Mitengo 14:3 - Bhibhiliya Nya Guage

³ Khu ginani Pfhumu Nungungulu a hi residego tigoni momu gasi hi fela guta songwa khu matshari, vagadzi vathu ni sanana sathu va na modwa va tshaniswa; khandri di gwadi hi bwelela tigoni ga Egipito, gani?”

Mitengo 14:3 Iomraidhean Croise

Nehemiya 9:17

Va di bomba gu gu yingisa, va si alakanyi gambe siliwugiso U giridego vbakari gwawe, va di bangisa mihungo yawe, khu guyeyisa gwawe, va di dzi hathela muthu gasi a va thangela gu bwelela wugumbitunu, aholu uwe, U Nungungulu U dzi emisedego gu tsetselela, na wuri ni wuhigo, nu tade khu wuhindzi, U hwelago gu goroga na wu tade khu wuhindzi, khu guralo, Uwe khwa va pfhuralela.

Dzindzimo 78:40

Dzinyondro dzingani va nga wugelago Nungungulu mugiwulani va mu pwisa wuvi tigoni mule nya gihala!

Ekisodha 16:3

Sanana sa Israyeli si di ganela, khiso: “Adiri tshukwana nari pwani hi di fede mandzani ga Pfhumu Nungungulu tigoni ga Egipito, iyo hi nga bani hi tshelega mabhota nya nyama, hi khala hi hodza wusa hi khura. Aholu enu mu hi dusideni mu hi resa giwulani momu, mu di fela gu ta songa khu ndzala rengo watshavbo wowu nya vathu!”

Ekisodha 5:21

va gu va embela, khavo: “Pfhumu Nungungulu a na mi khedzise a gu mi lamula. Mu hi giride vathu nya gunyenyeze mahoni ga Faro ni sithumi saye, mu vegideni litshari mandzani gwawe vafela gu hi songa.”

Jeremiya 42:14

ni gu ganelani, khenu: Ahihi, ethu hi naya Egipito, iyo hi na gumba ya wona dzinyimbi, ambari gupwa pundru nya dzinyimbi, ni gu saniseka khu dzindzala,

Jeremiya 42:19

Pfhumu Nungungulu a di engedza gambe a ganela khu kotani yanu enu mitshaledwa ya Judha, khuye: “Mu nga hongolini tigoni ga Egipito. Dzitini nya gukhenu, muhuno nya gu mi laya na nyi tiyiside.

Jeremiya 9:3

Va gu peta lidimi li fanana ni wulaho wu ghwimbidwego, gasi gu ganela malipha; va gu dzi tiyisa tigoni, aholu khandri khu lisine, kholu va gu tsakela guvivba, kha va khathali khu Eni; a ngu ganela Pfhumu Nungungulu.

Mitengo 11:20

aholu mu na yi hodza ngima rumba, kala mu kodwa khiyo yi duga khu dzithonvuni, kholu enu mu yeyiside Pfhumu Nungungulu, Uye a guromo vbakari gwanu, gambe mu lide mbeli gwaye na mu gukhenu: Khu ginani hi dugidego khu tigoni ga Egipito?”

Mitengo 16:13

Ina sidugwana olu, u hi dusidego khu ga litigo li gogago mahwe ni wulombe gasi hi tafa mugiwulani momu, gani? Olu u nga gu vbweta gambe gu hi khozisa, gani?

Mitengo 20:3

Vathu va di phela gu gu ganedzisana ni Mosi, khavo: “I tshukwana na hi fude gumogo ni vandriyathu mbeli ga Pfhumu Nungungulu.

Mitengo 21:5

Vathu va di wugela Nungungulu gumogo ni Mosi, khavo: “U hi dusede ginani khu Egipito, gasi hi ta fela giwulani momu? Omu gu mwalo guhodza mwendro mati, olu hi garade khu guhodza gogu nyamba khurisa.”

Mithumo 7:39

Aholu, vababe vathu va di bomba gu mu yingisa, va mu tsukula myonyoni gwawe, va gola gu bwelela Egipito.

Dhewuteronome 1:39

Sanana sanu, mu nga khenu si na khala pfimba wa valala vanu; sanana sanu si si kodzigo gu hambanisa iso nya sadi niso nyamba sadi, iso si na gu bela. Khiso nyi na si ningago litigo leli, si li fumela.