Malakiya 1:6 - Bhibhiliya Nya Guage

⁶ Pfhumu Nungungulu a ngu ganela ga vaphasi nya mhamba, khuye: Gyanana gi ngu gola babe waye ni githumi nigyo gi ngu ninga githawo ga mune waye; eni nya gu bani nyiri babe wanu, khu gevbini githawo mu nyi ningago?

Malakiya 1:6 Iomraidhean Croise

Dzindzimo 123:2

Kha nga sithumi nya vama si virelago gu tshudwa khu mune wawe niso nya vanyamayi, si virelago gu tshudwa khu pfhumugadzi yawe, kharato nethu ha gu khedzisela uwe Pfhumu Nungungulu wathu, na hi gu lirela gukhethu u hi pwela wusiwana.

Ekisodha 20:12

Rungudza babe ni mayi wago, gasi ma engedzedwa matshigu yago nya guvbanye tigoni u na ningwago khu Pfhumu Nungungulu wago.

Mavingu 17:6

Gihugu nya wufumu gya sikhosane, khu vatugulu, ni wudhumo wa sanana khu vavelegi.

Mavingu 30:11

Gu na ni vathu vale va valago babe wawe, ambari ni gumba zundza mayi wawe.

Mavingu 30:17

Maho nya muthu a kanyisago babe waye, ni gumba yingisa mayi waye, ma na rumbudwa khu vamahigonganye, ma rothedwa khu sifondro nya lighama.

Isaya 1:2

Yingisani, enu dzindzadzi, tula ndzeve, uwe litigo, kholu Pfhumu Nungungulu a ngu ganela, khuye: “Nyi velegide sanana nyi si dandrisa, aholu sa gu nyi wugela.

Isaya 43:23

Kha wa nyi resela dzinvuta guta gira miningelo nya miphaso nya guvbiswe, ambari gu nyi zundza khu dzimhamba dzago; eni kha nya gu lemedza khu gu lomba miningelo nya guhodze, ambari gu gu garadza khu gu nyi vbisela libani.

Isaya 45:10

Libango ga uye a embelago babe waye, khuye: U nyi velegede ginani? Ni ga mayi waye, khuye: “Khu ginani u nyi velegidego?”

Isaya 64:7

Olu mwalo ni muthu moyo a lombelelago khu lina lago, gambe mwalo ni moyo a hidzimelago vbafuvbi gwago; kholu u ngu hi sihela khovbe yago, u ngu hi mbembisa khu kotani nya guvivbe gwathu.

Isaya 64:8

Gasi olu, uwe Pfhumu Nungungulu, Uwe khuwe Babe wathu, ethu hi libumba, uwe khuwe muwumbi wathu; ethu hatshavbo hi thumo nya mandza yago.

Jeremiya 23:11

Pfhumu Nungungulu a ngu ganela, khuye: “Simbari vaprofeti ni vaphasi nya mhamba; vatshavbo va gu thuma silo nyamba sadi, ni nyumbani gwangu va gu gu nyenyezisa.”

Jeremiya 3:4

Olu, wa gu lila avbo gwangu, khuwe: Baba wangu, uwe u diri pari ya wudzahani wangu, gani?

Jeremiya 31:9

Va na wuya na va gu lila, nyi na va hetedza na nyi gu va bavbula marongo, nyi na va yisa mitsongoni nya mati khu ndzila nya gululame, mwalo a na tshunganelago; kholu Eni nyi womo kha nga babe wa Israyeli, ni Efrayimi khuye matiwula yangu.

Jeremiya 35:16

Situgulwana sa Jonadhabhi, mwamana wa Rekabhi, sa gu landrisa sileletelo va ningidwego khu kokwe wawe, aholu vathu vava kha va nyi yingisi.”

Ezekiyeli 22:26

Vaphasi vaye nya mhamba va gu hambanisa nayo wangu, ni gunyenyezisa sombo sangu nya guage; kha va kodzi gu hambanisa igyo nya guage nigyo nya gunyenyeze, ambari gu hambanisa igyo nya gulolele nigyo nya guage, kha va khathali khu litshigu langu nya Sabhadho; khu guralo, nyi ngu nyenyeziswa vbakari gwawe.

Hoseya 12:8

Efrayimi a di ganela, khuye: “Nyi khade gitetema khu gu ghanya thomba nya yingi! Ga mithumo yangu yatshavbo nyi giridego, kha va na mana avbo gwangu guvivba mwendro gighoho.”

Hoseya 4:6

Vathu vangu va pfhungumudwe, khu gumbana mapimo. Kholu uwe u bombide guti, eni neni kha nyi gu vbweti, u khala muphasi nya mhamba mbeli gwangu, kholu u hambanide ni nayo wa Nungungulu wago, eni neni nyi na divala khu sanana sago.

Hoseya 5:1

Upwani esi enu vaphasi nya mhamba! Yingisani nenu va nyumbani ya Israyeli, nenu va nyumbani ya mufumeli! Kholu gulamudwa gogu gwa gu lumba enu, kholu mu khade milaphwi dhoropani ga Misipa, ni ligoga li ladzidwego gigomoni gya Tabhori.

Levhi 19:3

Moyo ni moyo nya enu a na ninge githawo mayi waye, ni babe waye, mu vegedza matshigu nya Sabhadho yanu. Eni kheni Pfhumu Nungungulu wanu.

Sofoniya 3:4

Vaprofeti vawe kha va phasi gilo, va mwalo githawo, vathu nya wundzundzwane; vaphasi vawe nya mhamba, va nyenyeziside wulanga nya miphaso, va wegedza nayo.

Malakiya 2:1

Gasi olu, nayo yoyu wa gu lumba enu vaphasi nya mhamba,

Malakiya 2:10

Ina hatshavbothu hi mwalo babe moyo basi, gani? Ina khandruye Nungungulu wamoyo a hi vangidego, gani? Khu ginani hi venganago khu gyathu, hi nyenyezisa gidzumeledzwano gya vakokwe vathu?

Malakiya 2:8

Aholu enu mu di ndreya ndzilani, mu tshunganisa va nya gutala khu sihevbudzo sanu; mu tshungunula gidzumeledzwano nyi giridego ni Levhi, a ngu ganela Pfhumu Nungungulu nya Tshivba Yatshavbo.

Malakiya 3:5

Nyi nata wonega vbakari gwanu gasi guta lamula, nyi na khala fakazi yile nya guwone gwadi ni gu wugela valoyi, sibhayi, ni vale va sambanyago malipha; nyi tsayisa ni vale va kanganyisago sithumi, va tshanisa dzinoni, sigulungu, ni valuveli, vale va si nyi ningigo githawo, a ngu ganela Pfhumu Nungungulu nya Tshivba Yatshavbo.

Matewu 15:4

Kholu, Nungungulu layide, khuye: ‘Rungudza babe ni mayi’, ni gukhuye: ‘Uye a hembululago babe waye, mwendro mayi waye, fanede gu songwa.’

Matewu 15:6

muthu yoyo tshulegide mahoni gwanu. Mwalo gambe giguruvedzo nya guphase babe mwendro mayi waye. Mu tshipisa, kharati, nayo wa Nungungulu khu kotani nya tumbunugo wanu.

Matewu 19:19

rungudza babe ni mayi; gola muthu kwanu kha nga idzo u dzi golago khidzo.”

Matewu 6:9

“Khu kharato, lombelelani, kharati: ‘Baba wathu u guromo Ndzadzini, lina lago li na rungudzwe.

Matewu 7:21

“Khandri watshavbo wule a gukhuye: Pfhumu, Pfhumu, a na belago Mufumoni wa Ndzadzini. Aholu a na bela basi uye a girago gugola ga Babe wangu a guromo Ndzadzini.

Marko 10:19

U ngu yiti milayo yi gu, khiyo: ‘U nga songi; u nga bhayi; u ngabi; u nga singedzi; u nga kanganyisi; rungudza babe ni mayi wago.’ ”

Marko 7:10

Kholu, Mosi a di khuye: ‘Rungudza babe wago ni mayi wago.’ Bwelo khavbo, khuye: ‘Uye a hembululago babe, gani mayi waye, tsayiso waye khu gufa!’

Luka 10:29

Aholu muhevbudzi nya Nayo khu gu vbweta gu dzi vhikela, a di wudzisa, khuye: “Gasi khu mani muthu khwathu?”

Luka 18:20

U ngu yiti milayo yi gu, khiyo: U nga bhayi, u nga songi, u nga bi, u nga singedzi muthu, mwendro gu gira wukustumunyu nya malipha; rungudza babe wago ni mayi wago.

Luka 6:36

Girelani wuhindzi vakwanu kha nga Babe wanu a gu ni wuhindzi.

Luka 6:46

“Khu ginani mu nyi ranago: ‘Pfhumu, Pfhumu,’ mu si giri iso nyi mi embelago?

Vaefeso 6:2

Nayo nya guhegule a gu ni gitumbiso khoyu a gukhuye: “Ninga githawo babe ni mayi wago.” Gitumbiso gyakone khegi:

Dhewuteronome 1:31

niso a giridego gambe giwulani, avbo mu wonidego nya gukhenu Pfhumu Nungungulu wanu, Uye a mu pharide khu libogo kha nga muthu a pharago gyanana gyaye khu libogo, ndzilani gwatshavbo mu gimbidego, kala mu ta vboha wulanga wowu.

Dhewuteronome 32:6

Ina khidzo kharati, mu bongago khidzo Pfhumu Nungungulu, enu vathu nya sipumbu, nya guhandruge, gani? Gasi khandruye babe wago, ni muvangi wago, gani? Khuye a gu wumbidego a wuya a gu tiyisa!

Dhewuteronome 5:16

Rungudza babe ni mayi wago, kha nga idzo a gu rumidego khidzo Pfhumu Nungungulu wago, gasi matshigu yago ma engedzedwa u kodze guya khala gwadi ga litigo u ningwago khu Pfhumu Nungungulu wago.

1 Pedro 1:17

Mwa gu lombelela na mu rana, khenu: “Baba,” Uye a lamulago vathu vatshavbo nyamba khedza khu khovbe, a khedzago khu mavbanyelo ya muthu ni muthu; khu kharalo, mu fanede gu mu ninga githawo matshiguni nya guvbanye gwanu mafuni momu.