Dobberan 1:14 - Yn Vible Casherick 1775 1819

¹⁴ Ta quing my loghtyn kianlt orrym liorish e laue’s: t’ad cast, as chionnit mysh my wannal: t’eh er lhaggaghey my niart, ta’n Chiarn er my livrey gys ny laueyn ocsyn nagh voddym shaghney.

Dobberan 1:14 Iomraidhean Croise

Isaiah 47:6

Va mee jymmoosagh rish my phobble; ta mee er n’yannoo my eiraght feohdoil, as er livrey ad gys dty laue: cha ren oo myghin y hoilshaghey daue; er y chenndeeaght t’ou dy feer trome er lhie yn whing.

Deuteronomy 28:48

Shen-y-fa, nee oo shirveish dty noidyn, ver y Chiarn dt’oï, ayns genney arran, as ushtey, rooisht, as ayns feme jeh dy chooilley nhee: as ver eh yn whing yiarn er dty wannal, derrey t’eh er dty choyrt mow.

Ezekiel 25:7

Cur-my-ner, er-y-fa shen, sheeyn-yms magh my laue ort’s, as livrey-ym uss son spooilley da ny ashoonee, as giare-ym oo jeh veih mastey yn pobble, as ver-yms ort’s dy gholl naardey mastey ny cheeraghyn: nee’m uss y stroie, as bee fys ayd, dy nee mish y Chiarn.

Ezekiel 25:4

Cur-my-ner, er-y-fa shen, neem’s uss y livrey gys deiney yn niar son eiraght, as nee ad soiaghey ny plaaseyn oc aynyd’s, as troggee ad nyn dhieyn aynyd: nee adsyn gee yn mess ayd’s, as nee ad giu dty vainney.

Jeremiah 28:14

Son myr shoh ta Chiarn ny flaunyssee, Jee Israel, dy ghra, Ta mee er choyrt quing yiarn er mwannal ooilley ny ashoonyn shoh, dy vod ad shirveish Nebuchadnezzar ree Vabylon; as nee ad shirveish eh: as ta mee er choyrt dasyn beïyn y vagheragh myrgeddin.

Raaghyn Creeney 5:22

Nee e vee-chairys hene yn vee-chrauee y ghreimmey, as bee eh sniemmit.

Hosea 5:14

Son beem’s da Ephraim myr lion, as myr quallian y lion da thie Yudah: neem’s, dy jarroo neem’s raipey, as goll roym; goym lhiam ersooyl, as cha jean fer erbee eshyn y livrey.

Ezekiel 23:28

Son myr shoh ta’n Chiarn Jee dy ghra, Cur-my-ner, livrey-ym oo gys y laue ocsyn, ta dwoaie ayd orroo, gys y laue ocsyn, voue ta dty aigney er ny harbaa.

Ezekiel 21:31

As deayrt-yms magh ort my yymmoose, neem’s sheidey dt’oï ayns aile my eulys, as livrey-ym oo gys laue deiney dewil, as schleioil dy stroie,

Ezekiel 11:9

As ver-ym lhiam shiu magh ass y vean eck, as livrey-ym shiu gys laueyn joarree, as cooilleen-yms erriu my vriwnyssyn.

Jeremiah 37:17

Eisht hug y ree Zedekiah fys dy ghoaill ass eh, as dênee eh jeh dy follit ayns e hie, as dooyrt eh, Vel fockle erbee veih yn Chiarn? As dooyrt Jeremiah, Ta: son dooyrt eh, Bee oo livreït gys laue ree Vabylon.

Jeremiah 32:5

As ver eh lesh Zedekiah gys Babylon, as bee eh ayns shen derrey yeeagh-yms er, ta’n Chiarn dy ghra: ga dy jean shiu caggey rish ny Caldeanee, cha vow shiu laue yn eaghtyr?

Jeremiah 27:12

Loayr mee neesht rish Zedekiah ree Yudah cordail rish ooilley ny goan shoh, gra, Cur-jee nyn mwannal fo quing ree Vabylon, as shirveish-jee eh as e phobble, as bee-jee bio beayn.

Jeremiah 27:8

As hig eh gy-kione, yn ashoon as yn reeriaght nagh jean shirveish Nebuchadnezzar cheddin ree Vabylon, as nagh der nyn mwannal fo quing ree Vabylon, yn ashoon shen neem’s smaghtaghey, ta’n Chiarn dy ghra, lesh y chliwe, as lesh y ghortey, as lesh y chramp, derrey veem’s er stroie ad liorish y laue echeysyn.

Jeremiah 25:9

Cur-my-ner, ver-ym fys as goym ooilley ashoonyn y twoaie, ta’n Chiarn dy ghra, as Nebuchadrezzar ree Vabylon my harvaant, as ver-ym lhiam ad noi yn cheer shoh, as noi ny cummaltee eck, as noi ooilley ny cheeraghyn shoh ta mygeayrt-y-mood, as stroie-ym ad ooilley, as nee’m ad dy ve son atchim, as son oltooan, as son traartys foddey-beayn.

Isaiah 14:25

Dy brish-ym yn Assyrian ayns my heer, as er my leityn stamp-ym eh fo-chosh: eisht nee yn whing echey brishey voue, as yn errey echey scarrey veih ny geayltyn oc.

Jeremiah 28:13

Immee as abbyr rish Hananiah, gra, Myr shoh ta’n Chiarn dy ghra, T’ou er vrishey ny quingyn fuygh; agh nee oo jannoo ’syn ynnyd oc quingyn yiarn.

Jeremiah 32:3

Son va Zedekiah ree Yudah er yeigh seose eh, gra, Cre’n-fa t’ou uss phadeyrys, as gra, Myr shoh ta’n Chiarn dy ghra, Cur-my-ner, ver-yms yn ard-valley shoh gys laue ree Vabylon, as nee eh goaill eh;

Micah 2:3

Shen-y-fa shoh myr ta’n Chiarn dy ghra, Cur-my-ner noi yn lught-thie shoh, ta mee kiarail olk, voish cha vod shiu shaghney nyn mwannallyn, chamoo hed shiu dy mooaralagh: son ta’n imbagh shoh seaghnagh.