Sofoniya 1:3 - Bhibhiliya Nya Guage

³ Nyi na mbembisa vathu ni sirengo; nyi vbedza sinyoni sa damboni ni dzindzandzi dza phwani; avo va khunguvanyisago vakwawe ni va nya guvivbedwa khu monyo, nyi na fuvisa vathu mafuni, a ngu ganela Pfhumu Nungungulu.

Sofoniya 1:3 Iomraidhean Croise

Genesi 6:7

Khavbo avbo, Pfhumu Nungungulu a di khuye: “Nyi na fuvisa vathu nyi va vangidego mafuni, nyi na va mbembisa tigoni, nyi vbedza vathu, sirengo ni sinyoni sa damboni ni sirengwanana satshavbo si khwirirago khu lididi, kholu nyi ngu dzi laya khu olu nyi si giridego.”

Isaya 27:9

Khidzo kharato, nandru wa Jakobe wu na handzwa, owu a nga bani nari handro nya gutsetseledwe sighoho saye, si na dzi yeyedza khu gu va khungumulela siluvelo satshavbo, va pandrelela siwindri sakone si khala wuguvbi, va sigulela madingo ya nungungulu nya malipha Asitaroti ni sifananiso nya lidambo, si thega vbavbatshi.

Isaya 6:11

Khavbo avbo, nyi di mu wudzisa, kheni: “Kala lini, Pfhumu yangu?” Uye a di nyi phindrula, khuye: “Kala madhoropa ma khala marumbi, dzinyumba dzi khala nyambana vathu, ni litigo latshavbo li vbindrugedza li khala giwula.

Isaya 6:12

Kala Pfhumu Nungungulu a tutumise vathu vaya hwindzo nya lidhoropa, tigoni gwatshavbo gu khala nyambana muthu.

Jeremiya 12:4

Kala lini litigo na liri ni gililo, ni gu banga mwasi wa marembweni gwatshavbo? Khu kotani nya guvivbe nya avo va vbanyago umo, gu ngu mbemba sirengo ni sinyoni; na va gukhavo: “Uye kha na wona mahegiso yathu.”

Jeremiya 50:3

Kholu, litigo li dugelago Wuronga, li nguta guta sasela litigo lawe, li na li vbindrugedza li khala marumbi; vathu ni sirengo sawe, vatshavbo va na tutuma va thava.

Jeremiya 7:20

Khu guralo, Pfhumu Nungungulu a ngu ganela kharati, khuye: “Wonani nya gukhenu giviti ni likhulo langu, si na vbalagela wulanga wowu, vbatshani nya vathu, vbatshani nya sirengo, vbatshani nya misimbo ya khabini ni mihandro ya mafuni; li na khondra nyamba tshimega gambe.”

Jeremiya 9:10

Nyi na lila khu kotani nya sigomo ni gu womba huwa ni gu embelela dzindzimo nya gililo khu kotani nya wuhaviselo wa giwulani; kholu malanga yaya ma dagarede khu luvbya, olu mwalo ni moyo a vbindrago gambe khumo; mule kha gu nga gu pwala gambe ligwaha nya mitshambi; ambari sinyoni sa damboni gumogo ni sirengo si phalalegide.

Ezekiyeli 44:12

Kholu va thumide na vari ni sifananiso sawe, va wuya va thumela va na Israyeli, va va tshunganisa va thega guvivbani; khu kotani nya isoso, Pfhumu Nungungulu a ngu ganela kharati, khuye: Nyi di sambanya na nyi khusedzide mandza gukheni, avo va na rwala nandru nya wuvivbi wawe.

Ezekiyeli 7:19

Va na swaya parata yawe dzindzilani, ni ndralama yawe yi na girwa kha nga gilo nya gunyenyeze. Parata ni ndralama yawe, kha si na nga kodza gu va vbulugisa litshigu nya likhulo la Pfhumu Nungungulu, gambe, kha si na nga kodza gu vbedza ndzala yawe ni gu tadza sisusu sawe; si na va gira basi gu va tshunganiswa va bela muguvivbani.

Hoseya 14:3

Asiriya kha na kodza gu hi vbulugisa, kha hi na khilela dzikavalu nya nyimbi. Niso hi si giridego khu mandza yathu, gima kha hi na ganela gambe avbo gwawe khethu: Uwe khuwe Nungungulu wathu; kholu uwe u ngu pwela wuhindzi sisiwana.”

Hoseya 14:8

Enu va na Efrayimi: Kha nyi vbweti gambe gupwa gilo khu sifananiso sanu? Kheni kamwe nyi mu ningago phindrulo nyi bwelo khavbo nyi mu sayisa. Eni nya gu nyuga gu fanana ni simbo nya pinyu, mihandro yago, ya gu dugela avbo gwangu.

Hoseya 4:3

Khu guralo, litigo li ngu lila, vatshavbo va vbanyago umo va ngu vbela tshivba; gumogo ni sirengo sa khabini, sinyoni sa damboni, ni dzindzandzi dza phwani sa gufa.

Zakariya 13:2

Khu litshigu lolo, a ngu ganela Pfhumu Nungungulu nya Tshivba Yatshavbo, khuye nyi na fuvisa tigoni ga Israyeli malina ya vanungungulu nya malipha, gima va si alakanywi gambe, nyi na tutumisa gambe tigoni vaprofeti nya malipha ni liphuvbo nya gunyenyeze.

Matewu 13:41

Mwamana wa Muthu a na rumela dzingilozi dzaye dzi dusela Mufumoni gwaye satshavbo sikhunguvanyiso ni ava va girago guvivba,

Matewu 23:39

kholu nyi ngu mi embelani, kheni: Kha mu na nyi wona gambe kala litshigu mu na gu ganelago, khenu: “Kategide uye a tago khu lina la Pfhumu.”

Gutuledwa 2:14

Aholu, u na ni nandru; kholu u navo vbakari gwago valandreli nya nayo wa Bhalahama wu nga hevbudzwago khu Bhalahaki, gasi gu tshunganedzisa sanana sa Israyeli, si hodza nyama nya sirengo nya guphasedwe sithombe nya vanungungulu nya malipha, ni gu gira wuphuphulu.