Exodus 34:16

As dy gow uss ny inneenyn ocsyn da ny mec ayd, as dy jed ny inneenyn ocsyn er-shaghryn lurg ny jeeghyn oc hene, as dy der ad er dty vec goll er-shaghryn lurg ny jeeghyn ocsyn.

Nehemiah 9:6

Uss, eer uss dty-lomarcan y Chiarn, uss t’er chroo niau ny niaughyn, marish ooilley ny pooaraghyn oc, yn thalloo as ooilley ny t’ayn, ny faarkaghyn, as ooilley ny t’ayndoo, as t’ou dy choadey ad ooilley, ta sheshaght-flaunyss cur ooashley dhyt.

2 Recortyssyn 2:12

Dooyrt Huram ny-sodjey, Bannit dy row’n Chiarn Jee Israel, t’er chroo niau as thalloo, t’er choyrt da David y ree mac creeney, coamrit lesh keeayll, as tushtey, dy hroggal thie da’n Chiarn, as thie son e reeriaght hene.

Joshua 2:12

Nish er-y-fa shen, ta mee guee erriu, loo-jee dou liorish y Chiarn, fakin dy vel mish er yeeaghyn kenjallys diuish, dy jean shiuish myrgeddin kenjallys y yeeaghyn da thie my ayrey; as cur-jee cowrey shickyr dou:

Deuteronomy 10:20

Nee oo aggle y ghoaill roish y Chiarn dty Yee, eshyn nee oo y hirveish, as huggeysyn nee oo lhiantyn, as loo liorish e ennym.

Deuteronomy 6:13

Nee oo aggle y ghoaill roish y Chiarn dty Yee, as shirveish eh, as nee oo loo liorish e ennym.

Earrooyn 5:21

Eisht nee’n saggyrt currym y chur er y ven lesh breearrey dy vollaght, as nee’n saggyrt gra rish y ven, Dy jean y Chiarn uss y yannoo mollaghtagh, as dwoaiagh er coontey loo oaiagh mastey dty phobble, tra ver eh er dty lheeasid dy loau, as dty volg dy att;

Exodus 23:13

As cur-jee tastey mie da dy chooilley nhee ta mee er ghra riu: as ny jean-jee imraa jeh ennym jeeghyn joarree, chamoo lhig da ve er ny chlashtyn ass dty veeal.

Exodus 20:7

Cha gow ennym y Chiarn dty Yee ayns fardail; son cha gum y Chiarn eshyn gyn loght ta goaill e ennym ayns fardail.

Genesis 50:25

As ghow Joseph loo jeh cloan Israel, gra, Nee Jee son shickyrys jeeaghyn erriu, as ver shiu lhieu seose my chraueyn veih shoh.

Genesis 27:46

As dooyrt Rebekah rish Isaac, Ta mee skee jeh my vioys kyndagh rish inneenyn Heth: my ghoys Jacob ben jeh inneenyn Heth, lheid as t’ad shoh inneenyn y cheer, cre sheeagh dou my vioys?

Genesis 21:23

Nish er-y-fa shen, jean breearrey dou ayns shoh liorish Jee, nagh jean oo foalsaght rhym, ny rish my vac, ny rish mac my vac: agh cordail rish y chenjallys ta mee er hoilshaghey dhyt, dy jean uss y lheid cheddin dooys, as da’n cheer ayn t’ou er dty yoarreeaght.

Genesis 14:19

As vannee eshyn eh, as dooyrt eh, Bannit dy row Abram liorish y Jee smoo syrjey, leshyn ta niau as thalloo.

Genesis 6:4

Va foawir ’sy theihll, ayns ny laghyn shen; as myrgeddin lurg shen, tra ghow mec Yee mraane jeh inneenyn gheiney, as dy dymmyrk ad cloan daue, haink yn sleih cheddin dy ve deiney niartal, va ’sy chenn earish, ard-hranlaasee.

Genesis 6:2

Dy vaik mec Yee inneenyn gheiney dy row ad aalin; as ghow ad mraane jeu, lurg nyn yeearree.

Hebrewnee 6:16

Son ta deiney dy jarroo loo liorishyn s’ooasle ta: as ta loo, dy niartaghey lesh yn irriney, coyrt dy chooilley streeu gys kione.

Zephaniah 1:5

As adsyn ta cur ooashley da sheshaght rollageagh yn aer, er mullagh ny thieyn, as adsyn ta ooashlaghey, as breearrey liorish y Chiarn, as breearrey liorish Malcham;

Jeremiah 12:16

As hig eh gy-kione, my nee ad gynsaghey dy kiaralagh raaidyn my phobble, dy crauee loo liorish my ennym’s, gra, Myr ta’n Chiarn bio; (myr dynsee ad my phobble dy loo liorish Baal;) eisht yiow ad cummal shickyr, eer ayns mean my phobble.

Jeremiah 4:2

As shoh myr nee oo loo y ghoaill, Myr ta’n Chiarn bio, ayns firrinys, ayns briwnys, as ayns ynrickys; as nee ny ashoonyn ad hene y vannaghey aynsyn, as aynsyn nee ad boggyssagh.

Isaiah 65:16

Dy jean eshyn ta bannaghey eh-hene er y thalloo, eh-hene y vannaghey ayns Jee yn ynrickys; as eshyn ta loo er y thalloo, nee eh loo liorish Jee yn ynrickys; er-yn-oyr dy vel yn chenn seaghyn jarroodit, as dy vel ad keillit veih my hooillyn.

Isaiah 48:1

Clasht-jee nish rish shoh, O hie Yacob, ta ennym Israel cowrit erriu, as t’er jeet magh ass moir-ushtaghyn Yudah; ta breearrey liorish ennym y Chiarn, as gimraa mychione Jee Israel, agh cha nee ayns firrinys ny ayns ynrickys.

Isaiah 45:23

Ta mee er vreearrey liorym pene, ta’n fockle er n’gholl magh ass my veeal ayns ynrickys, as cha jean eh chyndaa, dy nee hym’s nee dy chooilley ghlioon lhoobey, dy chooilley hengey breearrey.

Psalmyn 115:15

Shiuish ta cloan bannit y Chiarn: chroo niau as y thalloo.

1 Samuel 20:17

As hug Jonathan er David dy heet harrish e vreearrey reesht, er-yn-oyr dy bynney lesh eh: son dy bynney lesh eh myr e annym hene.

Leviticus 19:12

As cha jean shiu loo liorish m’ennym’s dy foalsey; chamoo ghoys oo ennym dty Yee ayns fardail: Mish y Chiarn.

Exodus 22:11

Eisht bee loo fenish y Chiarn eddyr ad ny-neesht, nagh dug eh laue er cooid e naboo: shegin da’n oaner ve booiagh lesh shoh, as cha vow eh arragh dy lhiasaghey.

Genesis 14:22

As dooyrt Abram rish ree Sodom, Ta mee er hroggal seose my laue gys y Chiarn, yn Jee smoo syrjey, leshyn ta niau as thalloo.

Genesis 24:7

Yn Chiarn Jee jeh niau, ghow mee veih thie my ayrey, as veih cheer my chynney, as ren loayrt rhym, as ren breearrey dou, gra, Da dty luight ver-yms yn cheer shoh; v’er eshyn e ainle royd, as gowee oo ben da my vac veih’n cheer shen.

Genesis 28:1

As deïe Isaac er Jacob, as vannee eh eh, as hug eh currym er, as dooyrt eh rish, Cha jean uss ben y ghoaill jeh inneenyn Chanaan.

Genesis 47:31

As dooyrt eh, Jean breearrey dou: as ren eh breearrey da, as ren Israel ooashlaghey, croymmey er e lorg, ny hoie ec kione ny lhiabbagh.

Briwnyn 14:3

Eisht dooyrt e ayr as e voir rish, Nagh vel ben ry-gheddyn mastey inneenyn dty chynney, ny mastey ooilley my phobble, dy vel oo shirrey dy ghoaill dhyt ben jeh ny Philistinee chymmyltee? as dooyrt Samson rish e ayr, Fow dou ee, son s’laik lhiam ee dy mie.

Psalmyn 136:26

O cur-jee booise da Jee ny niaughyn: son ta e vyghin farraghtyn son dy bragh.

Genesis 34:9

As jean-jee cleunys rooinyn, as cur-jee ny inneenyn euish dooinyn, as gow-jee ny inneenyn ainyn diuish.

Genesis 38:2

As honnick Judah ayns shen inneen Canaanite dy row, va’n ennym echey Shuah: as ghow eh ee, as lhie eh mâree:

1 Samuel 30:15

As dooyrt David rish, Vod uss y raad y yeeaghyn dou gys y cheshaght shoh? As dooyrt eh, Jean breearrey dou liorish Jee, nagh jean oo m’y varroo, ny m’y livrey gys laueyn my vainshtyr, as ver-ym lhiam oo gys y cheshaght shoh.

Ezra 5:11

As shoh’n ansoor hug ad dooin, Ta shinyn sharvaantyn y Jee chroo niau as thalloo, as cha vel shin agh troggal reesht y thie, va troggit ymmodee bleeantyn er-dy-henney, ren ree mooar ayns Israel troggal, as soiaghey seose.

Jeremiah 29:6

Poose-jee mraane, as jean-jee mec as inneenyn y gheddyn; as gow-jee mraane son ny mec eu, as cur-jee ny inneenyn eu ayns poosey, dy vod ad gymmyrkey mec as inneenyn; dy vod shiu bishaghey ayns shen, as gyn ve er nyn leodaghey.