Mitengo 15:15 - Bhibhiliya Nya Guage

¹⁵ Wu na manega nayo moyo basi ga enu ni ga muluveli a vbanyago vbakari gwanu; uwowo wu na bani ari Nayo nya kala gupindruga ni ga situgulwana sanu; kha nga enu, gu na girega gambe kharato ga muluveli mbeli ga Pfhumu Nungungulu.

Mitengo 15:15 Iomraidhean Croise

Ekisodha 12:14

Litshigu lolo li na khala gidundrugiso gwanu; mu na li alakanya khu gu girani buzo nya gurungudze Pfhumu Nungungulu; mu na li vegisa ga mimelana ni mimelana nya situgulwana sanu. Kha nga nayo wu tiyisidwego kala gupindruga.

Ekisodha 12:24

Khu guralo, mu na sayisani sileletelo sesi, si na bani siri nayo wu hungago enu ni sanana sanu kala gupindruga.

Ekisodha 12:43

Khavbo avbo, Pfhumu Nungungulu a di embela gambe Mosi ni Aroni, khuye: “Eyi khu milayo nya mahodzelo nya Phasika: Muluveli a vbanyago vbakari gwanu, kha yeli gu hodza Phasika.

Ekisodha 12:49

“Gu na bani guri nayo moyo basi wu vegidwego ga givelegwa gya tigoni ni ga valuveli va vbanyago vbakari gwanu.”

Ekisodha 28:43

Aroni ni sanana saye va na si ambala gasi va kodza gubela Tshatshani nya Tshangano, va kodza gu hidzimela vbagiluvelotunu va ta thuma Makhuvini nya Guage, gasi va si mani nandru vafa. Owu wu na bani wuri nayo nya gupindruge ga Aroni ni situgulwana saye.

Levhi 24:22

Mu na fumwa khu nayo moyo basi mwatshavbo; vawuyi ni sivelegwa sa Israyeli, kholu Eni kheni Pfhumu Nungungulu wanu.

Mitengo 10:8

Avo va yelago gu womba mipundru yeyi, khu vaphasi nya mhamba nya livelego la Aroni. Nayo yoyu khwa gu kala gupindruga, wu na simama kala ga sanana sanu.

Mitengo 15:14

Ni muluveli a vbanyago vbakari gwanu, mwendro uye a khadego nanu gikhati nya gulaphe ngudzu, a gu vbweta nuye gu gira ningelo nya mahema nya gu tsakise Pfhumu Nungungulu, a na gira kha nga idzo enu mu girago khidzo.

Mitengo 15:29

Ambari nari givelegwa gya va na Israyeli mwendro muluveli a vbanyago vbakari gwanu, a gu gira gighoho khu wuhangi, mu na bani muri ni nayo moyo basi.

Mitengo 18:8

Pfhumu Nungungulu a di engedza gambe a embela Aroni, khuye: Wona nya gukhuwe, Eni kamwe nyi gu ningide gu sayisa miningelo yangu, ni satshavbo silo nya guage sa na Israyeli, sa gu ningwa uwe ni sanana sago, kholu u todzidwego mafura, nyi si ningede gwago kha nga nayo kala gupindruga.

Mitengo 9:14

Muwuyi, a vbanyago kha nga muluveli vbakari gwanu, a gu gola gu gira nuye buzo nya Phasika ya Pfhumu Nungungulu, a na landrise milayo ni sileletelo satshavbo nya Phasika. Mu na ni nayo moyo basi nya idzosaye ga vatshavbo, muluveli ni givelegwa gya tigoni.”

Vagalatiya 3:28

Khavbo avbo, olu gumwalo gambe guhambana Vajudha ni va nya mayigo, dzikhumbi ni va nya gutshulega; vama ni vanyamayi. Enu mwatshavbo mu moyo basi khu gu hengela gumogo ni Kristo.

Vakolosi 3:11

Gukhugela olu, gu mwalo gambe guhambana nya va nya mayigo ni Vajudha, va nya gu hana wugwera ni ava nyamba hana wugwera, va dhoropani ni va vbavbandze, khumbi ni muthu nya gutshulege. Kristo khuye satshavbo, gambe womo ga satshavbo.

Josuwa 8:33

Israyeli watshavbo, madhota yaye, vathangeli vaye gumogo ni valamuli vaye va di khala na va emide va randrela Ngasa, mbeli ga vaphasi nya mhamba va na Levhi va nga bani va rwade Ngasa nya Gidzumeledzwano gya Pfhumu Nungungulu. Vbale va diromo valuveli gumogo ni sivelegwa sa Israyeli; gipandre nya avo va di emide khu mbeli nya gigomo gya Garizimi, gimbe gipandre gi ema khu mbeli nya gigomo gya Ebhali; kha nga idzo va nga leletedwago khidzo khu gale khu Mosi, githumi gya Nungungulu, gukhuye gu kategiswe vathu va na Israyeli.

1 Samuweli 30:25

Khu kharati, gukhugela khu litshigu lile guya mbeli, gu di hungwa kharato, wu khala nayo wu tiyidego tigoni ga Israyeli kala na muhuno.