Rute 1:17 - Bhibhiliya Nya Guage

¹⁷ Avbo u na felago avbo, a neni nya gu vbweta gufela avbo, nyi dzingwa avbovbo neni. Pfhumu Nungungulu a na nyi tsayise ngudzu, gambe a engedzela nya gukala nyi dzumela silo nya nga esi, gu nyi hambanisa nago vbavbandze nya lufu.

Rute 1:17 Iomraidhean Croise

2 Samuweli 15:21

Itayi a di hakha mufumeli, khuye: Nyi ngu sambanya khu Pfhumu Nungungulu a vbanyago ni ga womi wa mufumeli, mune wangu, kheni: “Gani khu hayi mufumeli, mune wangu, gani lufuni gani guvbanyani, githumi gyago, gi na bani giri nago.”

2 Samuweli 19:13

Embelani Amasa khenu gasi uwe khundri marambo yangu, ni nyama yangu, gani? Nungungulu a na nyi tsayise ngudzu, uwe wa gumba emiswa gu khala muthangeli nya nyimbi mbeli gwangu kala gupindruga, wulangani wa Jowabhi.”

2 Samuweli 3:35

Khavbo avbo, vathu vatshavbo va di ta khongotela Dhavhidhe gukhavo a na hodze guhodza na gu ngari mihani; aholu mufumeli a di sambanya, khuye: “Pfhumu Nungungulu a na nyi tsayise khu tshivba nya gu hodza gibaba, mwendro gilogyogyo, na li si gu pfoli lidambo.”

2 Samuweli 3:9

Nungungulu a na nyi tsayise khu tshivba eni Abhineri, nya gumba gira iso Pfhumu Nungungulu a sambanyidego ga Dhavhidhe,

1 Dzipfhumu 13:31

Hwane nya gu bani na mu dzingide, a di embela sanana saye, khuye: “Nya gufa nyi dzingeni neni phalani a dzingidwego umo muthu wa Nungungulu, marambo yangu ma vegeni gumogo ni marambo yaye.

1 Dzipfhumu 19:2

Khavbo avbo, Jezabheli a di rumela mwango guya embela Eliya, khuye: “Vanungungulu va na nyi songe, gya gu vboha gikhati gegi mindru na nyi si gu giri womi wago nya nga edzi uwe u giridego uwo wa vaprofeti.”

1 Dzipfhumu 2:23

Khavbo avbo, Solomoni a di sambanya khu Pfhumu Nungungulu a vbanyago, khuye: “Nungungulu a na nyi tsayise khu tshivba nya gulamule gwaye, Adhoniya a gumba livba magana yaya khu womi waye.”

1 Dzipfhumu 20:10

Bheni-Hadhadhi a di engedza a rumela myango guya embela Akabi, khuye: “Vanungungulu va na nyi vete khu tshivba nya yikhongolo, kudzudzwane wa Samariya wa gu enedza gu tadza mandza ya vadwani nya nyimbi va nyi landrelago.”

2 Dzipfhumu 6:31

Khavbo avbo, uye a di ganela, khuye: “Nungungulu a na nyi vete khu tshivba, muhuno hungo wa Elizewu, mwamana wa Safati, wa gu simama wu khala magatani gwaye.”

Dzindzimo 45:10

Upwa, nyamahegyane; wona u yingisa gwadi; diga vathu vago, u va divala gumogo ni ndranga ya babe wago.

Mithumo 11:23

Na vbohide, a di wona wuhigo wa Nungungulu a tsaka, a va embela vatshavbo va simama gu khala ni Pfhumu khu monyo moyo vatshavbo.

Mithumo 20:24

Aholu kha nyi khathali khu womi wangu. Egi gi vbwetegago khu gu eni nyi vbohisa mahegiso liendro langu, nyifela gu vbedzisa ndrima nya thumo nyi pharisidwego khu Pfhumu yathu Jesu Kristo, nya gutivise Mahungu nya Yadi nya lihaladzo la Nungungulu.

Rute 1:16

Aholu Rute a di hakha, khuye: “U nga nyi gurumedzi gu gu diga, nyi hambana nago, kholu umo u na hongolago, nyi na hongola neni, ni avbo u na gu lalago vbawutshigutunu, nyi na lala neni avbo; litigo lago, litigo langu neni, Nungungulu wago, Nungungulu wangu neni.

Rute 4:15

A na khala mutangadzisi nya guvbanye gwago, ni musayisi muwukhosaneni gwago. Kholu oyu a nga velegwago khu ngadzamwane wago nya gu gu gole ngudzu, uye a ngu vbindra livbandre na sivili sikhwathana.”

1 Samuweli 14:44

Khavbo avbo, Sawule a di ganela, khuye: “Nungungulu a na gire iso a si wonago na si lulamide, wa gu mbafa uwe Jonatane!”

1 Samuweli 20:13

Babe wangu a gu vbweta gu gu girela guvivba, eni nyi si gu tivisi, nyi si gu digi u hongola khu gurula, Pfhumu Nungungulu a na nyi tsayise khu tshivba ni tshivba. Pfhumu Nungungulu a na khale ni uwe kha nga idzo a khadego khidzo ni babe wangu.

1 Samuweli 25:22

Nungungulu a na nyi tsayise khu tshivba, nya gukala nyi diga mwama moyo basi a vbanya vbakari nya avo kala gugya mindru.

1 Samuweli 3:17

Khu guralo, Eli a di mu wudzisa, khuye: “Ginani a nga gu embela Pfhumu Nungungulu?” U nga nyi siheli gilo. Pfhumu Nungungulu a na gu tsayise khu tshivba ni tshivba wa gu tshiya gilo nya gukari nya satshavbo esi Uye a gu embedego.