Levhi 19:3 - Bhibhiliya Nya Guage

³ Moyo ni moyo nya enu a na ninge githawo mayi waye, ni babe waye, mu vegedza matshigu nya Sabhadho yanu. Eni kheni Pfhumu Nungungulu wanu.

Levhi 19:3 Iomraidhean Croise

Genesi 48:12

Khavbo avbo, Josefa a di va dusa vbamarumbitunu ga babe waye, a gu khidzima mbeli gwaye.

Nehemiya 9:14

U va giride vati litshigu lago nya guage Sabhadho, khu lito la githumi gyago Mosi, U va tivisa sirumo, sileletelo ni nayo.

Ekisodha 16:29

Wonani nya gukhenu Pfhumu Nungungulu a mi ningide Sabhadho, khu kotani nya ugo, a ngu mi ningani khu litshigu nya livbandre na limwedo, guhodza gu ninganago matshigu mavili. Khu litshigu nya livbandre na mavili, muthu ni muthu a na khale wulanga waye, mwalo a dzumedziswago gukhuga wulanga waye, litshigu lolo nya livbandre na mavili.”

Ekisodha 20:12

Rungudza babe ni mayi wago, gasi ma engedzedwa matshigu yago nya guvbanye tigoni u na ningwago khu Pfhumu Nungungulu wago.

Ekisodha 20:8

Alakanya litshigu nya Sabhadho, u li agisa.

Ekisodha 21:15

Uye a bayisago babe mwendro mayi waye, fanede gu songwa.

Ekisodha 21:17

Uye a valago babe waye mwendro mayi waye, fanede gu songwa.

Mavingu 1:8

Mwanangu, yingisa sileletelo sa babe wago, u nga kanyisi sihevbudzo sa mayi wago,

Mavingu 23:22

Yingisa babe wago a nga gu velegago; u nga kanyisi mayi wago a gu gumba.

Mavingu 30:11

Gu na ni vathu vale va valago babe wawe, ambari ni gumba zundza mayi wawe.

Mavingu 30:17

Maho nya muthu a kanyisago babe waye, ni gumba yingisa mayi waye, ma na rumbudwa khu vamahigonganye, ma rothedwa khu sifondro nya lighama.

Isaya 58:13

Wa gu dzi vegisa u si nyenyezisi Sabhadho, u si thumi iso si godwago khu monyo wago khu litshigu langu nya guage, litshigu nya Sabhadho u li rana nari litshigu nya gutsake li phasedwego Pfhumu Nungungulu, li yelago gu zundzwa; wa gu li rungudza u si yi umo u gu golago, u si vbweti gu gira iso uwe u si golago, ambari gu ganela silo nya guvivbe,

Ezekiyeli 20:12

Nyi va ningide gambe dzisabhadho dzangu, dzi khale kha nga giyeyedzo vbakari gwawe, gasi va kodze guti gu gukhavo eni kheni Pfhumu Nungungulu, nyi va agisago.

Levhi 11:44

Eni kheni Pfhumu Nungungulu wanu, Eni nyi na mi agisa mu simama na mu agide, kholu Eni nyi agide; mu nga dzi nyenyezisini mwabune khu kotani nya sirengo satshavbo soso nya gukhwirire si gimbilago mafuni.

Levhi 19:25

Khu mwaga nya livbandre, mu na hodzani enu mihandro yakone, gasi misimbo yi mi velegela mihandro nya gutale. Eni kheni Nungungulu wanu.

Levhi 19:30

Mu na vegisa matshigu yangu nya dzisabhadho, mu ninga githawo Wulanga wangu nya Guage. Eni kheni Pfhumu Nungungulu.

Levhi 19:31

Mu nga khidzimeli maphuvbo nya vafi, mu ngayi ga vanyamandriki, mwendro ga va nya gulola dzisolo mu ya wudzisa gilo. Mu nga dzi nyenyezisi khisoso. Eni kheni Pfhumu Nungungulu wanu.

Levhi 19:34

Muluveli a vbanyago vbakari gwanu, mu na mu phara kha nga wa na gyanu; mu na mu haladza gukhwatshi khu edzi mu dzi haladzago khidzo, kholu enu nenu, mu diri valuveli tigoni ga Egipito. Eni kheni pfhumu Nungungulu wanu.

Levhi 23:3

Mu na thuma livbandre na limwedo matshigu, aholu eli nya livbandre na mavili, litshigu nya Sabhadho nya guhefemule, nya tshangano nya guage. Mu nga thumi thumo khu litshigu lolo. Litshigu nya Sabhadho nya gurungudze Pfhumu Nungungulu, malangani gwatshavbo mu vbanyago umo.

Levhi 26:2

Mu na vegisa matshigu yangu nya dzisabhadho ni gu ninga githawo wulanga wangu nya guage. Eni kheni Pfhumu Nungungulu wanu.”

Malakiya 1:6

Pfhumu Nungungulu a ngu ganela ga vaphasi nya mhamba, khuye: Gyanana gi ngu gola babe waye ni githumi nigyo gi ngu ninga githawo ga mune waye; eni nya gu bani nyiri babe wanu, khu gevbini githawo mu nyi ningago?

Dhewuteronome 27:16

Libango ga wule a vengago babe mwendro mayi waye. Vathu vatshavbo va na hakha, khavo: “Amen!”

Dhewuteronome 5:16

Rungudza babe ni mayi wago, kha nga idzo a gu rumidego khidzo Pfhumu Nungungulu wago, gasi matshigu yago ma engedzedwa u kodze guya khala gwadi ga litigo u ningwago khu Pfhumu Nungungulu wago.

Vahebheru 12:9

Vavelegi vathu nya giwuthu va di gu hi kawuka, ethu hi di va ninga githawo. Ina hi mwalo fanelo nya guyingele khu githawo ngudzu Babe wathu nya liphuvbo, gasi hi mane guvbanya, gani?