Jeremiya 15:7 - Bhibhiliya Nya Guage

⁷ Nyi va vbevberide khu gisavala dzinyangwani nya litigo, vathu vangu nyi va dzegede sanana sawe, nyi bwelo khavbo nyi va mbembisa; gambe kha va diga dzindzila dzawe nya guwegele.

Jeremiya 15:7 Iomraidhean Croise

Dzindzimo 1:4

Kha gu giregi kharato ga vathu nya guvivbedwe khu monyo; avo va gu fanana ni mwasi wu phalalegiswago khu phuvbo.

Isaya 41:16

U na si vbevbera, si vbuvbiswa khu phuvbo; si phalalegiswa khu gipupwane; aholu uwe u na nengela khu Pfhumu Nungungulu, u zundzega ga oyu a Agidego wa Israyeli.

Isaya 9:12

Vaasiriya khu Khugadambo, ni Vafilisitiya khu Pfoladambo; va di hama likana va midza Israyeli. Ambari khu guralo, likhulo laye kha la bosa gilo, ni libogo laye li nga thawulugide.

Isaya 9:13

Aholu, vathu vava kha va bwelela ga wule a nga va vetago, ambari gu vbweta Pfhumu Nungungulu nya Tshivba Yatshavbo.

Jeremiya 18:21

Khu guralo, sanana sawe si na vbele khu ndzala, va na sasedwe khu matshari; vagadzi vawe va na wandredwe sanana, ni gu khala dzinoni; vama vakone va na vbele khu tungu, madzaha yawe ma na sasedwe khu matshari nyimbitunu.

Jeremiya 5:3

Uwe Pfhumu Nungungulu, maho yago kha ma khedzi wule a girago ndruda, gani? U va bayiside, kha vapwa guvbisa; U va mbembiside, kha va dzina gu vbindrugedza; gambe va di bangisa mihungo yawe guvbindra giwindri; kha va nga dzina gu wuya eno gwago.

Jeremiya 51:2

Nyi na rumela va nya mayigo tigoni ga Bhabhiloni, vata mu vbevbera nga mungu wu vbuvbiswago khu phuvbo va ya thegela hwindzo ni litigo lawe, kholu va nata randredwa khavo khu maphuvbo yatshavbo khu litshigu nya tsayiso.

Jeremiya 9:21

Kholu lufu li litide li bela khu sihogo nya dzinyumba dzathu, li ya bela ni dzinyumbani nya wufumu; li sasede sanana dzindzilani ni madzaha malangani nya mitendrela nya madhoropa.

Ezekiyeli 24:21

Embela vathu va Israyeli, khuwe: Mune Pfhumu Nungungulu a ngu ganela kharati, khuye: Nyi womo vbafuvbi ni gu nyenyezisa nyumba yangu nya miphaso, likhokhola mu dzi khusedzago khilo, li tsakisago maho yanu, gilo gi tangadzisago myonyo yanu. Sanana sanu nya sikhwathana nesi nya sagadzyana mu si tshidego iyoyo, si na songetedwa khu matshari.

Ezekiyeli 24:25

Khu guralo, uwe mwamana wa muthu, ga litshigu eni nyi na va duselago likhokhola lawe, gunengela gwawe, wuzundzo wawe, igyo gi tsakisago maho yawe gumogo gambe ni sanana sawe nya sikhwathana, nesi nya sagadzyana, ligolo nya likhongolo nya womi wawe.

Ezekiyeli 36:12

Vathu vangu va Israyeli, nyi na va gira va gimbilagimbila vbatshani gwanu. Avo va na mi fuma, enu mu na khala thomba yawe; gima kha mu na songa gambe sanana sawe.

Zakariya 1:4

Mu nga girini kha nga vababe vanu, va nga huweledwa khu vaprofeti nya guhegule, va nga ganela gwawe, khavo: Pfhumu Nungungulu nya Tshivba Yatshavbo, a ngu ganela kharati, khuye: Vbindrugedzani, mu diga dzindzila dzanu nya guvivbe ni mithumo yanu nya gunyenyeze. Aholu avo kha va nyi yingisa, gambe gima kha va thela kota khu eni, a ngu ganela Pfhumu Nungungulu.

Matewu 3:12

A na ni gisalava mandzani gwaye; a na vbiyela githala gyaye, a vbevbera dzimbewu a thela mugisangalani, gasi mafisi a na ma vbisa niloni nyamba tshimega.”

Dhewuteronome 28:18

Gu na vadwa ni handro nya melego wago, ni mihandro nya mafu yago, ni marole nya dzimombe ni dzinvuta dzago.

Dhewuteronome 28:32

Sanana sago nya sikhwathana ni vanyamahegyane si na ningedwa ga mambe mafumbu; aholu maho yago ma na wona isoso, ma vbela tshivba khu gusuva matshigu yatshavbo; aholu mandza yago gi mwalo ma na gu gi kodza gu gira.

Dhewuteronome 28:41

U na velega sanana nya sikhwathana ni vanyamahegyane, aholu gima khu na khala navo, kholu va na vbagedwa va yiswa wugumbitunu.