Mikeya 4:7 - Bhibhiliya Nya Guage

⁷ Avo va ndzodolago nyi na va gira mitshaledwa, ni avo va nga bani va phalalegisidwe va yiswa hwindzo, nyi na va gira litigo nya tshivba; Pfhumu Nungungulu a na fuma vbatshani gwawe gigomoni gya Siyoni, gukhugela olu kala gupindruga.

Mikeya 4:7 Iomraidhean Croise

Dzindzimo 2:6

“Kheni nyi nga emisa mufumeli wangu vbatshani nya gigomo gyangu nya gukatege gya Siyoni.”

Isaya 16:5

Khavbo avbo, gu na tiyiswa gikhalo gyago nya wufumu khu wuwadi, gu na khodziswa avbo mulamuli a na lamulago khu gululama ni gutumbega tshatshani wa Dhavhidhe.”

Isaya 24:23

Khu guralo, ngima wu na khala dzitshoni, ni lidambo li na hembuludwa, kholu Pfhumu Nungungulu nya Tshivba Yatshavbo, a na fuma gigomoni gya Siyoni ni dhoropani ga Jerusalema; a na yeyedza wudhumo waye mbeli ga madhota yaye.

Isaya 6:13

Aholu, gwa gu bani gu na tshade gipandre nya likhumi nya vathu va tigoni, gu na simama gu pfhungumudwa; gu fanana ni simbo nya munga ni nvula, ambari wa gu wu koka gu tshala gihuru, uwo wa gu thunga, kharato nugo ga mathungedwa yoyo, gu na dandra nyaluphye vathu va Nungungulu.”

Isaya 60:22

Lipango nya lidugwana, li na andra kala likhumi mazana (1.000), ni eli nya ligwana ngudzu, li na khala litigo nya tshivba. Eni kheni Pfhumu Nungungulu; khu gikhati givbwetegago nyi na gira satshavbo sesi si tadzisega khu guvbiredza.

Isaya 66:8

Khu mani a pwidego mahungu nya nga aya? Khu mani a nga wonago silo nya nga esi? Ina litigo li ngu kodza guvelegwa khu litshigu limwedo mwendro mufumo gu wumbwa khu litshigu limwedo, gani? Aholu lidhoropa la Siyoni na li si gu lumwi, li di velega sanana saye.

Ezekiyeli 43:7

“Mwamana wa muthu, owu khuwo wulanga nya gikhalo gyangu nya wufumu, ni wulanga wu gandredzedwago khu migondro yangu, avbo nyi na vbanyago vbakari ga sanana sa na Israyeli kala gupindruga; va na Israyeli gima kha va na nyenyezisa gambe lina langu nya gukatege, avo, mwendro vafumeli vawe, khu kotani nya wubhayi wawe; ni gu vega umo sirumbi sa vafumeli vawe.

Dhaniyeli 2:44

Khu matshiguni ya vafumeli vovo, Nungungulu wa ndzadzini a na emisa wumbe mufumo nya gu gima kha wu na khoziswa khu mambe mafumbu. A na pfhungumula ni gu mbembisa mifumo yatshavbo ya vafumeli vale, mufumo waye wu na tiya kala gupindruga.

Dhaniyeli 4:34

Gasi olu, eni Nabhukodhonosori, nyi ngu rungudza, nyi khusedza ni gu dhumisa Mufumeli nya dzindzadzi. Kholu mithumo yaye yatshavbo khya lisine, ni dzindzila dzaye dzi lulamide. Uye a na ni tshivba nya guthese vbavbatshi avo va dzi khusedzago.

Dhaniyeli 7:14

Va di mu ninga gufuma, wudhumo ni mufumo, gasi mayigo ni vathu nya malimi yatshavbo va mu thumela. Wufumu waye khwa gu kala gupindruga, wu mwalo mahegiso, mufumo waye gima mwalo a na gu wu dzegago.

Dhaniyeli 7:27

Khu guralo, mufumo, tshivba ni wugulu nya mifumo yatshavbo ya mafuni, yi na ningedwa ga lihundzu nya sihathwa sa oyu a Khusegidego ngudzu. Mufumo waye khwa kala gupindruga, vafumeli vatshavbo va na mu khozela ni gu mu yingisa.

Joyele 2:32

Watshavbo wule a ranago lina la Pfhumu Nungungulu a na vbanyiswa; kholu gigomoni gya Siyoni dhoropani ga Jerusalema, gu na manega gutshudziswa, kha nga edzi Pfhumu Nungungulu a ganedego khidzo, ni vbakari nya mitshaledwa va na manega vale va na gu bani va ranidwe khu Pfhumu Nungungulu.

Joyele 3:17

Khavbo avbo, mu na dzitini nya gukhenu: Eni kheni Pfhumu Nungungulu wanu, nyi vbanyago Siyoni, gigomoni gwangu nya gukatege; Lidhoropa la Jerusalema li na bani li kategide, vathu nya mambe mayigo, gima kha va na li khozisa gambe.

Obhadhiya 1:21

Avo va nga palago va na gwela gigomoni gya Siyoni, gasi guya lamula gigomo gya Esawu, mufumo wakone wu na bani wuri wa Pfhumu Nungungulu.

Mikeya 2:12

Gasi olu, nyi na bwelo khavbo nyi tombanisa vathu vago vatshavbo uwe Jakobe, nyi tshanganisa ni mitshaledwa ya Israyeli; nyi na va pata dangamwedo nga dzinvuta dza Bhozira, nga tshambi wu guromo phandroni, gu na pwala ligwaha nya likhongolo, khu kotani nya gutale nya vathu.

Mikeya 2:13

Moyo a na thanga mbeli a tula ndzila; avo va na ya bela khu mwanya va bwelo khavbo va duga khuwo gambe; mufumeli wawe a na thanga mbeli; ni Pfhumu Nungungulu, a na va gimbidzisa.

Mikeya 5:3

Khu guralo, a na va ningela kala gikhati oyu a lumwago a na velegago. Khavbo vandriyaye va nga tshalago, va na wuyago vata dzi tshanganisa ni va na Israyeli.

Mikeya 7:18

Khu mani uwe Nungungulu a fananago ni uwe, u tsetselelago guvivba, ni gu divalela guyeyisa ga mitshaledwa nya thomba yago? Pfhumu Nungungulu kha khali na gu vbisega khu likhulo gikhati gyatshavbo, kholu a gu tsaka khu gupwela wuhindzi.

Sofoniya 3:13

Mitshaledwa ya Israyeli kha yi na gira gambe guvivba, mwendro gu ganela malipha; kanani gwawe kha gu na manega gambe lidimi nya wudambane. Kholu va na hodza va khura va lala ligovbe nya ladi na va rude nyamba thusedzedwa khu muthu.

Sofoniya 3:20

Khu gikhati gyogyo, avbo nyi na gu bani nyi mi tshanganiside nyaluphye, nyi na mi thangela mbeli, nyi mi ningani lina nya wudhumo vbakari ga mafumbu yatshavbo ya tigoni, avbo nyi na gu wuyisago dzikhumbi dzanu dzatshavbo dzi nga bani dzi vbagedwe na mu gu dzi wona khu maho yanu, a ngu ganela Pfhumu Nungungulu.

Luka 1:33

A na fuma ndranga ya Jakobe kala gupindruga; mufumo waye gima kha wu na nga vbela.”

Gutuledwa 11:15

Ngilozi nya livbandre na dzimbili yi di womba pundru. Khavbo avbo, gu di pwala ndzadzini na va gu kulungela khu tshivba, khavo: “Olu, Mufumo nya litigo wa gu lumba Pfhumu yathu, ni Kristo a na fumago kala gupindruga nya gupindruge.”