Jeremiya 3:19 - Bhibhiliya Nya Guage

¹⁹ Pfhumu Nungungulu a ngu ganela kharati, khuye: Eni nyi diri ni makungo nya gukheni nyi na gu sayisa kha nga idzo nyi sayisago khidzo sanana sangu, nyi gu ninga litigo nya ladi ngudzu, litigo nya gumbure ngudzu guvbindra mambe mayigo. Aholu eni nyi di pimisa, kheni: Mu na nyi rana khenu Baba, gima kha mu na ndreya gambe mu nyi diga.

Jeremiya 3:19 Iomraidhean Croise

Dzindzimo 106:24

Gambe va di nyenya litigo nya gumbure ngudzu, kholu kha va khodwa ga situmbiso a nga girago.

Dzindzimo 16:6

Nyi kabanisidwe giavelo malangani ma nyi tsakisago, lisine, nyi ningidwe thomba nya yadi ngudzu.

Dzindzimo 89:26

Uye a na nyi embela, khuye: “Uwe u babe wangu, u Nungungulu wangu, u muvhikeli ni muvbanyisi wangu.”

Mavingu 3:35

Wuzundzo thomba ya va nya guti, aholu sipumbu si na hakha tshatshazelo nya dzitshoni.

Isaya 63:16

Aholu uwe khuwe Babe wathu, ambari Abrahama na si hiti, ni Jakobe a si khathali khu ethu; Uwe Pfhumu Nungungulu, khuwe Babe wathu; U Mudzegisi wathu, gukhugela guhegulani, khilo lina lago ilolo.

Isaya 64:8

Gasi olu, uwe Pfhumu Nungungulu, Uwe khuwe Babe wathu, ethu hi libumba, uwe khuwe muwumbi wathu; ethu hatshavbo hi thumo nya mandza yago.

Jeremiya 12:10

Vahavisi nya vangi va ghohetede lithembwe langu ni gu gandredzela thomba yangu; va dzegide gipandre gi nga bani gi nyi tsakisa, va gi gira giwula.

Jeremiya 3:17

Khu gikhati gyogyo, Jerusalema gu na ranwa Gikhalo nya wufumu wa Pfhumu Nungungulu; gu na ya tombana gwaye mayigo yatshavbo guya rungudza lina la Pfhumu Nungungulu, kha va na gira gambe iso si godwago khu gudzina nya myonyo yawe nya guvivbe.

Jeremiya 3:4

Olu, wa gu lila avbo gwangu, khuwe: Baba wangu, uwe u diri pari ya wudzahani wangu, gani?

Jeremiya 31:20

Ina kamwe Efrayimi khandri uye gyanana gyangu nya gigodwa, gani? Gyanana gi godwago khu monyo wangu, gikhati nya gingi mapimo yangu kha ma digi gu mu alakanya; ni monyo wangu wa gu salala mbeli gwaye, khu guralo, nyi na mu pwela wuhindzi; a ngu ganela Pfhumu Nungungulu.

Jeremiya 31:9

Va na wuya na va gu lila, nyi na va hetedza na nyi gu va bavbula marongo, nyi na va yisa mitsongoni nya mati khu ndzila nya gululame, mwalo a na tshunganelago; kholu Eni nyi womo kha nga babe wa Israyeli, ni Efrayimi khuye matiwula yangu.

Jeremiya 33:9

“Dhoropani momu ga Jerusalema gu na khala ni lina nya gutsake, wuzundzo ni wudhumo, mbeli nya mayigo yatshavbo ya mafuni ma na gu pwago makategwa yatshavbo nyi na gu girelago, va na liwuga ni gusamala khu gu wona makategwa ni thomba nyi na gu ningago.”

Jeremiya 5:7

Nyi na dzi kodza kharini gu gu divalela na nyi gu wona esi? Kholu sanana sago si nyi digide, va sambanya khu avo va gu siri vanungungulu; hwane nya gubani nyi mi ningide siningwa nya gutale, kha mwa tumbega, mu di tadzani migondro dzinyumbani nya maphuphulu mu ya tshangana iyoyo;

Ezekiyeli 20:6

Ga litshigu lile nyi sambanyide gwawe gukheni nyi na va dusa tigoni ga Egipito, nyi va yisa ga litigo nyi va hathedego, litigo li gogago mahwe ni wulombe, li mburidego guvbindra mayigo yatshavbo.

Dhaniyeli 11:16

Khu guralo, uye a natago guta mu sasela a na gira iso a si golago; nyamba himbedzwa khu muthu. A na bela Tigoni nya tshivba a li sasela.

Dhaniyeli 11:41

A na bela ni ga litigo li vbindrago yatshavbo khu wumburi, a sasela mayigo nya mangi, aholu Edhomi, Mowabhi ni vathu nya guthavisege nya sanana sa Amoni, va na vbuluga mandzani gwaye.

Dhaniyeli 11:45

A naya tsitsa mitshatsha yaye nya wufumu vbakari nya linene ni gigomo nya gukatege. Aholu mahegiso gwaye gu nata, nyamba mana muthu nya gu mu lamulele gu mu lamulela.

Dhaniyeli 8:9

Khu ga mweyo nya idzo, gu di duga gikhehwana, gi dandra ngudzu, gi khedza Marandzi, Khugadambo ni ga Litigo li vbindrago Mayigo yatshavbo khu Wumburi.

Hoseya 11:8

Nyi na dzi kodza kharini gu gu diga, uwe Efrayimi? Nyi na dzi kodza kharini gu gu ningela mandzani ga vambe, uwe Israyeli? Nyi na dzi kodza kharini gu mu gira kha idzo nyi nga girago khidzo lidhoropa la Adima? Gu mi girani nga idzo nyi giredego va Zebhoyimi? Khu ndrani nya monyo wangu gwa gu vila, nyi tala khu wuhindzi nyi gu pwela gisiro.

Vagalatiya 3:26

Khu gukhodwa enu mwatshavbo mu khade sanana sa Nungungulu, khu Kristo Jesu.

Vaefeso 1:5

Uye a hi hathide a hi vegisede wuhigo nya gu hi gire sanana Saye khu ga Kristo.

Dhewuteronome 14:1

Enu mu sanana sa Pfhumu Nungungulu wanu. Khu guralo, mu nga hatshedwi dzindrova milini gwanu, ambari guvbaludwa ndzudzu hungoni gwanu khu kotani nya gufe muthu nya gukari.

Vahebheru 10:39

Khu guralo, ethu kha hiri vathu nya gubwelele hwane hi ya gumbembani. Aholu, hi vale va khodwago gasi gu vbanyisa mihefemulo yawe.

1 Pedro 1:17

Mwa gu lombelela na mu rana, khenu: “Baba,” Uye a lamulago vathu vatshavbo nyamba khedza khu khovbe, a khedzago khu mavbanyelo ya muthu ni muthu; khu kharalo, mu fanede gu mu ninga githawo matshiguni nya guvbanye gwanu mafuni momu.