Joyele 3:16 - Bhibhiliya Nya Guage

¹⁶ Pfhumu Nungungulu a na bhonga khu Siyoni, lito laye li na dzuma khu Jerusalema; gu ndrendremela ndzadzi ni mafu, aholu Pfhumu Nungungulu a na khala wuthavelo nya vathu vaye ni likhokhola la va na Israyeli.

Joyele 3:16 Iomraidhean Croise

Dzindzimo 18:2

Pfhumu Nungungulu, givhikelo gyangu, likhokhola langu, mudzegisi wangu; nyi ngu thavela gwaye, muvhikeli wangu, gitshangu ni tshivba nya guvbanyiswe gwangu, langwe yangu nya gutiye, wuthavelo wangu.

Dzindzimo 29:11

Pfhumu Nungungulu a ngu ninga tshivba vathu vaye, Pfhumu Nungungulu a ngu kategisa vathu vaye khu gurula.

Dzindzimo 61:3

Kholu uwe u wuthavelo wangu. Uwe u womo kha nga langwe nya tshivba, u nyi vbulugisago ga valala!

Mavingu 18:10

Lina la Pfhumu Nungungulu likhokhola li tiyidego va sihalago avbo vathu nya gululame.

Isaya 33:16

Khuye oyu a na khalago wulanga nya gukhugege; makhokhola nya siwindri ma na bani mari wuthavelo waye nya gutiye, a na ningwa guhodza gwaye, a sela mati khu gikhati gi vbwetegago.

Isaya 33:21

Kholu Pfhumu Nungungulu a na bani nari umo khu wudhumo waye, umo gu na khulunga mitsongo nya guaname, gu na goga mitsongo ni sitsongwana nya guaname; yi mwalo ngalava nya makasiya yi na vbindrago khumo, ambari ni litaro nya likhongolo, gima kha li na vbindra khumo.

Isaya 42:13

Pfhumu Nungungulu a na duga kha nga ndrena, kha nga muthu a dugago guya nyimbitunu, a goroga a wusa likhulo laye, a huwata, a gira ligwaha nya likhongolo nya nyimbi, a yeyedza tshivba yaye mbeli ga valala vaye.

Isaya 51:16

Nyi ngu thela magana yangu kanani gwago, nyi na gu siha mutsani nya gyandza gyangu. Eni nyi na ladza ndzadzini nya guphya, ni gu tsitsa giseketelo nya litigo nya liphya, ni gu embela Siyoni, kheni: “Enu mu vathu vangu.”

Jeremiya 16:19

Uwe Pfhumu Nungungulu, u tshivba, muvhikeli ni wuthavelo wangu litshiguni nya mhango! Avbo gwago mayigo ma nata khu mahegiso nya litigo ma ta, khayo: “Vababe vathu va hakhide thomba nya malipha ni wupumbu nyamba phasa gilo.

Jeremiya 17:17

U nga khali gilo nya guthavise avbo gwangu; uwe u gu wuthavelo wangu litshigu nya mhango.

Ezekiyeli 38:19

Khu guralo, khu ligolo langu ni likhulo langu nya likhongolo, nyi ngu ganela gukheni, ga litshigu lile, li na kutsungwa khu tshivba ni tshivba litigo la Israyeli.

Hoseya 11:10

Va na landrela Pfhumu Nungungulu; Uye a nga bhonga nga nghala. Avbo a na gu bhongago, sanana saye si nata khu Pfoladambo na si gu ndrendremela.

Amosi 1:2

Uye a di ganela, khuye: “Pfhumu Nungungulu a na bhonga khu Siyoni, a pwadza lito laye khu Jerusalema; gu manega gililo wuhaviseloni ga vahavisi, gubanga tshokatunu nya gigomo gya Karimelo.”

Amosi 3:8

Ya gu bhonga ngala, khu mani a gumba ndrendremela? Pfhumu Nungungulu a gu ganela, khu mani a na gumba profeta?

Nahume 1:7

Pfhumu Nungungulu khwadi, likhokhola nya wuthavelo litshigu nya wuvi. A ngu vhikela avo va mu tumbago,

Agewu 2:6

Kholu Pfhumu Nungungulu nya Tshivba Yatshavbo a ngu ganela kharati, khuye: Khu gikhati gidugwana, Eni nyi na tsekatsekisa ndzadzini, litigo, linene ni mafu nya gubange.

Agewu 2:7

Nyi na tsekatsekisa mayigo yatshavbo, gasi ma rese eno dzithomba dzawe dzatshavbo; nyi na tadza nyumba yeyi khu wudhumo; a ngu ganela Pfhumu Nungungulu nya Tshivba Yatshavbo.

Zakariya 10:12

Eni nyi na va tiyisa tshivbani ga Pfhumu Nungungulu, va na gimbila linani gwangu; a ngu ganela Pfhumu Nungungulu.

Zakariya 10:6

Nyi na ninga tshivba nyumba ya Judha, nyi wuya nyi vbanyisa nyumba ya Josefa, eni nyi na va wuyisa nyaluphye, kholu nyi ngu va pwela wusiwana. Va na gira gukhwatshi gima kha nya nga va diga, kholu eni kheni Pfhumu Nungungulu wawe, nyi na va ninga phindrulo.

Zakariya 9:12

Bwelelani likhokholani gwanu enu sibotshwa, mu tadego khu gutumba; muhuno nyi ngu tivisa gukheni nyi na mi bweledzela satshavbo khu nyondro mbili.

Vahebheru 12:26

Wule khu Lito laye a nga kutsungago mafu, olu tumbiside, gukhuye: “Eni nyi na engedza gambe gu kutsunga, nasiri mafuni basi, aholu, ni ndzadzini gambe.”

Gutuledwa 11:13

Gikhati gyogyo, gu di dugelela girevareva nya gikhongolo. Gipandre nya likhumi nya lidhoropa gi di pfhungumudwa. Livbandre na mavili magumi mazana (7.000) nya vathu va fude khu girevareva gyogyo. Ava va nga vbulugago va di tala khu rerema va gu dhumisa Nungungulu wa ndzadzini.

Gutuledwa 11:19

Khavbo avbo, Nyumba ya Nungungulu a guromo ndzadzini yi di tudwa, yi gu wonega Ngasa nya Gidzumeledzwano ndrani nya Nyumba ya Nungungulu, khu gikhati gyogyo, gu di lasa, gu pwala malito ni gu pandra mabara, gu duga girevareva, ni maralala.

Gutuledwa 16:18

Khavbo avbo, gu di lasa, gu pwala dzihuwa, gu dzuma mabara, gu handzamedza girevareva nya gu gima na gima gi di si gu wonwi khu muthu; a diri girevareva nya gikhongolo ngudzu.

1 Samuweli 15:29

Wudhumo wa Israyeli wu mwalo malipha ambari gu vbindrugedza, kholu khandri muthu nya gukhuwe a na dzi laya.”