Joyele 3:17 - Bhibhiliya Nya Guage

¹⁷ Khavbo avbo, mu na dzitini nya gukhenu: Eni kheni Pfhumu Nungungulu wanu, nyi vbanyago Siyoni, gigomoni gwangu nya gukatege; Lidhoropa la Jerusalema li na bani li kategide, vathu nya mambe mayigo, gima kha va na li khozisa gambe.

Joyele 3:17 Iomraidhean Croise

Joba 15:19

Avo va ningidwego litigo, li lumbago avo basi, li gu mwalo limbe lifumbu li vbindridego khavbo gwawe.

Dzindzimo 76:2

Nyumba yaye nya miphaso yomo Jerusalema, uye a gu khala gigomoni gya Siyoni.

Dzindzimo 9:11

Embelelani ga Pfhumu Nungungulu, a vbanyago Siyoni, tivisani sigiro saye vbakari nya mayigo.

Ekisodha 16:12

“Nyi pwide gubhonga ga sanana sa Israyeli. Ganela u va embela, khuwe: Gupfolani nya lidambo mu na hodzani nyama, vbadzimindrutunu mu na khurani khu sibaba. Mu na dzitini gukhenu Eni kheni Pfhumu Nungungulu wanu.”

Isaya 11:9

Malangani yatshavbo ya gigomoni gwangu nya gukatege, kha gu na manega guvivba mwendro gusongana, kholu litigo latshavbo li na tala khu guti gwa Pfhumu Nungungulu, kha nga mati ma tadzago yiphwa.

Isaya 12:6

Wombani mikulungwane mu tsaka, enu vavbanyi va Siyoni, kholu vbakari gwanu, khongolo khu Nyaguage wa Israyeli.”

Isaya 35:8

Gu na manega avbovbo ndzila nya yikhongolo nya likondro, yi na ranwago pwani Ndzila nya Guage; va nya gunyenyeza, kha va na vbindra khiyo. Yi emisedwe basi vathu va Nungungulu, khavo va na gimbilago khiyo, ambari nari sipumbu, kha va na dzimela.

Isaya 4:3

Vale va na tshalago gigomoni ga Siyoni, va simama gu khala Jerusalema, va na ranwa sihathwa sa Nungungulu; kholu malina yawe ma na bani ma lovidwe ga avo va vbanyago Jerusalema.

Isaya 46:13

Nyi ngu resa gululama gwangu, gambe gu mwalo hwindzo; ni guvbanyisa gwangu kha gu na hwela. Nyi na vega guvbanyisa gigomoni ga Siyoni, ni tigoni ga Israyeli, nyi na wusedza wudhumo wangu.

Isaya 52:1

Khendzuga! Khendzuga, Siyoni, ambala tshivba yago. Ambala guambala gwago nya wumburi, uwe Jerusalema, Lidhoropa nya gukatege; kholu gima kha va na bela gambe ndrani gwago va nyamba hana wugwera ni vale va dzi nyenyezisidego.

Isaya 56:7

avo navo nyi na va dzega nyi va yisa gigomoni gwangu nya gukatege, nyi ya va tsakisa Nyumbani gwangu nya Milombelo. Miphaso yawe nya guvbiswe ni dzimhamba dzawe, si na hakhwa siluveloni gwangu, kholu Nyumba yangu yi na ranwa nyumba nya Milombelo ga mayigo yatshavbo.

Jeremiya 31:23

Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: “La gu vboha litshigu nyi na kategisago litigo la Judha gumogo ni madhoropa yaye, avo va na ganela gambe magana yaya, khavo: Pfhumu Nungungulu a na gu kategise, uwe ndranga nya gululame, uwe gigomo nya gukatege!”

Jeremiya 31:40

Kova watshavbo wu dzudzugedwago sirumbi ni nguma, ni marembwe yatshavbo ni gitsongwana gya Kedhroni, kala matshanganoni nya Nyangwa nya Dzikavalu guya Khugadambo, gu na phasedwa Pfhumu Nungungulu. Gima kha wu na sasedwa mwendro gu khungumudwa kala gupindruga.

Ezekiyeli 20:40

Kholu, gigomoni gwangu nya gukatege, gigomo nya gulaphe gya Israyeli, a ngu ganela Mune Pfhumu Nungungulu, vbale ndranga yatshavbo ya Israyeli yi na nyi khozela, avbo eni nyi naya va hakha. Gambe, nyi naya va gurumedza gu nyi ninga miphaso ni miningelo yawe nya yadi nya mihandro nya guhegule, gumogo ni silo sawe satshavbo nya guage.

Ezekiyeli 37:6

Nyi na vega misivba gwanu, nyi bugisa nyama gwanu, nyi mi fenengedza khu lidowo, nyi thela gwanu liphuvbo, enu mu na vbanya. Mu na dziti gukhenu eni kheni Pfhumu Nungungulu.”

Ezekiyeli 43:12

Nayo nya Nyumba ya Nungungulu, khowu: Dzitshokhani gwatshavbo nya gigomo, dzibambe gwaye gwatshavbo, gu na bani gu agide ngudzu. Oyu khu nayo nya Nyumba ya Nungungulu.

Ezekiyeli 44:9

Mune Pfhumu Nungungulu, a ngu ganela kharati, khuye: Ni moyo muluveli, nyamba hana wugwera, ni gumba khathala khu Eni, a nga beli Wulangani gwangu nya Guage, ambari ni valuveli vatshavbo va vbanyago vbakari ga va na Israyeli.”

Ezekiyeli 48:35

Pfhuka wa maphuvbo yatshavbo wu diri wa likhumi na livbandre na mararu magumi mazana (18.000); lina nya lidhoropa, gukhugela litshigu lile li na pwani: Pfhumu Nungungulu womo vbale.

Dhaniyeli 11:45

A naya tsitsa mitshatsha yaye nya wufumu vbakari nya linene ni gigomo nya gukatege. Aholu mahegiso gwaye gu nata, nyamba mana muthu nya gu mu lamulele gu mu lamulela.

Dhaniyeli 9:16

Gasi olu, uwe Pfhumu, gukhedza khu sigiro sago satshavbo si lulamidego, hi ngu lomba u ndreyisa likhulo lago dhoropani gwago gwa Jerusalema, li guromo gigomoni gwago nya gukatege. Kholu sighoho sathu ni guvivba gu giridwego khu vababe vathu, va girede Jerusalema gumogo ni vathu vago gilo nya gihegiso ga mayigo ma hi randredego.

Joyele 2:27

Khavbo mu na dzitigo gukhenu, eni nyi womo vbakari gwa va na Israyeli, a gu eni Pfhumu Nungungulu wanu, mwalo mumbe; vathu vangu gima kha va na thega dzitshoni kala gupindruga.

Joyele 3:21

Nyi na agisa novba wa avo nyi nga bani nyi si gu va agisi, kholu Pfhumu Nungungulu a na khala dhoropani ga Siyoni.

Mikeya 4:7

Avo va ndzodolago nyi na va gira mitshaledwa, ni avo va nga bani va phalalegisidwe va yiswa hwindzo, nyi na va gira litigo nya tshivba; Pfhumu Nungungulu a na fuma vbatshani gwawe gigomoni gya Siyoni, gukhugela olu kala gupindruga.

Nahume 1:15

Wonani musigomoni migondro ya wule a resago mahungu nya yadi, a huwelelago gurula! Uwe Judha, gira mikhuwo nya mibuzo yago, u landrisa sisambanyo sago, kholu va nya mayigo, gima kha va na nga gu sasela gambe; avo va na mbembisedwa muphelo.

Zakariya 8:3

Pfhumu Nungungulu a ngu ganela kharati, khuye: “Nyi na bwelela Siyoni, nyi ya vbanya vbakari nya lidhoropa la Jerusalema; Jerusalema gu na ranwa lidhoropa nya lisine, ni gigomo gya Pfhumu Nungungulu nya Tshivba Yatshavbo gi na ranwa gupwani Gigomo nya Guage.”

Gutuledwa 21:27

Dhoropani gakone gima kha gu na bela gilo nya gunyenyeze, ni vathu va girago guvivba ni malipha; aholu va na bela basi vale va lovidwego libhukuni nya womi la Nvutana.