Levhi 5:18 - Bhibhiliya Nya Guage

¹⁸ A na ningela ga muphasi nya mhamba matune nya nvuta nyamba hasa, yi hathidwego tshambini gwaye nya tengo wu na pimwago khu muphasi a ta gira phaso nya gulivbe nandru. Muphasi nya mhamba a na mu girela phaso nya guditshedzwe gihoso a gi giridego khu guphazama, khu guralo a na tsetseledwa nandru yoyo.

Levhi 5:18 Iomraidhean Croise

Levhi 1:3

A gu vbweta gu gira ningelo nya phaso nya guvbiswe nari wa mombe, a na dusa matune nyamba hasa, a ta wu bikela nyangwatunu nya Tshatsha nya Tshangano, gasi aya mana gu hakhwa gwadi mbeli ga Pfhumu Nungungulu.

Levhi 1:4

Khavbo avbo, a na handzega mandza yaye hungoni nya gifuyo nya miphaso nya guvbiswe, gasi mhamba yi hakhwe gwadi, a kodza gu mana gutsetseledwa sighoho saye.

Levhi 14:12

Muphasi nya mhamba a na dzega nvuta mweyo a yi bikela kha nga ningelo nya phaso nya gulivbe milandru gumogo ni ndrengo nya mafura a na si ndziwitela mbeli ga Pfhumu Nungungulu khu nayo nya bikelo.

Levhi 4:20

a na gira kuzi yeyi idzosaye ni idzo a nga girago kuzi nya phaso nya ditshedzo, khu magirelo yoyo va na Israyeli va na ditshedzwa sighoho sawe satshavbo.

Levhi 5:17

Muthu a gu ghoha khu guphazama, nasiri kha gwenye a gira gilo gimwegyo nya esi si himbedzedwago khu Pfhumu Nungungulu, uye nuye ghohide, gambe a na rwala nandru waye.

Levhi 5:19

Phaso nya gulivbe nandru. Kholu mahoni ga Pfhumu Nungungulu muthu yoyo a di ghohide kamwe khu lisine.”

Mitengo 15:24

khu guralo, mwa gu bani mu ghohide khu wuhangi, tshangano wu si dziti, tshangano watshavbo wu na dusa ningelo nya guvbiswe khu gimombyana gasi gu khala mahema nya gunungele nya gu tsakise Pfhumu Nungungulu, ni ningelo nya iso nya guhodzwe, ni ningelo nya wadwa, kha nga nayo wakone; tshangano wu na ningela nyamabhongwe gasi gu khala phaselo nya gu ditshedzwe sighoho.