Mavingu 6:16 - Bhibhiliya Nya Guage

¹⁶ Somo livbandre na gimwegyo silo a si vengago Pfhumu Nungungulu, nya livbandre na sivili si gorosago hefemulo waye, a gu esi:

Mavingu 6:16 Iomraidhean Croise

2 Dzipfhumu 21:16

Gu diga nya esi, Manasi vbaladzide gambe novba nya wungi ngudzu nyambana nandru, kala a tadza Jerusalema gwatshavbo khuwo, gukhugela mahegiso kala mahegiso, vbavbandze nya gighoho gyaye a nga ghohisa khigyo va na Judha, giride silo nya guvivbe mahoni ga Pfhumu Nungungulu.

Joba 5:19

Ambari wa gu dugeledwa khu livbandre na mweyo dzimhango, uye a na gu vbulugisa, guvivba ga iyo nya livbandre na dzimbili, kha gu na nga gutshanisa.

Dzindzimo 11:5

Pfhumu Nungungulu a ngu wona oyu nya gululame ni oyu nya guvivbe, a venga oyu a golago wughevenga.

Dzindzimo 5:7

Gasi eni, khu lihaladzo lago nya likhongolo, nyi ngu bela nyumbani gwago; nyita khidzima nyi gu khozela khu githawo nyumbani gwago nya gukatege.

Mavingu 11:1

Gikalo nya wudambane manyala ga Pfhumu Nungungulu, aholu Uye a gu nengela khu pimo nya lisine.

Mavingu 11:20

Pfhumu Nungungulu a gu nyenya va nya myonyo yi vivbidego, aholu a ngu nengedziswa khavo va gimbilago khu ndzila nya gululame.

Mavingu 12:22

Pfhumu Nungungulu a ngu vengana ni va nya malipha, aholu a gu tsakiswa khu avo va ganelago lisine.

Mavingu 17:15

Uye a emelago muthu nya gighohi, khuye gambe a konago muthu nya gululame; satshavbo si vivbide mahoni ga Pfhumu Nungungulu.

Mavingu 20:10

Gu rengisela vathu khu mipimo nya wukanganyisi, silo nya gunyenyeze mahoni ga Pfhumu Nungungulu.

Mavingu 20:23

Guthumisa mipimo mivili wudambane, silo nya gunyenyeze mbeli ga Pfhumu Nungungulu ni sikalo nya wukanganyisi, silo nya gunyenyeze.

Mavingu 21:4

Maho nya gu dzi khusedze ni monyo nya matshandza, mwenge wa va nya guvivbedwa khu monyo, gambe si ngu va ghohisa.

Mavingu 3:32

Kholu Pfhumu Nungungulu kha goli va nya guvivbedwa khu myonyo, aholu a gu tsakiswa khu va nya gululama.

Mavingu 30:18

Somo silo siraru si nyi samadzisago ngudzu, nigyo nya wu na nyi si gi pimigo;

Mavingu 30:21

Silo siraru si ndrendremedzisago mafu, ina, ni sina ma si kodzigo gu si tiyela, a gu esi:

Mavingu 30:24

Silo sesi sa sina sidugwana ngudzu mafuni momu, aholu si gengede, si tade khu guti ngudzu.

Mavingu 30:29

Somo silo siraru si gu ni magimbilelo nya gutsakise, ni igyo nya wu na gi gimbilago khu matshandza.

Mavingu 6:15

Khu guralo, libango li na mu thegela khu gipitipiti; khu githugedza a na thega a mbemba nyamba wuga gambe.

Mavingu 6:17

Maho nya gu dzi gugumugise, lidimi nya guganele malipha, mandza ma vbaladzago novba nyambana nandru,

Mavingu 8:13

Uye a thavago Pfhumu Nungungulu, a gu nyenya silo nya guvivbe; nyi ngu nyenyana ni matshandza, gu dzi khusedza, dzindzila nya guwegele, ni magana nya gunyenyeze.

Jeremiya 26:15

Gambe dzitini gwadi nya gukhenu, mwa gu nyi songa, mu na bani mu vbaladzide novba wu gu mwalo nandru vbatshani gwanu, vbatshani nya lidhoropa leli ni vbatshani nya vavbanyi vaye; kholu Pfhumu Nungungulu a nyi rumede guta mi pwadzelani dzindzeveni gwanu yatshavbo magana yaya.

Amosi 1:11

Pfhumu Nungungulu a ngu ganela kharati, khuye: Khu kotani nya sighoho siraru mwendro sina sa Edhomi, kha nyi na bweledza tsayiso, kholu lundride ndriyaye khu litshari, a mu tshanisa nyamba mu pwela wusiwana, a simama gu khala ni giviti khuye gikhati gyatshavbo.

Amosi 1:3

Pfhumu Nungungulu a ngu ganela kharati, khuye: “Khu kotani nya sighoho siraru sa Dhamasiko mwendro sina, kha nyi na bweledza tsayiso, kholu va khothede Gileyadhi, va mu gonya khu migonyo nya dzisimbi.

Amosi 1:6

Pfhumu Nungungulu a ngu ganela kharati, khuye: “Khu kotani nya sighoho siraru sa Gaza mwendro sina, kha nyi na bweledza tsayiso, kholu va dzegide vathu va va yisa wugumbini, gasi vaya va rengisa ga Edhomi.

Amosi 1:9

Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Tiro, kha nyi na bweledza tsayiso, kholu yiside gidzemo nya vathu wugumbini aya va rengisa ga Edhomi, nyamba alakanya gidzumeledzwano nya wundruye.

Amosi 2:1

Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Mowabhi kha nyi na bweledza tsayiso, kholu vbiside marambo ya mufumeli wa Edhomi kala ma khala nguma.

Amosi 2:4

Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Judha, kha nyi na bweledza tsayiso. Kholu va kanyiside nayo wa Pfhumu Nungungulu ni gumba vegisa sileletelo saye, aholu a di dzumela gu kanganyiswa, khu vanungungulu nya malipha, vanungungulu va nga khozedwago khu vababe vawe.

Amosi 2:6

Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Israyeli, kha nyi na bweledza tsayiso. Kholu va ngu rengisa muthu nya gululame khu dzitsapawu, va rengisa muhamugi khu patwa nya silato.

Zakariya 8:17

ni moyo wanu a nga pimisi guvivba monyoni gwaye, mu wugelana khu gyanu, ambari gusambanya malipha; kholu Eni nyi ngu si nyenya satshavbo soso; a ngu ganela Pfhumu Nungungulu.

Dhewuteronome 23:18

Khu guralo, u nga tshuki u yisa Nyumbani ga Pfhumu Nungungulu wago, dzitsapawu dzi manwago khu ndzila yeyi nya wubhayi nya vanyamayi mwendro nya vama, mwendro gulivba khidzo gusambanya gwago; kholu wubhemba nya wukhongeli nya malipha wu nyenyezide mahoni ga Pfhumu Nungungulu.

Dhewuteronome 24:4

mwama nya guhegule gu mu dzega, a nga mu tutumisa, mwalo fanelo nya gu mu dzege gambe a khala mwangadzi waye, kholu nyamayi yoyu, nyenyezisidwe mbeli ga Pfhumu Nungungulu; khu kharato, u nga ghohisi litigo lile Pfhumu Nungungulu wago a na gu ningago li khala thomba yago.

Dhewuteronome 25:16

Kholu muthu watshavbo a girago wu kanganyisi, a gu gira manyala mbeli ga Pfhumu Nungungulu wago.

Gutuledwa 21:27

Dhoropani gakone gima kha gu na bela gilo nya gunyenyeze, ni vathu va girago guvivba ni malipha; aholu va na bela basi vale va lovidwego libhukuni nya womi la Nvutana.