Josuwa 10:40 - Bhibhiliya Nya Guage

⁴⁰ Khu guralo, Josuwa a di sasela litigo latshavbo nya gipandre gya sigomoni khu Marandzi, Negebhi, panini ni releloni nya sigomo, gumogo ni vafumeli vaye vatshavbo, nyamba tshiya ni moyo, a mbembisa satshavbo si dagatago, kha nga idzo a leletedego khidzo Pfhumu Nungungulu wa Israyeli.

Josuwa 10:40 Iomraidhean Croise

1 Dzipfhumu 15:29

Me ni gu khala vbagikhalotunu nya wufumu, a diya mbembisa ndranga yatshavbo ya Jerobhowamo, nyamba tshiya ni moyo nya guvbanye, kha nga guganela ga Pfhumu Nungungulu, ugo a ganedego khu ga githumi gyaye Ayiya wa Silo.

Nehemiya 9:24

Khu guralo, sanana sawe si bede si ya fumela litigo lolo, U va ningide tshivba nya gupale vamune tigo, a gu Vakhanani, U va ningela mandzani gwawe, gumogo gambe ni vafumeli vawe ni vathu va tigoni momo, gasi va gire guhaladza gwawe khu avo.

Dzindzimo 9:17

Va nya guvivbedwa khu monyo, va na dzudzugwa phalani nya vafi, gumogo ni vathu vatshavbo va si khathaligo khu Nungungulu.

Ekisodha 34:12

Dzi wonele, u nga tshuki sago u hunga pwanano ni vathu va tigoni u na belago umo, gasi avo va si khali naphwi vbakari gwanu.

Mitengo 13:17

Mosi a di va rumela gu ya sola litigo la Khanani, a va embela, khuye: “Gwelani khu phuvbo ga Negebhi mu hongola kala sigomotunu.

Dhewuteronome 1:7

Olu khugani mu hongola sigomoni sa Vaamori, gumogo ni sa vaakelane vawe, ni panini, ni tigoni nya sigomo, ni releloni, ni Marandzi ni gitsongwanani gya bambe nya yiphwa, litigo la Vakhanani, ni Libhanoni kala tsongo nya wukhongolo wa Ewufrate.

Dhewuteronome 2:34

Khu gikhati gyogyo, hi di wandra madhoropa yaye, ga lidhoropa ni lidhoropa hi di li pfhungumula gumogo ni vathu vaye, vanyamayi ni sanana; nyamba tshiya ni moyo a vbanya.

Dhewuteronome 7:24

A na ningela gambe mandzani gwago vafumeli vawe, gasi uwe u fuvise malina yawe mafuni; mwalo ni moyo a na tiyago gu ema mbeli gwago, kala u va mbembisa.

Josuwa 10:35

Khu litshigu lolo la limwedo, va di li wandra va li sasela khu matshari, va mbembisa vatshavbo, kha nga edzi va giridego lidhoropa la Lakisi.

Josuwa 10:37

Va di wandra lidhoropa la Hebroni ni mitalala yaye, va sasela khu matshari vathu vaye, gumogo ni mufumeli waye, nyamba tshiya ni moyo, kha nga idzo va giridego khidzo lidhoropa la Egilomi. Josuwa a di mbembisa lidhoropa, gumogo ni satshavbo si nga bani siri umo.

Josuwa 10:39

A di dhumela lidhoropa ni mitalala yaye, gumogo ni mufumeli waye, a li sasela khu matshari, a li mbembisela muphelo gumogo ni satshavbo si nga bani siri umo. Kha nga idzo a giridego ga Hebroni ni ga Libhina gumogo ni vafumeli vawe, a di gira gambe kharato ga Dhebhiri ni ga mufumeli waye.

Josuwa 11:16

Khu guralo, Josuwa a di wandra litigo lile la musigomoni, Negebhi watshavbo, ni litigo latshavbo la Goseni, Arabha, ni gipandre gyatshavbo gya musigomoni ga Israyeli gumogo ni mapanini gwaye,

Josuwa 12:8

va nga bani va khade sigomoni, mapanini, ni mireleloni nya sigomo, mugiwulani, ni Marandzi; umo va nga bani va khade umo Vahiti, Vaamori, Vakhanani, Vaperezi, Vahevhi ni Vajebhuzi.

Josuwa 18:21

Madhoropa ya sanana sa Bhejami, gukhedza khu dzindranga dzawe, ma diri aya: Jeriko, Bheti-Hogila, Emeki-Kesisi,

Josuwa 6:17

Lidhoropa, gumogo ni satshavbo si guromo umo, si emisedwe gu khungumudwa hiso bhi; gu na vbuluga basi Rahabhi nya gibhayi gumogo ni vatshavbo va na gu bani vari nyumbani gwaye, kholu uye sihide vaholeleli hi nga bani hi va rumede.

Josuwa 8:2

U na ya gira Ayi gumogo ni mufumeli waye, kha nga edzi u nga girago Jeriko gumogo ni mufumeli waye; mu na ya phanga dzithomba ni sifuyo sakone si khala sanu. Vega vathu khu hwane nya lidhoropa va varamela.”

Josuwa 8:27

Va na Israyeli va di phanga mitshambi ni thomba yatshavbo ya dhoropani, kha nga idzo Pfhumu Nungungulu a nga bani a leletede khidzo Josuwa.

Josuwa 9:24

Avo va di hakha Josuwa, khavo: “Ethu sithumi sago va hi embede gukhavo Pfhumu Nungungulu wago tumbiside ga githumi gyaye Mosi, gu mu ninga litigo leli, a mbembisa vavbanyi vaye vatshavbo mbeli gwanu. Khidzo kharato hi taledwego khu hwanga nya wukhongolo ngudzu avbo gwanu khu kotani nya womi wathu, gu kala hi gira esi.