Levhi 10:19 - Bhibhiliya Nya Guage

¹⁹ Aroni a di hakha Mosi, khuye: “Avo va ngari gu ningela muhuno olu phaso wawe nya ditshedzo ni phaso wawe nya guvbiswe mbeli ga Pfhumu Nungungulu, kha nga eni neni nyi giridego kharato. Nari gupwani nyi di hodzide muhuno phaso nya ditshedzo, ina na wu hakhidwe gwadi wu salalalegisa Pfhumu Nungungulu, gani?”

Levhi 10:19 Iomraidhean Croise

Isaya 1:11

Dza gu nyi phasa ginani dzimhamba dzanu nya dzingi? A ngu wudzisa Pfhumu Nungungulu. Nyi garade khu miphaso yanu nya guvbiswe nya dzinvuta ni mafura nya sifuyo nya gunone. Kha nyi tsakiswi khu novba nya sikuzyana, nya dzinvuta, ni vanyamabhongwe.

Isaya 1:15

Avbo mu khusedzago mandza yanu mu lombelela, eni nya gu siha khovbe yangu; ambari mwa gu engedzela milombelo yanu, eni kha nyi na mi yingisa, kholu mandza yanu ma tade khu novba.

Jeremiya 14:12

“Ambari va gu hala, eni kha nyi na yingisa gulila gwawe, va gu nyi girela dzimhamba nya guvbiswe ni dzimhamba nya guhodze, kha nyi na tsakiswa khidzo; nyi na va mbembisa khu matshari, ndzala ni mitungu.”

Jeremiya 6:20

Ma gu nyi phasa ginani mabani mu nyi reselago khu tigoni ga Sabha, ni mafura nya gunungele mu nyi reselago khu mayigoni ya hwindzo? Miphaso yanu nya guvbiswe ni dzimhamba dzanu kha dzi nyi nengedzisi.

Hoseya 9:4

Kha va na nga ningela miningelo nya miphaso nya vhinya ga Pfhumu Nungungulu, ni miphaso yawe va mu girelago, kha yi na mu tsakisa. Miphaso yawe, yi na fanana ni guhodza ga vamalile, vatshavbo va na gu hodzago va na nyenyeza khugo. Kholu guhodza gwawe gu na lumba basi avo; kha gu na bela Nyumbani ga Pfhumu Nungungulu.

Levhi 10:20

Mosi na pwide mahungu yaya a di salalega.

Levhi 9:12

Khu gulandrela, Aroni a di paya girengo nya phaso nya guvbiswe; sanana saye si di mu resela novba, uye a gu wu mitegedzela wubambe nya giluvelo.

Levhi 9:8

Aroni a di hidzimela vbagiluvelotunu a ya paya gikuzyana gasi gu handza gighoho gyaye.

Malakiya 1:10

Khu mani vbakari gwanu a na segago malimba nya Nyumba ya Nungungulu gasi gu si khondriswi gambe nilo nyambana fanelo vbagiluvelotunu gwangu? Kholu enu kha mu nyi salalegisi gambe, kha nyi na hakha gambe miphaselo yanu. A ngu ganela Pfhumu Nungungulu nya Tshivba Yatshavbo.

Malakiya 1:13

Mu engedza gambe, khenu: Hi garade khu satshavbo sesi, aholu mu simama gumba nyi ningani githawo, a ngu ganela Pfhumu Nungungulu nya Tshivba Yatshavbo. Mwa gu nyi reselani sirengo nya gubidwe, nya guhase niso nya gudwale mu ta nyi girelani khiso miphaso; ina mwa gu pimisani gukhenu eni nyi na si hakha na nyi tsakide khu mandzani gwanu, gani? A ngu wudzisa Pfhumu Nungungulu nya Tshivba Yatshavbo.

Malakiya 2:13

Gomo gambe gumbe guvivba mu gu girago. Mwa gu tadzani khu marongo giluvelo gya Pfhumu, khu gu lila ni gu keta; kholu Pfhumu Nungungulu kha nga gu dzumela gambe gu hakha miningelo yanu, ambari gu hakha khu matsenya ndruwo ya mandzani gwanu.

Dhewuteronome 12:7

Avbovbo, mu naya hodza mbeli ga Pfhumu Nungungulu wanu, mu naya nengela khu satshavbo mu na guya girago enu gumogo ni mapango yanu, mu nengela khu satshavbo esi a na bani a mi kategiside khiso Pfhumu Nungungulu wanu.

Dhewuteronome 26:14

Kha nya hodza miningelo nya gipandre nya likhumi na nyiri vbakari nya malilo yangu, ambari gu dusa na nyi nyenyezide, gambe gimwalo nyi nga dusago nyi ningela guphasela muthu a fudego; nyi yingiside lito la Pfhumu Nungungulu wangu, satshavbo u nyi rumidego, nyi giride.

Vafilipi 4:4

Nengelani ga Pfhumu; nyi ngu engedza gu mi embela, nengelani.

Vahebheru 7:27

Uye kha giri idzosaye ni vambe vaphasi nya vakhongolo nya mhamba: Kha gu vbwetegi ga uye, khu litshigu ni litshigu, gu ningela mhamba nya guhandze sighoho saye guhegula, a wuya khavbo a ningela mhamba nya guagise sighoho nya vathu. Kholu Uye ningede mhamba gumogo basi, gu vbela, khu gu dzi ningela uye wurumba waye.

Vahebheru 9:8

Khu kharato, Liphuvbo nya Guage li ngu hi hevbudza gukhilo na gu nga gu thuma makhuvini nya guhegule gu ranwago “Wulanga nya Guage,” yi nga segidwe ndzila nya gubele makhuvini nya wuvili gu ranwago “Wulanga nya Guage Ngudzu.”