Jeremiya 13:16 - Bhibhiliya Nya Guage

¹⁶ Dhumisani Pfhumu Nungungulu wanu, gu si gu vbohi gidema, migondro yanu yi si gu tshunganeli musigomoni nya guthise; avbo mu na gu khedziselago guwonegela, aholu uye a na gu vbindrugedza a resa wutshigu ni gidema nya guthise.

Jeremiya 13:16 Iomraidhean Croise

Joba 3:5

Li na fenengedzwe khu gidema, li tshiredzwa khu lipfhi nya gufe. Vathu va thedwa hwanga khu pfhuphelo waye!

Dzindzimo 107:10

Va di gu vbanya gidemani ni mwedzini nya gufe, na va hungeledwe khu sisaniso ni makhetshe,

Dzindzimo 107:14

A di va dusa gidemani ni mwedzini nya lufu, a gu kavilela makhetshe yawe.

Dzindzimo 29:2

Rungudzani wudhumo nya lina la Pfhumu Nungungulu, khozelani Pfhumu Nungungulu makhuvini gwaye nya guage.

Dzindzimo 44:19

gasi gu hi pfara avbo yi vbanyago migehe, u hi fenengedza khu gidema nya lufu.

Ekisodha 10:21

Khavbo avbo, Pfhumu Nungungulu a di embela Mosi, khuye: “Khusedza mandza yago u nonedza ndzadzini, gu na manega gidema tigoni ga Egipito, gidema nya gu vathu va na gimbila khu gu phuphuthela!”

Mavingu 4:19

Aholu ndzila ya va nya guvivbedwa khu myonyo ya gu fanana ni gidema nya guthise, va gumba wona ni gilo gi va ghumulago.

Muhevbudzi 11:8

Muthu a gu vbanya myaga nya gutale, gumogo ni gutsaka gwadi, a na alakanye matshigu nya gidema a gu mangi ngudzu guvbindra nya gutsake. Satshavbo gu dzi pfhadza kha si phasi gilo.

Isaya 5:30

Khu litshigu lolo, va na bhongela Judha, kha nga gubhonga nya linene, uye a na khedzago tigoni, a na wona basi gidema ni gutshaniseka, lidambo li na pfhupedziswa khu mapfhi nya guthise.

Isaya 59:10

Ha gu phiphithela dzindzarini gukhwatshi hi sikhumu, si phiphithelago khu gumbana maho, ha gu tshunganela vbakari nya mihani, gukhwatshi ha gu gimbila gidemani, hi vathu nya tshivba, aholu ha gu fanana ni vathu va fudego.

Isaya 59:9

Khu guralo, gulamudwa gu ngari hwindzo ni ethu, guvbanyiswa kha gu vbohi vbafuvbi gwathu. Ha gu vbweta wenengedzo, ha gu wona gidema basi; hi vbweta gu gimbila khu safa nya mihani, aholu hi mana gidema.

Isaya 60:2

Wona gidema nya guthise gi fenengedzide litigo ni wutshigu wu fenengedzide mahundzu nya vathu; aholu vbatshani, wu ngu wonega wenengedzo wa Pfhumu Nungungulu, ni wudhumo waye wu ngu ngangamela avbo gwago.

Isaya 8:22

Va na khedza mafuni, gambe va na wona tshanisa, gidema ni wuvi nya wukhongolo ngudzu; khu hwane, va na rinywa gidemani nya guthise.

Jeremiya 14:19

Ina va na Judha u va digede muphelo, gani? Ina kamwe monyo wago wa gu swihala khu Siyoni, gani? Khu ginani u hi podego dzimbanga dzi si vboligo, na? Ha gu lindrela gurula, aholu gimwalo nya gyadi hi gi wonago; Ha gu khedzisela gikhati nya guvbanyiswe, aholu ha guta mana wuvi.

Jeremiya 2:6

Nyamba wudzisa, gukhavo: “Womo hayi Pfhumu Nungungulu a hi dusidego khu tigoni ga Egipito, uye a nga hi gimbidzisago giwulani, litigo nya gihala, nya gutale khu mavbala ni gidema nya guthise ni dzimhango; litigo nyamba gimbidwa ni gu khadwa khu muthu?”

Jeremiya 23:12

Khu guralo, dzindzila dzawe dzi na fanana ni wulanga nya gukwirige; va na redwa va thegela gidemani; kholu nyi na resa gwawe dzitshanisa khu mwaga nya tsayiso wawe; a ngu ganela Pfhumu Nungungulu.

Jeremiya 4:23

Nyi di khedza mafuni, nyi gu wona na guri mwalo giwumbelo; nyi khedza ndzadzini, gu diri mwalo guwonegela.

Jeremiya 50:6

Vathu vangu va gu fanana ni dzinvuta dzi dzimedego; va ndreyisidwe khu vahavisi vawe, va dzimedzidwe sigomoni ni sigomwanani, va gu legalega basi, kha va nga gu guti ni phandroni gwawe.

Jeremiya 6:21

Khu guralo, Pfhumu Nungungulu a ngu ganela kharati, khuye: “Wona nya gukhuwe nyi na thela giphili mbeli ga vathu vava; va na tshunganela gu thega vavelegi gumogo ni sanana sawe; vaakelane gumogo ni dzipari va nafa.”

Jeremiya 8:15

Hi di gu lirela gukhethu hi na mana gurula, aholu kha ha mana gilo nya gutsakise; hi di khethu hi na mana gikhati nya gu vbodzisedwe, aholu hi di wona wughevenga.

Gililo 4:17

Maho yathu ma di fuvila khu gu vbweta giphaso hi si gi woni, hi garala khu gu khedzisela vathu va si kodzigo guta hi vbulugisa. Sade

Ezekiyeli 21:15

Gasi myonyo yi titivale ni gu engedzela gutshunganela va thega, vbafuvbi ni dzinyangwa dzawe nyi vegide litshari nya gusonge. Oh! Ilo li giridwe gasi gukhedziga kha nga gulasa gasi gu sasela.

Ezekiyeli 34:12

Kha nga muhavisi a wuyisago dzinvuta dzaye, litshiguni a manago idzo dzi dzimedego, kharato eni neni nyi na vbweta dzinvuta dzangu. Nyi na dzi wuyisa khu malangani yatshavbo dzi phalalegedego umo khu litshigu nya mazuvi ni gidema.

Ezekiyeli 36:15

Gima kha nyi na gu diga u poyidwa khu va nya mayigo; khu na khala gambe gihegiso nya mayigo, ambari vathu vago gutshunganiswa va thega. A ngu ganela Mune Pfhumu Nungungulu.

Joyele 2:2

Litshigu nya gidema ni gutshaniseka; litshigu nya mapfhi ni gidema nya guphume. Gufanana ni wuronga wu wenengedzago sigomoni, vathu nya vangi ni tshivba va ngu hidzimela, avo nya gu gukhugela gikhati gya gale gima kha va nga manega, ambari khu hwane gwawe kha va na nga manega ga situgulwana ni situgulwana kala gupindruga.

Amosi 4:13

Kholu khuye a wumbago sigomo, a girago dziphuvbo, a pwadzela muthu makungo ma guromo monyoni gwaye, a vbindrugedza mihani gu khala gidema, a gimbila khu malangani nya gukhugege ya mafuni; Pfhumu, lina laye, khuye Nungungulu nya Tshivba Yatshavbo!

Amosi 5:18

Libango ga vale va vbwetago gu wona litshigu la Pfhumu Nungungulu! Mwa gu li vbwetela ginani gu li wonani litshigu leli la Pfhumu Nungungulu? A na bani nari litshigu nya gidema, nyambana wenengedzo.

Malakiya 2:2

Mwa gumba nyi yingisani khu githawo, ni gumba khathala khu gu rungudza lina langu, nyi na resa givalo avbo gwanu, sikategiso sanu nyi na si vbindrugedza si khala givalo; givalo gegi gi tadzisegide, kholu, enu kha mu khathali khu silo sesi. A ngu ganela Pfhumu Nungungulu nya Tshivba Yatshavbo.

Johane 12:35

Khavbo avbo, Jesu a di va embela, khuye: “Gikhati gegi mu ngari ni guwonegela; gimbilani na mu ngari ni guwonegela gasi mu si manwi khu gidema. Uye a gimbilago gidemani kha guti umo a yago.

Josuwa 7:19

Khavbo avbo, Josuwa a di embela Akani, khuye: “Mwanangu, rungudza Pfhumu Nungungulu wa Israyeli, u mu zundza. Nyi embele iso u giridego, nyamba siha ni gimwegyo.”

1 Pedro 2:8

Gambe giwindri gi na gu tshunganisago vathu; giwindri gi na gu va thesago. Avo va tshunganede kholu va ngamba khodwa khu Mahungu, khiso si dongisedwego avo.

1 Samuweli 6:5

Khu guralo, girani sifananiso nya sithunya ni magondzo ma saselago litigo lanu, mu ninga wudhumo ga Nungungulu wa Israyeli; khu guralo, Uye a na dusa gyandza gyaye vbatshani gwanu, ga nungungulu wanu ni ga litigo lanu.