Luka 2:4 - Bhibhiliya Nya Guage

⁴ Josefe nuye, a di khuga khu dhoropani ga Nazareta wa Galileya a gu hongola, tigoni ga Dhavhidhe, a gu Bhetlehema gwa Judheya, kholu a diri wa nyumbani ya Dhavhidhe,

Luka 2:4 Iomraidhean Croise

Genesi 35:19

Rakeli a difa a gu dzingwa ndzilani nya guhongole Efrata, a gu Bhetlehema.

Genesi 48:7

“Na nyi guta khu Padhani-Arami, Rakeli a di nyi fela tigoni ga Khanani, vbakari nya ndzila, na gu tshade pfhukhana nya gukari gu vbweta gu vboha Efrata; nyi mu dzingide vbale ndzilani nya guhongole Efrata, a gu Bhetlehema.”

Mikeya 5:2

Ni uwe Bhetlehema wa Efrata, ambari u gu dugwana vbakari nya mazanazana ya Judha, khavbo gwago gu na duga uye a na khalago mufumeli wa Israyeli, uye a nga bani ari gitugulwana gukhugela gikhatini gya gale, gukhugela matshiguni ma si vbeligo.

Matewu 1:20

Na nga gu vinga mano yakone, a di tumbulugedwa khu ngilozi ya Pfhumu khu ndroroni, yita, khiyo: “Josefe, mwamana wa Dhavhidhe, u nga kanakani gu hakha Mariya, mwangadzi wago, kholu mimba a gu nayo khya Liphuvbo nya Guage.

Matewu 2:23

Iyo a ngaya khalago dhoropani ga Nazareta. Gu di tadzisega, kharati, iso si nga ganedwago khu vaprofeti, khavo: “A na ranwa Munazarenu.”

Luka 2:3

Muthu ni muthu a di ya lovedwa tigoni gwawe nya mavelego.

Luka 2:5

gasi guya dzi lovedzisa gumogo ni Mariya, mwangadzi waye, a nga bani ari ni mimba.

Luka 4:16

A dita Nazareta, avbo a nga dandrelago avbo. Kha nga giolovedzo gyaye, a di bela nyumbani nya nombelo khu litshigu nya Sabhadho. A di khuga a ema, gasi gu hevbula libhuku.

Johane 1:46

Natanayeli a di khuye: “Ina gu ngu dzi kodza gu duga gilo nya gyadi khu Nazareta?” Filipi a di khuye: “Delu uta wona.”

Johane 7:42

Ina kha yi ganeli Milowo khiyo Kristo a na dugela nyumbani ya Dhavhidhe, tigoni ga Bhetlehema, a gu umo a nga velegedwa umo Dhavhidhe, gani?”

Rute 1:19

Khu guralo, va di hongola vatshavbo kala va nga vbohago Bhetlehema. Na va gu bela Bhetlehema, lidhoropa latshavbo li di samala khu mahungu yawe, va ganela, khavo: “Khandruye oyu Nowemi, gani?”

Rute 2:4

Khu guralo, Bhowazi a di vboha na guta khu Bhetlehema, a ta embela vavbweri, khuye: “Pfhumu Nungungulu a na khale ni enu!” A navo va mu phindrula, khavo: “Pfhumu Nungungulu a na gu kategise!”

Rute 4:11

Vathu vatshavbo va nga bani varomo vbatshanganotunu, gumogo ni madhota va di hakha, khavo: “Ethu hi dzifakazi, Pfhumu Nungungulu, a na gire nyamayi yoyo a belago muhuno nyumbani gwago, kha nga Rakeli ni Liya, khu wuvili wawe va vbahidego nyumba ya Israyeli. Khu guralo, uwe Bhowazi tiya longo omu Ewufrate, ni lina lago li na dhumiswe omu Bhetlehema.

Rute 4:17

Vaakelane vaye nya vanyamayi, va di gi riya lina, khavo: “Nowemi velegide gyanana, va gi rana khavo khu Obhedhi. Oyu khu babe wa Jese, babe wa Dhavhidhe.”

1 Samuweli 16:1

Pfhumu Nungungulu a di embela Samuweli, khuye: “Kala lini nu nga gulila khu Sawule. Avbo eni nyi mu nyenyidego gasi a si fumeli gambe Israyeli? Olu tadza gigasi gyago khu mafura uta; nyi na gu rumela ga Jese wa Bhetlehema, kholu vbakari nya sanana saye, nyi hathide moyo gu khala mufumeli.”

1 Samuweli 16:4

Khu guralo, Samuweli a di gira iso a nga embedwago khu Pfhumu Nungungulu, a ta Bhetlehema. A di khingwa khu madhota ya dhoropani, na va gu ndrendremela va mu wudzisa, khavo: “Guta gwago khwa gurula, gani?”

1 Samuweli 17:12

Dhavhidhe a diri gyanana gya Jese, Muefrata, givelegwa gya Bhetlehema wa Judha. Jese a diri ni livbandre na siraru sanana, gambe a di gumbide gikhatini gya Sawule.

1 Samuweli 17:58

Sawule a di mu wudzisa, khuye: “Lidzaha langu, u mwame mani?” Dhavhidhe a di hakha, khuye: “Eni nyi mwamana wa githumi gyago Jese wa Bhetlehema.”

1 Samuweli 20:6

Babe wago a gu nyi dilela, mu embele, khuwe: Dhavhidhe a nyi lombide gukhuye nyi mu dige a hongola Bhetlehema, dhoropani gwaye nya mavelego, kholu gu na ni khuwo nya mhamba nya mwaga wu girwago iyoyo nya lihundzu laye latshavbo.