Rute 3:7 - Bhibhiliya Nya Guage

⁷ Hwane nya gu Bhowazi na hodzide, a sela a khura monyo waye na wu tangade, a mu wona na guya lala vbafuvbi ni avbo gu nga wungedzedwago dzimbewu, Rute a dita kha gwadi, a ta funungula mawundru ya Bhowazi a lala avbovbo.

Rute 3:7 Iomraidhean Croise

Genesi 43:34

Josefe a di ruma gukhuye va theledzedwe guhodza gu nga bani guromo mbeli gwaye; aholu Bhejami a di thedwa livbandre dzinyondro guvbindra vakwawe. Va di sela gumogo va nengela naye.

2 Samuweli 13:28

Abhisalamo a di leletela madzaha yaye, khuye: Khedzani gwadi, gikhati monyo wa Amoni wu na gu bani wu tsakide khu wadwa, eni nyi na mi embelani, kheni: Songani Amoni, enu mu songeni nyambana hwanga, kholu kheni nyi mi rumago! Tiyani mu khale vama nya dzindrena.

1 Dzipfhumu 21:7

Khavbo avbo, mwangadzi waye Jezabheli, a di mu embela, khuye: “Gasi olu khandruwe mufumeli wa Israyeli, gani? Wuga u hodza guhodza, u nengela monyoni gwago. Eni nyi na gu ninga lithembwe la Nabhoti wa Jezireyeli.”

Dzindzimo 104:15

Mafu ma ngu ninga vbinyu yi tsakisago myonyoni nya vathu, mafura ma nyelugisago dzikhovbe, ni guhodza gu wusedzago tshivba.

Muhevbudzi 10:19

Guhodza gu ngu tshamba, ni wadwa wa gu tsakisa monyo, gambe satshavbo sa gu manwa khu dzitsapawu.

Muhevbudzi 2:24

Gimwalo gi gu gyadi ga muthu guvbindra guhodza, gusela, gutsaka ni gukhalega khu handro nya thumo waye. Aholu esi niso nyi si wone gukheni sa guta khu mandzani ga Nungungulu.

Muhevbudzi 8:15

Khu guralo, eni nyi ngukheni, gutshambide vathu va gu mana gutsaka mafuni momu, kholu gi mwalo gimbe gilo gi gu gyadi ga muthu guvbindra gu hodza, u sela, u nengela. Isoso si fanede gu mu bangaladza thumoni gwaye matshiguni yaye a ningidwego guvbanya khu Nungungulu mafuni momu.

Muhevbudzi 9:7

Olu indra uya dzi hodzela khu gutsaka u sela vbinyu yago monyo wago na wu salalegide; kholu, Pfhumu Nungungulu a ngu tsaka khu mithumo yago.

1 Vakorinto 10:31

Khu kharato, gani mwa gu hodza, gani mwa gu sela, ni gevbini gimbe gilo mu girago, satshavbo girelani gu rungudza Nungungulu.

Vaefeso 5:18

Mu nga levi khu wadwa mu nga dwanisana, aholu khalani na mu tade khu Liphuvbo nya Guage.

Valamuli 16:25

Avbo va nga bani va tsakide ngudzu, va di khavo: “Ranani Samisoni a ta hi hegisela. Va diya rana Samisoni pasoni a ta va hegisela, na va mu emiside vbakari nya madingo nya nyumba ya nungungulu wawe.”

Valamuli 19:22

Na vari vbakari nya gutsake, gu dita vama nya mighewu ya dhoropani mule, nya sanana sa Bheliyali, va ta randrela nyumba ya gikhosane gile, va veta lidimba, va embela gikhosane gile nya mune ndranga, khavo: “Nga dusa vbavbandze muthu yoyo a bedego nyumbani gwago, gasi hi ta hagana khuye.”

Valamuli 19:6

Khu wuvili wawe va di khala vbavbatshi va hodza ni gu sela; babe wa nyamahegyane a di ganela, khuye: “Nya gu gu lomba gukheni u lala gambe avba muhuno, gasi u nengedzisa monyo wago.”

Valamuli 19:9

Avbo mwama wule a nga vbweta gu khuga, uye, gibhayi gyaye ni githumi gyaye, sade waye, a gu babe wa mwangadzi waye, a di mu embela, khuye: U ngu wona nya gukhuwe olu lidambo li relede, li hwide li ngu pfola, gu ngu khala wutshigu, khala u lala u tsakisa monyo wago, mindru ni mambagugya u na wuga u hongola gaya gwago.

Rute 3:6

Khavbo avbo, Rute a di hongola githalatunu aya gira satshavbo a nga leletedwago khu nasale waye.

Rute 3:8

Ni vbakari nya wutshigu, mwama yoyu a di khendzuga khu guthava, a thendregedza a wona nyamayi a nga bani na lade mawundruni gwaye.