Exodo 15:16 - Kagi Ka Manama

¹⁶ Imáddangan asta igkállas dan. Áglangngagán, su igkita dan tô matulus áglumun nu, igtagnáp dan iring na batu, sippang ka iglabé tô mga sakup nu, sippang ka iglabé tô mga manubù na igtábbus nu.

Exodo 15:16 Iomraidhean Croise

Genesis 35:5

Tô igpanó si Jacob asta tô pamilya din, ándà manubù na iglupug kandan, su tingód katô Manama, tuu imáddangan tô langun manubù na igóddô tun ta mga lunsud na madani.

Exodo 11:7

Asal tumagnáp gó tô tun ta mga rubbad i Israel, su agad tô mga asu dì mábbu katô mga manubù ó mga mannanap ébô kasóddóran nu gó na ássan katô Áglangngagán tô mga rubbad i Israel tun ta mga taga Ehipto.”

Exodo 15:13

Ukit katô ginawa nu na ándà ágtamanán, igpid nu tô mga manubù na igtábbus nu. Ukit katô bákkár nu, igagak nu sikandan tun ta ugis góddóan nu.

Exodo 15:5

Itambunan dan katô madalám dagat, asta ilánnád dan iring na batu tun ta kadalámman ka dagat.

Exodo 15:6

Áglangngagán, tuu madigár tô katulusan nu. Ágrupákkán nu tô mga usig nu.

Exodo 18:8

Igulitan i Moises sikandin tingód katô langun ka iglumu katô Áglangngagán katô harì ka Ehipto asta mga sakup din ébô tabangan tô mga rubbad i Israel. Igulitan din tingód ka mga kahirapan na inókitan dan tun ta dalan, asta tingód katô kapéwà katô Áglangngagán kandan.

Exodo 20:2

“Sakán tô Áglangngagán na Manama yu. Igpaluwà a ákniyu tikud tun ta kallang ákniyu tun ta banuwa ka Ehipto.

Exodo 6:7

Imun ku sikiyu na kanak mga manubù, asta mémuwa na Manama yu. Atin ka paluwaán ku sikiyu tikud tun ta kallang ákniyu tun ta Ehipto, kasóddóran yu na sakán tô Áglangngagán na Manama yu.

Lumu 20:28

Piyà-piyà kó. Dóppóni yu tô langun ágpampamaké na igsarig katô Ugis Espiritu ákniyu ébô sikiyu tô mid kandan. Inému dan na mga sakup ka Manama ukit katô kamatayan i Jesus.

Tito 2:14

Sikandin tô igbullas áknita asta inaté ébô tábbusán ki tikud tun ta langun salà. Iglinisan ki ikandin ébô sakupán ki ikandin asta imun ki na mga manubù na malyag áglumu ka madigár.

1 Pedro 2:9

Asal sikiyu gó tô mga manubù na igsalin katô Manama, asta inému kó na mga parì na ágkasarigan taralumu katô Manama. Sikiyu tô manubù nit banuwa na igsalin asta igsakup ka Manama ébô mulit-ulit katô ágkasalábbuan mga áglumun katô Manama na igtawar ákniyu tikud tun ta kangittángngan asta igpasadun tun ta kandin makasalábbù kappawaan.

2 Pedro 2:1

Asal sayyan duwán mga ánnà bánnal propeta, asta iring kanan áknganni, su duwán pagsik mga ánnà bánnal taratinurù na madun tun ákniyu. Tuminurù dan katô ánnà bánnal ágtinuruán na makadadat katô kapamaké yu, asta méllé dan katô Áglangngagán na igtábbus kandan. Purisu tigkô dád supakan sikandan.