Dobberan 2:13 - Yn Vible Casherick 1775 1819

¹³ Quoi nee’m y ghoaill son feanish ort? cre gys nee’m dty hoylaghey, O inneen Yerusalem? cre nee’m y chormal rhyt, dy voddym dty gherjaghey, O voidyn inneen Zion? son ta dty vrishey mooar myr yn aarkey; quoi oddys dty lheihys?

Dobberan 2:13 Iomraidhean Croise

Dobberan 1:12

Nagh vel scansh euish jeh, ooilley shiuish ta goll shaghey? cur-jee my-ner as jeeagh, my ta trimshey erbee goll-rish yn trimshey aym’s, t’er duittym orrym, lesh ta’n Chiarn er my laadey ayns laa e yymmoose hrome.

Jeremiah 14:17

Shen-y-fa jir oo ny goan shoh roo, Lhig da my hooillyn’s roie sheese lesh jeïr oie as laa, as ny lhig fea ’ve orroo: son ta brishey trome er jeet er y voidyn inneen my phobble, eer builley baaish.

Jeremiah 8:22

Vel veg y valm ayns Gilead? vel fer-lhee erbee ayns shen? Cre’n-fa eisht nagh vel aslaynt inneen my phobble er ny choural?

2 Samuel 5:20

As haink David gys Baal-perazim, as woaill David ad ayns shen, as dooyrt eh, Ta’n Chiarn er vrishey magh er my noidyn kiongoyrt rhym, myr brishey magh ushtaghyn. Shen-y-fa denmys eh yn ynnyd shen Baal-perazim.

Daniel 9:12

As t’eh er chooilleeney e ghoan, loayr eh nyn ’oï, as noi ny briwnyn va dy vriwnys shin, liorish coyrt lesh orrin kerraghey trome: son fo ooilley niau cha row rieau y lheid as ta er ny ve jeant er Jerusalem.

Isaiah 37:22

Shoh yn goo ta’n Chiarn er loayrt my-e-chione, Ta’n voidyn, inneen Zion, er hoiaghey beg jeed, as er ghearey ort gys faghid; ta inneen Yerusalem er chraa e kione ort.

Psalmyn 60:2

T’ou er ghleashaght y cheer, as er scarrey eh: slaanee ny chingyn echey, son te craa.

2 Reeaghyn 19:21

Shoh’n goo ta’n Chiarn er loayrt mychione echey, Ta’n voidyn, inneen Zion, er hoiaghey beg jeed, as er ghearey ort gys faghid; ta inneen Yerusalem er chraa e kione ort.

Jeremiah 9:18

As lhig daue siyr y yannoo, as yllagh y hroggal seose er nyn son, dy vod nyn sooillyn shilley sheese lesh jeïr, as ferroogh nyn sooillyn roie harrish lesh ushtey.

Jeremiah 14:19

Vel oo dy bollagh er hreigeil Judah? vel Zion dwoaie dty annym? cre’n-fa t’ou er woalley shin, as nagh vel saase nyn gour? va shin jerkal son shee, as cha vel veg y vie; as son earish slayntoil, as cur-my-ner seaghyn!

Ezekiel 32:31

Bee Pharaoh ry-akin ny mast’ oc, as bee eshyn er ny gherjaghey harrish ooilley ymmodee e phobble, eer Pharaoh, as ooilley e heshaght-chaggee, stroit lesh y chliwe, ta’n Chiarn Jee dy ghra.