Jeremiya 21:10 - Bhibhiliya Nya Guage

¹⁰ Kholu Pfhumu Nungungulu a ngu ganela kharati, khuye: Nyi dzi emisede gu veta lidhoropa leli, khu kotani nya sighoho saye nasiri khu wuwadi; li na thega mandzani ga mufumeli wa Bhabhiloni, uye a li vbisa khu nilo.

Jeremiya 21:10 Iomraidhean Croise

2 Dzikoronika 36:19

Va di vbisa Nyumba ya Pfhumu Nungungulu, va khungumulela makhokhola ya Jerusalema, dzinyumba dzawe nya wufumu dzi di vbiswa khu nilo, va pandrelela mikanvu yawe yatshavbo nya lisima.

Dzindzimo 34:16

Khovbe ya Pfhumu Nungungulu ya gu wugela avo va girago guvivba, gasi a va fuvisa mafuni va si alakanywi gambe.

Jeremiya 17:27

“Aholu, mwa gumba nyi yingisani, mu si dzumeli gu agisa litshigu nya Sabhadho, ni gu rwalani mirwalo nya gulemele, mu bela nayo khu dzinyangwani nya lidhoropa khu litshigu nya Sabhadho, nyi na vasa nilo wu nata dagaredzisago dzinyumba dzatshavbo nya wufumu dza Jerusalema, uwo wu na gumba tshimega gambe.”

Jeremiya 26:6

khu guralo, nyumba yeyi nyi na yi gira yi fanana ni Silo, ni lidhoropa leli nyi na li vbindrugedza li khala givalo ga mayigo yatshavbo ya mafuni.

Jeremiya 33:5

Va bela khumo gasi gu dwana ni Vakalidhiya, gasi nyi li tadza khu sirumbi nya vathu nyi va songidego khu likhulo langu, avo nyi va sihedego khovbe yangu khu kotani nya sighoho va giridego dhoropani momu.

Jeremiya 34:2

Pfhumu Nungungulu wa Israyeli, a ngu ganela kharati, khuye: Indra u ya embela Zedhekiya, mufumeli wa Judha, khuwe: Pfhumu Nungungulu a ngu ganela kharati, khuye: Nyi ngu ningela lidhoropa leli mandzani ga mufumeli wa Bhabhiloni, uye a na li vbisa khu nilo.

Jeremiya 34:22

Wonani gukhenu nyi na mi ninga nayo, a ngu ganela Pfhumu Nungungulu. Nyi na va gira va wuya gambe dhoropani momu, va nata li sasela ni gu li wandra va li vbisa, madhoropa ya Judha, ma na vbindrugedza ma khala marumbi, avbo nyamba manega ni muthu nya gukhale umo.”

Jeremiya 38:17

Khu guralo, Jeremiya a di embela Zedhekiya, khuye: “Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Wa gu ya dzi ningela ga manganagana ya mufumeli wa Bhabhiloni, u na vbanyisa womi wago, ni lidhoropa leli kha li na vbiswa, u na vbanya uwe gumogo ni ngamo yago.

Jeremiya 38:18

Aholu, wa gumba ya dzi ningela ga vathangeli va mufumeli wa Bhabhiloni, lidhoropa leli li na thegela mandzani ga Vakalidhiya, avo va na li vbisa, uwe khu na vbuluga mandzani gwawe.”

Jeremiya 38:23

Khu guralo, vagadzi vago gumogo ni sanana sago va na ningedwa ga Vakalidhiya, uwe nuwe khu na vbuluga mandzani gwawe; aholu u na modwa khu mufumeli wa Bhabhiloni, ni lidhoropa leli uye a na li vbisa khu nilo.

Jeremiya 38:3

Pfhumu Nungungulu a ngu ganela kharati, khuye: Lidhoropa leli khu lisine kamwe li na ningedwa mandzani nya mabutho ya mufumeli wa Bhabhiloni, va li sasela.”

Jeremiya 39:16

“Indra uya tivisa Ebhedhi-Meleki, Muetiyopi, khuwe: Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Wona, nyi na landrisa magana yangu vbatshani nya lidhoropa leli nasiri khu wuwadi, aholu khu wuvivbi; si na girega mahoni gwago ga litshigu lile kamwe.

Jeremiya 39:8

Vakalidhiya va di vbisa nyumba ya mufumeli gumogo ni dzinyumba dza vathu, va khungumulela gambe mabhiyo ya Jerusalema.

Jeremiya 44:11

Khu guralo, Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Nyi na thendregedza khovbe yangu nyi mi pfhurarela, nyi mbembisa va na Judha vatshavbo.

Jeremiya 44:27

Gikhati gyatshavbo nyi na va suvela dzimhango nasiri makategwa; Vajudha vatshavbo va vbanyago tigoni ga Egipito, va na mbembiswa khu matshari ni ndzala kala va vbela vatshavbo.

Jeremiya 52:13

a ta vbisa Nyumba ya Pfhumu Nungungulu, nyumba ya mufumeli, dzinyumba dzatshavbo dza dhoropani ga Jerusalema gumogo ni dzinyumba dza vathu vatshavbo nya guthavisege.

Ezekiyeli 15:7

Nyi na va wugela; avo va na duga khu niloni, aholu, nilo wu na va dagaredzisa; khavbo mu na dzitigo gukhenu Eni kheni Pfhumu Nungungulu, gikhati nyi na gu va wugelago.

Ezekiyeli 24:11

Khu hwane u vega khali nya liphanga vbatshani nya magala nya nilo, gasi yi vbisa, kala sugu waye wu ngangamela, ni gunyenyeza gwaye gu nyivilige ni gu pfhurela gwaye gu vbiswa gu mwalalege.

Levhi 17:10

“Gani khu wevbini muthu wa nyumbani ga Israyeli, mwendro valuveli va vbanyago vbakari gwawe, a na hodzago novba, gani lifumbu muni, nyi na mu wugela muthu yoyo a hodzago novba, nyi mu fuvisa vbakari nya vathu vaye.

Levhi 26:17

Nyi na mi pfhurarela, mu na padwa khu valala vanu, mu fumedwa khu avo va mu nyenyago; khu guralo mu na tutuma nyamba lundrwa khu muthu.

Amosi 2:5

Khu guralo, nyi na rotha Judha khu nilo, wu na vbisago dzinyumba nya wufumu dza Jerusalema.”

Amosi 9:4

Ambari va gu yiswa wugumbitunu khu valala vawe, nyi na va rumela litshari li ya va songa. Nyi na va khedza khu maho nya guvivbe, nasiri khu wuwadi.

Zakariya 1:6

Aholu, magana ni sileletelo sangu, nyi si tivisidego khu magana ya vaprofeti, sithumi sangu, ina kha sa pwala dzindzeveni ga vababe vanu, gani? Khavbo avbo, avo va di dzi laya va vbindrugedza va ganela, khavo: Pfhumu Nungungulu nya Tshivba Yatshavbo a hi pharidego kha nga idzo a hungidego khidzo gu hi tsayisa gukhedza khu mavbanyelo ni mithumo yathu.”