Genesis 2:1 - Yn Vible Casherick 1775 1819

¹ Myr shoh va ny niaughyn as y thalloo er nyn groo, as ooilley ny va ayndoo.

Genesis 2:1 Iomraidhean Croise

Psalmyn 33:6

Liorish goo yn Chiarn va ny niaughyn er nyn groo: as ooilley ny pooaraghyn oc liorish ennal e veeal.

Exodus 31:17

Te cowrey eddyr mish as cloan Israel son dy bragh: son ayns shey laa chroo’n Chiarn niau as thalloo, as er y chiaghtoo laa scuirr eh, as ghow eh boggey jeh.

Exodus 20:11

Son ayns shey laa chroo yn Chiarn niau as thalloo, yn faarkey, as ooilley ny t’ayndoo, as scuirr eh er y chiaghtoo laa: shen-y-fa vannee yn Chiarn y chiaghtoo laa, as ren eh eh y chasherickey.

Genesis 1:1

Ayns y toshiaght chroo Jee niau as thalloo.

Isaiah 45:18

Son myr shoh ta’n Chiarn dy ghra chroo ny niaughyn, Jee hene ren y thalloo y chummey as chroo eh, t’eh er hickyraghey eh, cha chroo eh eh ayns fardail, ren eh cummey eh cour cummaltee; mish y Chiarn, as cha vel Jee erbee elley.

Isaiah 42:5

Shoh myr ta’n Chiarn Jee dy ghra, eh chroo ny niaughyn, as ren skeayley magh ad; eh hug er y thalloo dy heet rish, as ooilley ny ta cheet ass; eshyn hug ennal ’sy phobble ta er, as bioys ayndoosyn ta cummal ayn;

2 Reeaghyn 19:15

As ghow Hezekiah padjer kiongoyrt rish y Chiarn, as dooyrt eh, O Hiarn Yee Israel, ta cummal eddyr ny cherubim, she uss yn Jee, eer uss dty-lomarcan, jeh ooilley reeriaghtyn ny hooirey; uss chroo niau as thalloo.

Isaiah 45:12

Ta mee er n’yannoo yn thalloo, as er chroo dooinney er: she mish, eer my laueyn hene, t’er heeyney magh ny niaughyn, as ooilley yn cheshaght-chaggee oc ta mee er oardrail.

Psalmyn 146:6

Ta jannoo cairys dauesyn ta surranse aggair: ta beaghey ny accryssee.

Zechariah 12:1

Phadeyrys trome goo yn Chiarn son Israel, ta’n Chiarn dy ghra, ta sheeyney magh ny niaughyn, as layal undin ny hooirey, as kiaddey spyrryd dooinney cheu-sthie jeh.

Psalmyn 33:9

Son loayr eh, as ve jeant: hug eh sarey, as hass eh shickyr.

Nehemiah 9:6

Uss, eer uss dty-lomarcan y Chiarn, uss t’er chroo niau ny niaughyn, marish ooilley ny pooaraghyn oc, yn thalloo as ooilley ny t’ayn, ny faarkaghyn, as ooilley ny t’ayndoo, as t’ou dy choadey ad ooilley, ta sheshaght-flaunyss cur ooashley dhyt.

2 Recortyssyn 2:12

Dooyrt Huram ny-sodjey, Bannit dy row’n Chiarn Jee Israel, t’er chroo niau as thalloo, t’er choyrt da David y ree mac creeney, coamrit lesh keeayll, as tushtey, dy hroggal thie da’n Chiarn, as thie son e reeriaght hene.

Hebrewnee 4:3

Agh ta shinyn t’er chredjal goll stiagh ayns fea, myr dooyrt eh, Myr loo mee ayns my chorree, nagh ragh ad stiagh ayns m’ea: ga dy row ny obbraghyn harrish er-dy hoshiaght y theihll.

Jannoo 4:24

As tra cheayll ad shen, hrog ad seose nyn goraa gys Jee lesh un aigney, as dooyrt ad, Hiarn, uss yn Jee t’er chroo niau as thalloo, as y faarkey, as ooilley ny t’ayndoo;

Jeremiah 10:16

Cha vel eiraght Yacob goll roosyn: son she eshyn t’er chiaddey dy chooilley nhee; as ta Israel cronney e eiraght: Chiarn ny sheshaghtyn flaunyssagh yn ennym echey.

Jeremiah 10:12

T’eshyn er chroo yn thalloo liorish e phooar, t’eh er hoiaghey yn seihll liorish e chreenaght, as er heeyney magh ny niaughyn liorish e hushtey.

Isaiah 65:17

Son cur-my-ner, ta mee croo niaughyn noa, as thalloo noa: cha bee cooinaghtyn er yn seihll va roïe, as cha jig eh ayns my aigney.

Isaiah 48:13

Ta my laue myrgeddin er hoiaghey undin y thallooin, as ta my laue yesh er skeayley magh ny niaughyn: tra ta mee geamagh orroo, t’ad shassoo seose dy cheilley.

Deuteronomy 4:19

As er-aggle dy drog oo dty hooillyn lesh yn aer, as tra hee oo yn ghrian, yn eayst, as ny rollageyn, dy jarroo slane sheshaght yn aer, dy bee oo cleaynit dy choyrt ooashley daue, as dy hirveish ad shen, ta’n Chiarn dty Yee er rheynn er dy chooilley ashoon fo niau.

Genesis 2:4

Shoh coontey jeh toshiaght ny niaughyn as y thalloo, tra v’ad er nyn groo, er y laa ren y Chiarn Jee yn thalloo as ny niaughyn y chroo,

Genesis 1:10

As denmys Jee yn thalloo chirrym Ooir; as chaglym cooidjagh ny ushtaghyn denmys eh Faarkaghyn: as honnick Jee dy row eh mie.

Deuteronomy 17:3

As t’er n’gholl as er hirveish jeeghyn joarree, as er choyrt ooashley daue, edyr da’n ghrian, ny da’n eayst, ny da veg jeh pooaraghyn sollys yn aer, shoh ta mish er lhiettal;

Jeremiah 8:2

As nee ad skeayley ad roish y ghrian, as yn eayst, as slane armee rollageagh yn aer, orroosyn va nyn ghraih soit, as adsyn t’ad er hirveish, as nyn lurg t’ad er n’immeeaght, as hucsyn ren ad shirrey, as daue hug ad ooashley: cha bee ad er nyn jaglym, ny er nyn oanluckey; bee ad son eoylley er eaghtyr y thallooin.

Isaiah 55:9

Son myr ta ny niaughyn ny syrjey na yn thalloo, myr shen ta ny raaidyn aym’s ny syrjey na ny raaidyn euish, as ny smooinaghtyn aym’s erskyn ny smooinaghtyn euish.

Lioar Yob 12:9

Quoi eh nagh vel fys echey liorish ooilley shoh, dy nee laue Yee t’er n’yannoo eh?

Jannoo 7:42

Eisht hyndaa Jee, as livrey eh ad seose dy chur ooashley da pooaraghyn yn aer; myr te scruit ayns lioar ny phadeyryn, O hie Israel, vel shiu er hebbal dooys beïyn marroo as ourallyn, rish da-eed bleïn ayns yn aasagh?

Noo Luke 2:13

As ayns y tullogh va marish yn ainle ymmodee jeh’n cheshaght flaunyssagh cur moylley da Jee, as gra,

Isaiah 34:4

As nee slane pooaraghyn yn aer lheïe ersooyl, as bee ny niaughyn fillit cooidjagh myr duillag lioar: as tuittee ooilley yn slane earroo oc, myr ta’n duillag tuittym veih’n villey-feeyney, as yn fig appee veih’n villey-figgagh.

Psalmyn 104:2

T’ou dy choamrey oo hene lesh soilshey myr lesh garmad: as skeayley magh ny niaughyn myr curtan;