Vaefeso 5:11 - Bhibhiliya Nya Guage

¹¹ Mu nga hengeli gumogo ni vale va vbanyelago gidemani, mithumoni yawe nyamba phasa gilo; aholu yi ganedzeni nyamba yi vegedzela.

Vaefeso 5:11 Iomraidhean Croise

Genesi 20:16

A di embela Sara, khuye: “Wona, nyi ngu ninga ndriyago likhumi mazana (1.000) singerengere nya parata. Egi gi na khala avbo gwago kha nga gifenengelo mahoni gwa vatshavbo u vbanyago navo, uwe u agisidwe ga satshavbo sesi.”

Dzindzimo 141:5

Nya gu tsayiswa khu muthu nya gululame, nya gu wona nari gwadi ga eni, a gu nyi kawuka, gu na gira nga mafura nya gunungele gwadi, nyi thedwago hungoni gwangu. Aholu gima kha nya dzumela gu zundzwa khavo va girago guvivba, kholu kha nyi garali khu gu lombelela nyi dwana ni mithumo yawe nya guvivbe.

Mavingu 1:10

Mwanangu, u nga dzumeli gu sengwa khu sighohi.

Mavingu 1:31

Khu guralo, va na hodza handro nya mithumo yawe, va khura khu gupimisa gwawe.

Mavingu 13:18

Uye a nyenyago gulaywa a na thegedwa khu dzitshoni ni wusiwana, gasi uye a dzumelago gukawukwa a na zundzega.

Mavingu 15:12

Muhembululi kha goli wule a mu kawukago, ambari gu hidzimela gunene ga vathu nya gugengele.

Mavingu 19:25

Tsayisa mutshanisi gasi gipumbu gi kodza gu mana gihevbulo, laya muthu nya guti a kodza gu engedzela mapimo.

Mavingu 25:12

Mulayi a layago khu wugengeli, ga muthu a yingisago, a gu fanana ni phera nya ndralama, mwendro wulungu nya ndralama yi hutidwego.

Mavingu 28:4

Avo va hambanago ni Nayo, va gu zundza sighohi, aholu avo va sayisago Nayo, va gu dwana naso.

Mavingu 29:1

Uye a kanyisago mwendro gumba dzumela gululekwa, a na mbembiswa na si pimi gilo, a na hamuga ni uye nya gu mu wuse.

Isaya 29:21

vatshavbo avo va rwegago nandru muthu khu guhoheta nya gukari, ni valamuli va rengeledwago gasi gu rwega nandru wule a ngamba ghoha.

Jeremiya 15:17

Gima kha nya khala tshanganoni nya vatseketseli ambari gutsaka navo; nyi di khala nyonga nyi phasedzedwa khu mandza yago, kholu likhulo lago li di tadza hefemulo wangu.

Levhi 19:17

U nga vengeli muthu kwanu monyoni gwago. Aholu u nga digi gu kawuka muthu wa na gyanu, gasi u si ghohi khu kotani yaye.

Matewu 18:15

“Wa gu wona gukhuwe ndriyago a gu ghohede, indra u ya mu kawuka na muri enu mwa vavili basi. A gu gu yingisa, u na bani u vbanyiside ndriyago.

Luka 3:19

Avbo mufumeli Herodhi a nga kawukwa khu Johane khu kotani ya Herodhiya, mwangadzi wa ndriyaye, Filipi, ni kotani nya yimbe mithumo nya guvivbe a nga girago,

Mithumo 26:18

Eni nyi ngu gu rumela guya va tula maho yawe gasi va duga gidemani, va ta guwonegelani; va duga wugumbini wa Sathane, va ta ga Nungungulu, va khodwa gwangu va fela gu divaledwa sighoho sawe, va hakha thomba yi lulamisedwego vbakari nya sihathwa, khu gukhodwa Gwangu.’

Varoma 13:12

Wutshigu wu dandride, gugya gu vbohide. Hongoleni hi dige mithumo nya gidema, hi phara matshari hi dwana guwonegelani.

Varoma 16:17

Nyi ngu mi tivisani, vandruye, gukheni dzi woneleni ga vale va wusago guhambana ni gu yala gukanakana sihevbuloni mu hakhidego. Gimbilelani hwindzo navo,

Varoma 6:21

Aholu, giphaso muni mu gi manidego khu gu thumani silo, muhuno si mi thelago dzitshoni? Mahegiso nya mithumo yoyo khu gufa.

Vagalatiya 6:8

Kholu oyu a yalago gudogorela nya tumbunugo nya wuthu, khu nayo nya tumbunugo a na vbwera guhina. Gasi oyu a yalago mithumo ya Liphuvbo la Nungungulu, a na vbwera guvbanya nya gupindruge.

Vaefeso 4:22

Khu kharato, digani tumbunugo nya mavbanyelo yanu ya gale nya gutale khu gudogolela nya gunyenyeze, gu yisago gumbembani.

Vaefeso 5:12

Kholu, gu khala ni dzitshoni gu ganela khu esi va girago mu gusihalani.

Vaefeso 5:7

Khu kharato, mu nga hengelini navo.

Vakolosi 1:12

Bongani Nungungulu Babe a dzinidego gukhuye mu mane nenu fanelo nya guya hengela guhodza thomba a yi vegisedego libandla laye mufumoni nya wenengedzo.

1 Vatesalonika 5:7

Kholu, vale va lalago, va gu lala wutshigu, ni vale va levago, va gu leva wutshigu.

2 Vatesalonika 3:14

Aholu a gu manega muthu nyamba landrisa milayo yeyi hi mi ningago khu lidangalila leli, mu khedzeni gwadi, mu nga hengeli naye, gasi afela gu khala dzitshoni.

2 Vatesalonika 3:6

Vandruye, khu lina la Pfhumu yathu Jesu Kristo, hi ngu mi embelani khethu hambanani ni vandruye vale va vbanyago nyamba thuma gilo, va si landrigo nayo nya tumbunugo mu wu hakhidego ga ethu.

1 Thimoti 5:20

Avo va ghohago va kawuke mwandrani, gasi vale vambe va fela gu khala hwanga.

1 Thimoti 5:22

U nga vbiredzeli gu handzega mandza muthu thumoni nya libandla, u nga rwali nandru nya sighoho sa mumbe muthu, gimbila khu mavbanyelo nya yadi.

1 Thimoti 6:5

ni guganedzana nya mahala, vathu nyambana mapimo, va guromo hwindzo ni lisine. Avo va gu dzega gukhodwa va gu gira wugwewo.

2 Thimoti 3:5

Va na sayisa giemo nya wukhodwa, aholu va ganedza tshivba yakone. Hambana navo vathu vovo.

2 Thimoti 4:2

Ganela Mahungu nya Yadi u simamisa gu gira kharato, gikhati nya gugaradze nigyo nya guvbevbuge kawuka, luleka ni gu khongotela khu gutimisela gwatshavbo ni gu hevbudza.

Tito 2:15

Hevbudza silo sesi satshavbo, u laya ni gu kawuka khu tshivba yatshavbo u ningidwego. U nga dzumeli ni moyo a gu yeyisa.

Gutuledwa 18:4

Nyi dipwa gambe lito khu ndzadzini, na li gu ganela, khilo: “Dugani enu vathu vangu khu dhoropani momo, gasi mu si hengeli naye sighoho saye, mu patwa nenu sitsayisoni gwaye.