Josuwa 23:7 - Bhibhiliya Nya Guage

⁷ gasi mu si dzi tshanganisi ni mayigo yaya ma tshadego vbakari gwanu. Mu nga khumbugi malina ya vanungungulu vawe, ambari gu sambanya khavo, mu nga va thumeli ambari gu va khozela.

Josuwa 23:7 Iomraidhean Croise

2 Dzipfhumu 17:12

Va di khozela sifananiso, iso va nga embedwago khu Pfhumu Nungungulu, gukhuye: “Mu nga giri silo nya nga esi.”

2 Dzipfhumu 5:18

Pfhumu Nungungulu, a tsetselele githumi gyago, gikhati mune wangu a na gu belago nyumbani ga Rimoni, gasi guya khozela, na pharedzede a tiya khu mandza yangu, eni neni nyi gurumedzwa gu khidzima nyumbani ga Rimoni; Pfhumu Nungungulu a na divalele eni githumi gyaye, khu isoso.

2 Dzikoronika 7:19

Aholu mwa gu ndreya, mu hambana ni milayo ni sileletelo esi nyi mi ningidego, mu ya thumela vambe vanungungulu ni gu va khozela,

Dzindzimo 16:4

Avo va khozelago vanungungulu nya malipha, va gu dzi tadzela vanungungulu, va engedzela gutshaniseka gwawe. Eni gima kha nyi na hengela navo wughevenga wawe, likana langu gima kha li na rana malina yawe.

Ekisodha 20:5

Khu na nga khidzima mbeli nya silo soso, gambe gima khu na nga si khozela, kholu eni kheni Pfhumu Nungungulu wago, nyi Nungungulu nya wufu, nyi ngu tsayisa sanana khu kotani nya gighoho gya vavelegi vawe kala gitugulwana nya wuraru negi nya wu na ga vale va nyi vengago.

Ekisodha 23:13

Mu na sayisa magana yatshavbo nyi mi embedego. Malina ya vambe vanungungulu ni gu ma khumbuga basi mu nga ma khumbugi. Ma nga tshuki ma pwala maganani gwanu.

Ekisodha 23:33

Avo va nga vbahi tigoni gwago, gasi va si gu kutsedzeli gu nyi ghohela; kholu wa gu khozela vanungungulu vawe, isoso khu lisine si na bani siri naphwi gwago.

Mavingu 4:14

U nga gimbili khu sindzilana sa va nya guvivbedwa khu monyo, ambari gu longoloka ni sighohi.

Jeremiya 12:16

Va gu bani va hevbude dzindzila dza vathu vangu, gasi va sambanya khu lina langu, khavo: Khu Pfhumu Nungungulu a vbanyago; kha nga olu u hevbudzidego vathu vangu gu sambanya khu Bhahali, khu guralo, avo va na vbaha vbakari nya vathu vangu.

Jeremiya 5:7

Nyi na dzi kodza kharini gu gu divalela na nyi gu wona esi? Kholu sanana sago si nyi digide, va sambanya khu avo va gu siri vanungungulu; hwane nya gubani nyi mi ningide siningwa nya gutale, kha mwa tumbega, mu di tadzani migondro dzinyumbani nya maphuphulu mu ya tshangana iyoyo;

Hoseya 2:17

Nyi naya mu bweledzela marembwe yaye nya miuvya, nyi vbindrugedza kova wa Akori, wu khala nyangwa nya gitumbo. A naya embelela kha nga matshiguni nya wumbiri waye, ni litshigu a nga dugago khilo khu tigoni ga Egipito.

Sofoniya 1:5

Nyi na fuvisa ni avo va litago vbatshani nya dzilangwe, vaya khidzima gasi gu khozela sivangwa sa damboni; ni vale va nogago va sambanya khu lina la Pfhumu Nungungulu, aholu na va gu sambanya gambe khu lina la Malikani

Mitengo 32:38

Nebho, Bhahali-Meyomi, va li vbindrugedza lina; ni Sibima; mambe madhoropa va nga ma vbahago va di ma riya mambe malina.

Mitengo 33:55

Aholu mwa gumba tutumisa mbeli gwanu vavbahi vatshavbo va tigoni, vale mu na va digago va khala vbakari gwanu, va na khala kha nga dzitshingano mahoni gwanu, ni miba nya renge musiwununi gwanu; va na mi thusedzela ga litigo mu na li dzegago.

1 Vakorinto 15:33

Mu nga sengwi! “Gidinga nya vathu nya guvivbedwe khu monyo gi ngu vivbisa mavbanyelo nya yadi.”

Vaefeso 5:11

Mu nga hengeli gumogo ni vale va vbanyelago gidemani, mithumoni yawe nyamba phasa gilo; aholu yi ganedzeni nyamba yi vegedzela.

Dhewuteronome 10:20

U na ninga githawo Pfhumu Nungungulu wago, u khozela Uye basi, u namarela avbo gwaye, u sambanya khu lina laye.

Dhewuteronome 6:13

U na ninga githawo Pfhumu Nungungulu wago, u mu thumela, u sambanya khu lina laye.

Dhewuteronome 6:14

U nga landreleli vambe vanungungulu avo va guromo vbakari nya mayigo ma gu randredego;

Josuwa 23:12

Kholu mwa gu ndreyani avbo Gwaye, mu namarela ga avo va tshadego ga mayigo yaya, ma guromo vbakari gwanu, ni gu dzegelana navo vanyamayi, mu dzi tshanganisa navo,

Josuwa 23:8

Aholu namarelani ga Pfhumu Nungungulu wanu, kha nga idzo mu giridego kala na muhuno;