Luka 14:21 - Bhibhiliya Nya Guage

²¹ Githumi gi di bwelela giya tivisa esi ga mune ndranga. Khavbo avbo, mune ndranga a di goroga, a gu embela githumi gyaye, khuye: ‘Indra, olu kamwe, dhoropani gwatshavbo, u gimbila u rana avo u na va manago mu dzindzilani: Sisiwana, silima, sikhumu ni sikhurubwa.’

Luka 14:21 Iomraidhean Croise

Dzindzimo 2:12

Khidzimani mawundruni ga mwamana gasi a si gorogi, mu si mbembi na mu ngari ndzilani, kholu hwane nya gikhatinyana a na tala khu likhulo. Va kategide vatshavbo vale va thavelago gwaye.

Dzindzimo 38:7

Giwunu gyangu gya gu vbisa ngudzu gu mwalo givbango nya gyadi milini gwangu;

Isaya 33:23

Dzingodzi nya dzingalava dzaye dzi nyegide, ni miningwati yaye, kha ya tiya, matanga yaye, kha ma ghwimbega. Khavbo avbo, va na kabaniswa pfimba nya phango nya wungi wu phangidwego; ambari ni silima si na phanga niso.

Isaya 35:6

Silima si na ndragandraga kha nga dzimangwa, ni malimi nya sidudu ma na kulungela khu gutsaka, kholu mati ma na goga giwulani ni gu buga mitsongo mafuni nya gihala.

Jeremiya 5:1

Dzundrulugelani dzindzilani gwatshavbo ga Jerusalema, mu khedzani mitendrelani mu ta nyi embela mwendro saye mu na mana muthu moyo basi a tsakelago gululama ni gu gira ugo a gu lisine. Khavbo avbo, eni nyi na tsetselela Jerusalema.

Zakariya 11:11

Na gi tshudwe gidzumeledzwano litshigu lolo, sisiwana nya tshambi si nga bani si nyi yingisa, si di dziti gukhiso giyeyedzo gile mahungu ya Pfhumu Nungungulu.

Zakariya 11:7

Eni nyi khade muhavisi nya tshambi wu yiswago gusongwatunu, dzinvuta nya sisiwana nya tshambi; eni nyi di phara mapitso mavili: Limwedo nyi di li rana, kheni: “Wuhindzi” ilo nya wuvili kheni “Pwanano.” Nyi simama gu khala muhavisi nya tshambi.

Matewu 11:28

Deluni gwangu, enu mwatshavbo mu garadego ni gu lemedwa; eni nyi na mi hefemudza.

Matewu 11:5

Sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana.

Matewu 15:12

Vapizane vaye va di mu yela vaya mu embela, khavo: “Ina u ngu dziti nya gukhuwe Vafarisi va gorogide khu maganelelo yale u nga ganelago khayo, gani?”

Matewu 18:31

Vangana vaye, na va wone esi, va di garadzega, vaya tivisa pfhumu yawe iso si nga giregago.

Matewu 20:7

Va di mu hakha, khavo: ‘Ha gu hamuga muthu nya gu mu thumele.’ A di khuye: ‘Indrani nenu thembweni gwangu mu na hakha iso si vbwetegago.’

Luka 14:13

Wa gu dongisela buzo, rana sisiwana, silima, sikhurubwa ni sikhumu.

Luka 14:20

Gasi mumbe a di khuye: ‘Nyi ngari gu tshadha, khu kharato kha nyi manegi.’

Luka 14:22

Githumi gi di wuya gita, khigyo: ‘Pfhumu, nyi giride kha nga idzo u rumidego khidzo, aholu wu nga tshade wulanga.’

Luka 14:24

Nyi ngu mi embelani nya gukheni ni moyo nya vale nyi nga bani nyi va ranide kha na linga buzo wangu.’ ”

Luka 24:47

ni gupwani, khu lina laye, gu na hevbudzwa mayigoni gwatshavbo gu vbindrugedza mavbanyelo ni tsetselelo nya sighoho, gukhugela Jerusalema.

Luka 9:10

Na va wide, vapostoli va dita tshamusela ga Jesu satshavbo iso va nga gimbila va gu gira. Khavbo avbo, a di va dzega a hongola navo giwulani, kha guya Bhetisayidha.

Johane 9:39

Jesu, khuye: “Eni nyi dzude mafuni kha nga mulamuli, gasi vale va si wonigo va wone; ni gu vale va wonago va khale sikhumu.”

Vahebheru 13:17

Yingelani vathangeli vanu, mu landrisa sileletelo sawe. Kholu avo khavo va khedziselago gikhati gyatshavbo mihefemulo yanu, va na wudziswa khu Nungungulu khu kotani nya isoso. Mwa gu va yingelani, avo va na thuma na va tsakide, kholu, va gu thuma na va gu garadzega kha si na phasa gilo gwanu.

Vahebheru 2:3

Hi na vbulugisa guwani ethu, ha gu nyenya guvbanyiswa gogu nya gukhongolo? Guhegula khuye mune Pfhumu a nga tivisago guvbanyiswa gogu. Khu hwane, vale va nga mu pwago, vata hi tivisa ethu gukhavo lisine.

Jakobe 2:5

Yingisani gwadi, vandriyangu nya sigodwa, ina Nungungulu kha hatha sisiwana sa mafuni momu a si gira sitetema nya gukhodwe, si khala vahodzi nya thomba nya wufumu a nga tumbisago ga vale va mu golago, gani?

Gutuledwa 19:15

Khu kanani gwaye gu di duga litshari nya guvbire gasi gu paya khilo mayigo. Uye a na ma fumela khu ndronga nya dzisimbi; a na gamela maphisoni vbinyu nya likhulo la Nungungulu nya Tshivba Yatshavbo.

Gutuledwa 22:17

Liphuvbo ni ngadza Nvutana, vari, khavo: “Delu!” Ni wule a pwago a na ganele nuye, khuye: “Delu!” Wule a gu ni lidora a nate. Oyu a dzinago a na hakhe mahala mati nya guvbanye.

1 Samuweli 2:8

A ngu khusa gisiwana umo nya kudzudzwane ni gu dusa wusiwanani muhamugi, gasi gu va khadzisa gumogo ni dzipfhumu; ni gu va ninga thomba nya gikhalo nya wudhumo; kholu siseketelo nya mafu khya Pfhumu Nungungulu, vbatshani nya iso, handzegide litigo.

1 Samuweli 25:12

Khavbo avbo, madzaha ya Dhavhidhe ma di bwelela khu ndzila yawe, na va vbohide, va di ta tivisa satshavbo iso a nga ganela Nabhali.