Jeremiya 49:24 - Bhibhiliya Nya Guage

²⁴ Dhamasiko pilegide hwambo, a khuga a tutuma na gu ndrendremela, a di modwa khu hwanga ni guvbisega monyo kha nga nyamayi a lumwago.

Jeremiya 49:24 Iomraidhean Croise

Genesi 3:16

A di embela gambe nyamayi, khuye: “Nyi na gu gira u wona sigaradzo mimbani gwago, u na velega sanana khu wuvi nya wukhongolo, ambari ulo, u na khala lidora ngudzu nya mwama wago, aholu uye a na gu fumela.”

Isaya 13:8

Va na thurugiswa ngudzu; va modwa khu sigaradzo, va saniseka gu fanana ni nyamayi nya gulumwe, va na khedzisana khu gyawe na va gu samala, dzikhovbe dzawe dzi ngangamela kha nga nilo.

Jeremiya 30:6

Wudzisani ni gu wona, ina mwama a ngu dzi kodza gu lumwa, gani? Khu ginani nyi wonago vama vatshavbo va dzi pharago sirumbu gukhwatshi khu nyamayi a lumwago? Khu ginani dzikhovbe dzawe dzatshavbo dzi thuvigidego?

Jeremiya 4:31

Kholu nya gupwa lito nya miketo nya gufanane ni nyamayi a lumwago, miketo nya wuvi ya nyamayi nya tiwula. Lito la lidhoropa la Siyoni li lilago na li gu khusa mandza, khilo: Yowe! Nyi fude, hefemulo wangu wu vbede tshivba khu kotani nya vasaseli!

Jeremiya 48:41

Madhoropa yawe ma na phangwa, ma wandrwa makhokhola yawe; khu litshigu lolo, myonyo nya dzindrena dza Mowabhi, yi na fanana ni monyo nya nyamayi a lumwago.

Jeremiya 49:22

Wonani nala a tago khu gu vbuvba kha nga lighama, ata mbaka vbatshani ga Bhozira; khu litshigu lolo, myonyo nya dzindrena dza Edhomi yi na fanana ni monyo wa nyamayi a lumwago.

Jeremiya 49:29

Phangani mitshatsha yawe ni mitshambi yawe, ni myendra nya makhuvi yawe gumogo ni sombo sawe satshavbo, mu phanga gambe ni dzingameriya dzawe; va theleni hwanga khu maphuvbo yatshavbo!

Jeremiya 49:37

Va na Elamo nyi na va gira va ndrendremela mbeli ga valala vawe ni mbeli ga vale va vbwetago gu va songa, nyi na gugumugisa likhulo langu, nyi na va resela dzimhango a ngu ganela Pfhumu Nungungulu. Va na Elamo nyi na va gira va tedwa khu mhango; nyi na gugumugisa likhulo langu, va na songwa khu matshari, kala va fuviswa.

Jeremiya 50:43

Avbo mufumeli wa Bhabhiloni, a nga pwago ndruma yawe, a di pilega hwambo a vbela tshivba, a tedwa khu rerema, a vbisega kha nga nyamayi a lumwago.

Jeremiya 6:24

Avbo hi nga pwa ndruma yawe, mawogo yathu ma di vbela tshivba hi gu saniseka khu wuvi wathu watshavbo, kha nga nyamayi a lumwago.

Hoseya 13:13

A na vbohedwa khu wuvi nya nga wa nyamayi a lumwago, kholu uye gyanana nyamba yingisa, gya gu vboha gikhati, kha dugi khu rumbuni a nga sihalago umo.

Matewu 24:8

Aholu satshavbo sesi a na bani ari guphela nya sitshaniso.

Marko 13:8

Kholu litigo li na wugela limbe litigo, mufumo wu wugela wumbe mufumo; malanga nya mangi gu na manega sirevareva ni ndzala. Satshavbo soso a na bani ari guphela nya sisaniso.