Valamuli 7:8 - Bhibhiliya Nya Guage

⁸ Gidhiyoni a di dzega dzimbuva dza vale va bwelelago gumogo ni mipundru yawe, a va rumela gu va hongola mitshatshani gwawe, aholu ava vambe nya mazana mararu a va embela gukhuye va tshale; lizumbo la Vamedhiyani li diromo vbavbatshi nya kova.

Valamuli 7:8 Iomraidhean Croise

Isaya 27:13

Khilo litshigu lile gu na wombwago pundru nya wukhongolo, avo va nga bani va dzimede tigoni ga Asiriya, ni vale va nga bani va vbagedwe va yiswa tigoni ga Egipito, va na wuya va ta khozela Pfhumu Nungungulu, gigomoni nya gukatege gya Jerusalema.

Levhi 23:24

“Embela sanana sa Israyeli, khuwe: Khu litshigu nya guphele nya ngima nya livbandre na wuvili, a gu litshigu nya guhefemule, mu na womba pundru mu ramba tshangano nya guage, mu ta alakanya ni gu kulungela litshigu lolo.

Levhi 25:9

Hwane nya ugo, u na ruma gu wombwa pundru khu tshivba ni tshivba, khu litshigu nya likhumi nya ngima nya livbandre na mivili. Litshigu nya tsetselelo nya wukhongolo, mu na ruma gu wombwa pundru tigoni gwanu gwatshavbo.

Mitengo 10:9

Mwa gu soma nyimbi tigoni gwanu guya dwana ni valala vanu vatago va ta mi dhumela, gu vbweta mu womba mipundru yi dzuma ngudzu. Khu guralo, Eni Pfhumu Nungungulu, nyi na mi alakanyani nyi mi vbulugisa ga valala vanu.

1 Vakorinto 15:52

isoso si na girega khu gikhati gimwegyo basi, khu gukhwavbila nya maho, gikhati wu na wombago pundru nya mahegiso. Wa gu pwala pundru, ava va fudego va na wuga va vbanya nyamba fa gambe, gasi ethu, hi na vbindrugedza giemo.

Josuwa 6:20

Vathu va di huwata, vaphasi nya mhamba va di womba mipundru. Vathu na va pwide gudzuma nya mipundru, va di gira gupwala huwa nya yikhongolo, makhokhola ma di khungumuga, va na Israyeli va di bela dhoropani moyo ni moyo a di hongola wulanga wu nga bani wu romo mbeli gwaye, li di wandrwa kharati lidhoropa.

Josuwa 6:4

Livbandre na vavili vaphasi nya mhamba va na thanga mbeli nya Ngasa nya Gidzumeledzwano, na va gu womba livbandre na mivili mipundru; khu litshigu nya livbandre na mavili, mu na dzundruluga lidhoropa livbandre na dzimbili dzinyondro, gumogo ni vaphasi nya mhamba na va gu womba mipundru.

Valamuli 3:27

Na vbohide, a di gwela sigomoni sa Efrayimi a womba pundru, va na Israyeli va di relela naye khu gigomotunu, na thangide mbeli gwawe.

Valamuli 6:33

Ga gikhati gyogyo vatshavbo Vamedhiyani ni Vaamaleki gumogo ni mambe mayigo, va dita khu Khugadambo va tombanisa masotshwa yawe, va tsemakanya tsongo wa Joridhani vaya zumba kovani wa Jezireyeli.

Valamuli 7:7

Pfhumu Nungungulu a di embela Gidhiyoni, khuye: “Khu ava nya mazana mararu vama va nga dandzelago mati nyi na mi vbulugisa nyi ningela Vamedhiyani mandzani gwago; aholu ava vambe vatshavbo va rume va hongola magaya gwawe.”

Valamuli 7:9

Pfhumu Nungungulu a di embela Gidhiyoni ni wutshiguwule, khuye: “Khuga u relela lizumbotunu, kholu nyi na li ningela mandzani gwago.