Jeremiya 26:3 - Bhibhiliya Nya Guage

³ A gu dzina saye va na ma yingisa va vbindrugedza mavbanyelo, muthu ni muthu a ndreya ndzilani gwaye nya guwegele, gasi eni neni nyi kodza gu diga makungo nya tsayiso nyi va dongisedego gu va resela, khu kotani nya sigiro sawe nya guvivbe.

Jeremiya 26:3 Iomraidhean Croise

1 Dzipfhumu 21:27

Avbo Akabi, a ngapwago magana yaya, a di pferula ngandzu yaye a ambala saku a hala; a di lala vbasakutunu a vbisega ni guvbela tshivba.

1 Dzipfhumu 21:29

“U wonide idzo Akabi a dzi thesidego khidzo mbeli gwangu, gani? Kha nga olu a giridego kharati, kha nyi na mu tsayisa matshiguni nya guvbanye gwaye, aholu matshiguni ya mwanaye, nyi na resa tsayiso nyumbani gwaye.”

Jeremiya 26:13

Gasi olu, vbindrugedzani mavbanyelo yanu ni sigiro sanu mu yingisani lito la Pfhumu Nungungulu wanu; khavbo uye a na gu bweledzago tsayiso a wu ganedego khu kotani yanu.

Jeremiya 26:19

Ina Ezekhiya, mufumeli wa Judha, gumogo ni vathu vatshavbo va na Judha va mu songide, gani? Ina uye kha nga ninga githawo Pfhumu Nungungulu, ina kha va lomba gasi Pfhumu Nungungulu a va pwela wuhindzi khu gu va divalela ga tsayiso a nga bani a va dongisede, gani? Aholu ethu ha gu vbweta gu dzi thelela ginani libango khu gu songa muthu yoyo, na?

Jeremiya 36:3

“A gu dzina saye, vathu va nyumbani ga Judha va napwa makungo nya dzimhango nyi vbwetago gu va resela, mwendro saye muthu ni muthu a na vbindrugedza ndzilani gwaye nyambasi yadi, nyi kodza gu va tsetselela guvivba ni sighoho sawe.”

Jeremiya 36:7

A gu dzina saye nombelo wawe wu na vboha mbeli ga Pfhumu Nungungulu, muthu ni muthu a vbindrugedza ndzilani gwaye nya guwegele, kholu likhulo li tivisidwego khu Pfhumu Nungungulu ga vathu vava, likhongolo ngudzu.”

Ezekiyeli 12:3

Gasi, olu, uwe mwamana wa muthu, dongisela rwalo wago u hongola guvbagedwatunu, u ya wonana ni vatshavbo gipimo nya litshigu rumba, u hambana navo, u hongola wumbe wulanga. A gu dzina saye va na si wona, ambari a gu vathu nya gukanyise.

Ezekiyeli 18:21

Aholu, muthu nya guvivbedwe khu monyo a gu vbindrugedza mavbanyelo, a diga sighoho saye satshavbo a si giridego, a yingisa sileletelo, a gira gululama ni gu landrisa nayo wangu, khu lisine a na vbanya.

Hoseya 11:9

Kha nyi na dusa guthisa nya likhulo langu, kha nyi na engedza gambe gu sasela Efrayimi, kholu eni nyi Nungungulu, kha nyiri muthu, nyi Agide vbakari gwago; kha nyi dzi digi nyi fumedwa khu likhulo.

Joyele 2:14

A gu dzina saye a na bwelela hwane a dzi laya, a mu ninga makategwa, a mu ninga wuguvbi ni miningelo nya vhinya nya guphasele khiso Pfhumu Nungungulu wanu.

Jona 4:2

A di lombelela ga Pfhumu Nungungulu, khuye: “Oh! Pfhumu Nungungulu! Ina khandriso esi nyi nga gu embelago, na nyi ngari tigoni gwangu, gani? Khiso si nga nyi gira nyi thava nyi tutumela tigoni ga Tarisisi, kholu nyi di gu dziti gukheni uwe u Nungungulu nya wuhigo, u tadego khu wuhindzi, u hwelago gugoroga, na wu tade khu wuwadi, u si goligo gu gira silo nyamba sadi.