Muhevbudzi 3:12 - Bhibhiliya Nya Guage

¹² Nyi hegiside khu gu wona gukheni, gi mwalo gi gu gyadi guvbindra gu muthu a dzi tsakela ni gu vbweta makhalelo nya yadi guvbanyani gwaye.

Muhevbudzi 3:12 Iomraidhean Croise

Dzindzimo 37:3

Uwe tumba Pfhumu Nungungulu, gira nya sadi; u na vbaha tigoni u vbanya khu gukhadzisega.

Muhevbudzi 11:9

Lidzaha, dzi tsakise khu wudzaha wago, u tsakisa monyo wago matshigu nya wudzaha wago; gimbila khu ndzila yi godwago khu monyo wago, ni gu gola nya maho yago; aholu dziti nya gukhuwe Nungungulu a na gu lamula khu satshavbo soso.

Muhevbudzi 2:24

Gimwalo gi gu gyadi ga muthu guvbindra guhodza, gusela, gutsaka ni gukhalega khu handro nya thumo waye. Aholu esi niso nyi si wone gukheni sa guta khu mandzani ga Nungungulu.

Muhevbudzi 2:3

Nyi di pimisa khu monyoni gwangu gu dzi tsakisa khu gu sela wadwa nya vbinyu, mapimo yangu na ma nga gu thumisa guti, eni nyi di dzi gira gipumbu na nyi zama gu dzi pengisa kala nyi wona sanana sa vathu esi si va tshambelago gu si gira omu mafuni khu matshigu madugwana nya guvbanye gwawe.

Muhevbudzi 3:22

Khu guralo, nyi wonide gukheni gu mwalo gunengela nya gukhongolo ga muthu guvbindra gu uye a dzi tsakela khu mithumo yaye, owu khuwo tshatshazelo waye. Kholu khu mani a na gu mu wuyisago gasi guta wona iso si na gu dugelelago khu hwane?”

Muhevbudzi 8:15

Khu guralo, eni nyi ngukheni, gutshambide vathu va gu mana gutsaka mafuni momu, kholu gi mwalo gimbe gilo gi gu gyadi ga muthu guvbindra gu hodza, u sela, u nengela. Isoso si fanede gu mu bangaladza thumoni gwaye matshiguni yaye a ningidwego guvbanya khu Nungungulu mafuni momu.

Isaya 64:5

U ngu phasedzela wule a girago gululama na tsakide, vale va si divaligo dzindzila dzago; hi ngu wona nya gukhethu u khuvegide, kholu hi ghohide; gale na hi gu ghohela; hi na vbanyiswa, gani?

Luka 11:41

Phelani khu gu ningela sisiwana iso mu gu naso, khavbo satshavbo si na mi dugela gwadi.

Mithumo 20:35

Nyi mi yeyedzide khu magirelo yatshavbo gukheni, mwa gu thuma khu mawogo yanu khavbo mu na kodzago gu phasedzela vale va keneledwago. Dundrugani magana ya Pfhumu Jesu a gukhuye: ‘Kategide ngudzu oyu a ningago guvbindra oyu a hakhago.’ ”

Dhewuteronome 12:18

aholu uwe u na si hodzela wulanga wule Pfhumu Nungungulu wago, a na gu wu hathago, uwe, gumogo ni gyanana gyago, nya mwama ni egi nya nyamayi, ni githumi gyago nya mwama ni egi nya nyamayi, gumogo ni mulevhi a vbanyago dhoropani gwago; u na nengela mbeli ga Pfhumu Nungungulu wago, ga satshavbo u na girago.

Dhewuteronome 12:7

Avbovbo, mu naya hodza mbeli ga Pfhumu Nungungulu wanu, mu naya nengela khu satshavbo mu na guya girago enu gumogo ni mapango yanu, mu nengela khu satshavbo esi a na bani a mi kategiside khiso Pfhumu Nungungulu wanu.

Dhewuteronome 26:11

Khavbo avbo, u na nengela khu satshavbo nya sadi esi Pfhumu Nungungulu wago a gu ningidego, uwe gumogo ni ndranga yago, ni Mulevhi, gumogo ni muluveli a vbanyago vbakari gwago.

Dhewuteronome 28:63

Kha nga olu Pfhumu Nungungulu a tsakago khu gu mi kategisa, a mi andrisa, khidzo gambe kharato Pfhumu Nungungulu a na tsaka khu gu mi pfhungumula ni gu mi mbembisa; a nenu mu na duswa ga litigo mu yago ga ilo guya li fumela.

1 Thimoti 6:18

Va na thume silo nya sadi, va khale sitetema khu magirelo nya yadi, va yeyedza lihaladzo ni gu ninga sisiwana.